1 Pedro 5 - Dios Rimashca Shimicunami

Ancianocunata yuyachishpa cunashcami

¹ Cancunapaj ancianocunatami yuyachisha nini. Ñucapish paicuna shinallataj ancianomi cani. Cristo llaquita apashcata ricushcata huillajmi cani. Ñucapish shamuj punlla sumaj ricurinapica, tucui cancunahuanmi alli sumaj ricurisha:

² Dios cancunaman mingashca canlla ovejacunataca alli michichij, ama cuidachun nishcallamanta cuidaichijchu. Ashtahuanpish Dios munashca shina cuidanata munashcamanta cuidaichij. Cullquita japinga raicullaca ama ruraichijchu. Ashtahuanpish ama q'uillashpalla ruraichij.

³ Cancuna cuidacushcacunataca, ama quiquin munaita rurashpa mandanguichijchu. Ashtahuanpish canlla ovejacuna ricushpa catinallata ruranguichij.

⁴ Chashna ruracujpi michijcunata Jatun Michij shamujpica, cancunaca mana ismuj, achij nicuj sumaj coronatami chasquinguichij.

Q'uipa huiñaicunata yuyachishpa cunashcami

⁵ Shinallataj q'uipa huiñaicunapish ancianocunata cazuichij. Tucuicuna caishujmanta chaishujmanta cazunacuichij. Mana jatun tucushca cana yuyaita churarichij. “Jatun tucushcacunataca, Diosca mana ricunachinchu. Mana jatun tucushcacunamanca paipaj mana c'uyaipajta c'uyaj canatami cun”.

⁶ Tucuita rurai tucuj Diospaj maquipi cashcamanta, ama jatun tucuichijchu. Pai cancunata jatunyachina punlla chayamujpica jatunyachingallami.

⁷ Diosmi cancunataca cuidacun. Chaimanta ima llaquicuna yuyailla canataca paiman mingaichij.

⁸ Cancunata p'iñaj diabloca, león huacaricuj shinami, maijanta millpungapaj muyundijta mashcashpa puricun. Chaimanta yachajcuna caichij, chaparacuichij.

⁹ Cai pachapi tucui crijcunapish cancuna apacushca llaquicunallatataj apacushcata yachashcamanta, crishcapi sinchiyashpa diablotaca mishaichij.

¹⁰ Mana c'uyaipajta c'uyaiyuj Diosca Jesuscristomanta paipaj huiñaita sumaj canaman cayaj Diosmi. Paica asha llaquicunata apachun saquishpaca, cancunataca allitaj caj tucungacama pi mana cuyuchipaj sinchitami ruran.

¹¹ Pai tucuita mandanapish, jatunyachishca canapish huiñai huiñaita cachun. Chashna cachun.

¹² Ñucaca alli crij huauqui Silvanohuanmi cai asha quillcata quillcashpa cancunapajman cachani. Caita quillcashpaca, Dios cancunata mana c'uyaipajta c'uyashcata yuyachishpami, chai c'uyaimantaca amataj anchurichun cunani.

¹³ Babiloniapi caj tandanacushca crijcunataca, cancunata shinallataj Dios agllashcacunami, chai tandanacushca crijcunapish ñuca huahua shina caj Marcospish cancunataca alli cashca cachun nincunami.

¹⁴ Caishuj chaishuj c'uyaj muchahuan alli cashca canguichij ninacuichij. Jesucristohuan shujlla cajcunahuanca, tucuicunallahuantaj sumaj causaica cashca cachun. Chashna cachun.