1 REYES 12 - Dios Rimashca Shimicunami

Israelcuna Roboamta c'ariyashcami

¹ Roboamca, jatun mandaj cachun paita churangapaj tucui israelcuna Siquempi tandanacujpimi, chaiman rirca.

² Nabatpaj churi Jeroboamca, Salomonta miticushpa Egiptopi causacushpami, chaita yachaj chayarca.

³ Israelcuna Jeroboamta chaimanta shamuchun cayachijpimi, paica tucui israelcunahuan Roboampajman rishpaca:

⁴ –Cambaj yaya Salomonca, ñucanchijtaca yalli llashaj yugotami apachirca. Cunanca canca cambaj yaya llashaj yugota apachishcatapish, yallitaj sinchi ruranacunata rurachicushcatapish p'anguillayachiyari. Chashna rurajpica, cambajta rurashunllami– nircacunami.

⁵ Shina nijpimi Roboamca: –Cunanca richijlla, ñucahuan rimangapajca quimsa punllapi tigramunguichij– nijpica tucuicuna tigrashpa rircallacuna.

⁶ Chaimi jatun mandaj Roboamca, paipaj yaya Salomón causacujpi paipaj yayaman yuyaita cuj cunaj yuyajcunataca: –¿Ima shina cutichichuntaj cancunaca yuyaita cunguichij? nirca.

⁷ Shina nijpi paicunaca: –Can paicuna mañashcata uyashpa, paicunapaj allita rurashpa, sumaj shimicunahuan cutichijpica paicunapaj tucui causaipimi cambajta rurashpa causangacuna– nircacunami.

⁸ Ashtahuanpish Roboamca, cunaj yuyajcuna yuyaita cushcata mana uyashpami, paihuan igual huiñashca paihuan caj q'uipa huiñaicunata yuyaita cuchun mañarca.

⁹ Paicunataca: –Cambaj yaya yallitaj apachicushca yugomanta p'anguillayachi nishcataca, cancunaca ima shina cutichichuntaj yuyaita cunguichij– nircami.

¹⁰ Shina nijpica Roboamhuan igual huiñai q'uipa huiñaicunaca: –Cambaj yaya yallitaj llashaj yugota apachicushcataca, p'anguillayachiyari nijcunataca cashna rimai: Ñucapaj uchilla dedoca ñuca yayapaj huasha lomotapish yalli racumi.

¹¹ Ñuca yaya llashaj yugota apachishca cajpica, ñucacarin cancunamanca ashtahuan yalli llashaj yugotami apachisha. Ñuca yaya cancunata azotishca cajpica, ñucacarin escorpioncunahuanmi llaquichisha niyari– nircacunami.

¹² Jeroboamca jatun mandaj Roboam quimsa punllapi tigrangui nishca shinallatajmi, tucui israelcunahuan Roboampajman quimsa punllapi shamurca.

¹³ Chaipimi jatun mandajca, cunaj yuyajcuna yuyaita cushcata mana cazushpa,

¹⁴ q'uipa huiñaicuna yuyaita cushca shina sinchita cashna nishpa cutichirca: “Ñuca yaya yallitaj llashaj yugota apachishca cajpica, ñucacarin ashtahuan llashaj yugotami apachisha. Ñuca yaya azotishpa llaquichishca cajpica, ñucacarin escorpioncunahuanmi llaquichisha” nircami.

¹⁵ Mandaj Diosca, Nabatpaj churi Jeroboamman Silo pueblopi causaj Ahías runahuan huillachishcata pajtachina cajpimi, Roboamca israelcuna mañashcataca mana uyarca.

¹⁶ Israelcunaca paicuna mañashcata jatun mandaj mana uyajpimi, cashna nircacuna: “Ñucanchijca Davidpaj huahua huahuahuanca imata mana charinchijchu. Isaipaj huahua huahuahuan japinatapish imata mana charinchijchu. ¡Tucui israelcuna, cancunapaj carpa huasicunaman richijlla! ¡Davidpaj huahua huahuacunaca cancunapaj ailluta mandacuichijlla!” Nishpaca israelcunaca paicunapaj carpa huasicunaman tigrarcallacunami.

¹⁷ Chaimantami Roboamca, israelcunataca Judá llajtapi caj pueblocunapi causajcunallata mandashpa catirca.

