1 Pedro 3 - Dios Rimashca Shimicunami

Cazarashcacuna ima shina causanami

¹ Huarmicuna cancunapaj cusacunata cazuichij. Chashna tucuipi alli cazuj cajpimi, Diospaj Shimita mana crij cusapish huarmi tucuipi alli cajta ricushpaca, mana imata huillajpipish crij tucunga.

² Cancunaca imapi mana juchachipaj, cazuj cajpimi chashnaca crij tucunga.

³ Cancunaca uma ajchallata sumajta allichirishca, curimanta rurashcacunata, sumaj churarinacunatapish jahuallata churarishcaca ama caichijchu.

⁴ Chaipaj randica, ucu shungu yuyaita allichichij. Chashna cashpami mana p'iñarij alli shungu, mana ismuchij yuyaiyuj canguichij. Chaitami Diosca yallitaj munan.

⁵ Diospajlla caj ñaupa huarmicunapish chashnami allichirijcuna cashca. Chashna cashpami, Dios yuyailla cashpa cusacunataca alli cazujcuna cashca.

⁶ Sarami paipaj cusa Abrahamtaca, ñuca amito nij cashca. Cancunapish ima manchanata nijpipish allicunata rurashpaca mana manchanachu canguichij. Chashna rurashpami, paipaj ushushicunataj canguichij.

⁷ Shinallataj cusacunapish cancunapaj huarmicunahuanca alli yuyarishpa causaichij. Huarmitaca p'aquirijlla vaso shina cashcamanta alli cuidaichij. Paicunapish cancuna shinallataj mana c'uyaipajta c'uyashpa cushca huiñai causaita japijcunami. Cancuna Diosta mañacujpi ima ama jarcachunmi chashna cana canguichij.

Allita rurashcamanta llaquita apanami

⁸ Tucuimanta yallica, tucuicuna chai shinallataj cashcata yuyaichij. Llaquilla cajcunahuanpish llaquirij caichij. Quiquin huauquindij shina c'uyanacuichij, llaquijcuna caichij, caishuj chaishujhuanpish apanacujcuna caichij.

⁹ Cancunaca Dios allicunata cushcata japijcuna cachun cayashcata yachashcamantaca, cancunata llaquichijpipish ama chashnallataj ruraichijchu. Ima tucushca canman nijpipish, ama chashnallataj nichijchu. Chaipaj randica, Dios allicunata cushca cachun nichij.

¹⁰ Dios Quillcachishcapica: “Maijanpish causaita c'uyashpa, alli punllacunata charisha nishpaca, mana allita rimanamanta paipaj c'alluta jarcarichun. Ama umaj cachun.

¹¹ Mana allita ruranamanta anchushpa, allita rurachun. Sumajta causanata mashcashpa, chaita catichun.

¹² Jatun Diosca cashcata rurajcunataca ricuracunmi. Paipaj rinrinpish, paicuna mañashcacunataca uyaracunmi. Ashtahuanpish Jatun Diosca mana allita rurajcunatami p'iñan” ninmi.

¹³ Shina cajpica, cancuna allita caticujpica ¿pitaj cancunataca llaquichi tucungari?

¹⁴ Ashtahuanpish cashcata rurashcamanta llaquichijpi, llaquita apashpaca cushichishcami canguichij. Chaimanta paicuna manchachisha nijpica, ama mancharichijchu, ama manchaichijchu.

¹⁵ Chaipaj randica, cancunapaj shungupica Mandaj Taita Diosca jucha illajmi nichij. Cancunata imapajtaj Cristo yuyailla canguichij nishpa tapujpica, manso shunguhuan tucuicunaman sumajta huillangapaj allichirishca huillanalla,

¹⁶ alli yuyaiyuj caichij. Cancuna Cristohuan shujlla cashpa, alli causajta ricushpa millaita rurajcunata shina juchachishpa rimajcunata pingachingapajmi chashna cana canguichij.

¹⁷ Mana allita rurashcamanta llaquita apanapaj randica, allita rurashcamanta llaquita apanami ashtahuan alli. Chaitami Diosca munan.

¹⁸ Chashnami Cristoca juchayujcunamanta shuj cutinlla llaquita aparca. Paica cashcata ruraj cashpapish, juchayujcunata Diospajman pushangapajmi chashna tucurca. Aichapica huañurcami, ashtahuanpish Espiritupica causachishcami carca.

¹⁹ Chashna cashpami, carcelpi caj espiritucunamanpish huillagrirca.

²⁰ Chaicunaca Noé huillacui punllacuna mana cazujcunami. Huambuj huasita Noé tucui rurangacamami Diosca mana utca llaquichishpa shuyashca. Chaipica pusajcunallami yacupi quishpichishca carcacuna.

²¹ Chai bautismoca cunan punlla quishpirinatami ricuchin. (Mana cuerpomanta mapatachu anchuchin. Ashtahuanpish alli yuyaihuan Diosman c'uchuyajtami ruran). Chaica Jesucristo causarishcamantami.

²² Paica jahua pachaman huichiyashpami, Diospaj alli ladopi tiyacun. Chaipica paitami angelcuna, mandajcuna, poderyujcunapish cazucuncuna.