¹⁸ Jatun mandaj Roboamca, mandaj Adoramtaca israelcunata sinchi ruranacunapi trabajachichun cachajpimi, paitaca israelcuna rumicunahuan shitajpi huañurca. Chaimi jatun mandaj Roboamca, carropi huichiyashcahuan Jerusalenman callparca.

¹⁹ Israelcunaca, Davidpaj huahua huahuapuramanta ch'icanyashpami, cunancama chashna causacuncuna.

²⁰ Egiptomanta Jeroboam tigramushcata tucui israelcuna uyashpaca, paicuna tandandacushca ñaupajman cayachishpami tucui israelcunata mandaj cachun churarca. Davidpaj huahua huahuataca caishuj Israel aillucunaca, shujllapish mana catircacunachu. Judá aillullami paicunapaj huahua huahuapurapica saquirirca.

²¹ Roboam Jerusalenman shamushpaca, Judá ailluta Benjamín ailluta tandachishpami, 180.000 ashtahuan alli macanacuj runacunata agllarca. Salomonpaj churi Roboamllataj tucui israelcunata mandangapaj, paipajman tigrachingapaj macanacungapajmi chashna tandachirca.

²² Ashtahuanpish Mandaj Diosca, Taita Diospaj Semaías runatami cashna nirca:

²³ “Judá llajtata jatun mandaj Salomonpaj churi Roboamtapish, Judá aillutapish Benjamín aillutapish tucui caishujcunatapish cashna nigri:

²⁴ Mandaj Diosca cashnami nin: Cancunapaj quiquin huauqui israelcunapajmanca ama richijchu, paicunahuanca ama macanacugrichijpishchu. Cancunapaj huasicunaman tigraichijlla. Ñucallatajmi ch'icanyashpa ishqui llajta tucuchun nircani nigri” nircami. Paicunaca Mandaj Dios nishcata uyashpami, Mandaj Dios nishca shinallataj paicunapaj huasiman tigrarcacuna.

Jeroboamca ishqui curi bizicunata rurashcami

²⁵ Jeroboamca, Efraín urcupi caj Siquem pueblota allichishpami chaipi causarca. Chaimanta llujshishpaca, Penuel pueblotami allichirca.

²⁶ Jeroboamca paipaj shungupica: “Ñuca mandacun cai llajtaca, cutinllataj Davidpaj huahua huahuapura mandajpajmi tucuipaj yuyachin.

²⁷ Cai israelcunaca Jerusalenpi caj Mandaj Diospaj huasipi sacrificiota cunaman huichiyacushpallaca, Judá llajtata jatun mandaj, paicunapaj amo Roboampajman paicunapaj shungucuna tigrarishpaca ñucata huañuchingacunami. Chashna rurashpaca Judá llajtata jatun mandaj Roboampajllamantajmi tigrangacuna” yuyarcami.

²⁸ Chaita paiman yuyaita cujcunahuan parlanacushpaca, jatun mandajca ishqui curi bizicunata rurachishpami israelcunataca: “Israelcuna, cancunaca ñami achca cutin Jerusalenmanca puringuichij. Egipto llajtamanta cancunata llujshichimuj dioscunaca cunanca caipimari” nircami.

²⁹ Chai bizicunataca shujtaca Bet-el pueblopi, caishujtaca Dan pueblopimi churarca.

³⁰ Israelcunaca Bet-elpi causajcunamanta callarishpaca, Danpi causajcunacamami, chai bizita cungurishpa adorarcacuna. Chashnami juchallircacuna.

³¹ Jeroboamca lomacunapipish huasicunata rurachishpami, manapish levitapura runacunata curacuna cachun churarca.

³² Jeroboamca Judapi jatun fiestata ruraj cashca shinallatajmi huatapaj pusaj quilla chunga pichca punllapica, pai rurachishca shuj altarpi sacrificiota cushpa fiestata ruranata callarichirca. Jeroboamca Bet-elpimi, pai rurachishca bizicunaman sacrificiocunata curca. Bet-elpi caj lomacunapi pai rurachishca altarcunapica curacunatami churarca.

³³ Chashnami Jeroboamca Bet-elpi caj pai rurachishca altarpica sacrificiocunata curca. Pusaj quilla chunga pichca punllapi paipaj quiquin shungupi yuyarishpa callarichishca quillapica, israelcunapaj fiestata rurashpami inciensota altarpi rupachingapaj huichiyarca.