1 Pedro 2 - Dios Rimashca Shimicunami

¹ Chaimanta tucui millaita saquichij. Tucui shina umaj canata, mishqui shimi jayaj shungu canata, envidiaj canata, tucui laya millaita parlanatapish saquichij.

² Ashtahuanpish cunanlla huacharishca huahuacuna shina, imahuan mana chagrushca Diospajlla lecheta munaichij. Chashna cashpami quishpichishcapica huiñanguichij.

³ Mandaj Jesús cushca allita chasquishcataj cashpaca, chashnami cana canguichij.

Cristoca causaj rumimi

⁴ Jesucristoman c'uchuyaichij. Paica causaj rumimi. Runacuna mana munashpa shitashcami. Ashtahuanpish Diospajca agllashca achca valijmari.

⁵ Cancunapish causaj rumicunallatajmi canguichij. Chashna cashpami Diospajlla huasita huasichicuncuna canguichij. Jucha illaj curacunapishmi canguichij. Jesucristomantaca Dios chasquinalla causaita causaichij.

⁶ Quillcachishcapica: “Riquichij, huasichi callaringapaj esquinapi churana agllashca valij rumitaca Sionpimi churani. Maijanpish paipi crijca, mana pingachishca cangachu” ninmi.

⁷ Cristota crij cancunapajca paica achca valijmari. Ashtahuanpish mana crijcunapajca Quillcachishcapi nishca shinaca: “Huasichijcuna shitashca rumica, huasichi callaringapaj esquinapi churana rumimi tucushca”.

⁸ Shinallataj: “Ñitcana rumimi, urmachij jatun rumipishmi” nishcami pajtashca. Paicunaca Diospaj shimita mana cazushcamantami ñitcancuna. ¡Paicuna mana cazushcamantami ñaupaman chashna tucuchun nishca!

Cancunaca Dios agllashcacunami canguichij

⁹ Ashtahuanpish cancunaca Dios agllashcacunapura, jatun mandajpajta ruraj curacuna, jucha illaj llajta, Diospajlla cachun randishca pueblomi canguichij. Cancunataca amsamanta paipaj sumaj achijman cayashpa, mancharina allicunata huillachun agllashcacunami canguichij.

¹⁰ Cancunaca ñaupaca mana Diospaj pueblochu carcanguichij. Cunanca Diospaj pueblomi canguichij. Ñaupaca Dios mana llaquishcacunami carcanguichij. Cunanca Dios llaquishcacunami tucushcanguichij.

Diospajta rurajcuna shinataj causaichij

¹¹ C'uyashcacuna cancunataca shujtaj llajtamanta pasacujllacuna shina causachunmi cai pachapica ñucaca rogani. Cancunapaj almahuan macanacucuj aicha munaicunataca ama ruraichijchu.

¹² Diosta mana rijsijcunapaj ñaupajpi alli causaichij. Chashna cajpimi, millaita rurajcunata shina cunan rimacujcunaca cancuna allita rurashcamantaca, imalla rurashcata Dios ricuchi punllapi paicunaca Diostaca allimari cangui ningacuna.

¹³ Mandaj Jesuspaj cashcamantaca tucui tandanacushcacunapaj mandajcunata, mama llajtacunata jatun mandajcunatapish cazuichij.

¹⁴ Shinallataj jatun mandaj churashca mandajcunatapish cazuichij. Paicunaca millaita rurajcunata llaquichijmi, allita rurajcunataca allimari cangui nijmi.

¹⁵ Yuyai illaj mana yachaj runacunataca allita rurashpa upallachichunmi Diosca munan.

¹⁶ Huatashca shinamantaca cacharichishcami canguichij. Cacharichishcami canchij nij tucushpa, ñataj millaita ruranguichijman. Ashtahuanpish Diospajta rurajcuna shinataj causaichij.

¹⁷ Tucuicunahuan alli caichij. Huauquicunata c'uyaichij. Diosta manchaichij. Jatun mandajtapish cazuichij.

¹⁸ Amopajta rurajcuna, cancunapaj amocunataca shungumanta cumurijcuna caichij. Llaquij alli amocunallataca ama chashnaichijchu. Ashtahuanpish millai amocunatapish shungumanta cumurichij.

¹⁹ Diospaj ñaupajpi alli ricuringapaj, pai yuyailla cajpi yangamanta llaquichijpi llaquicunata apajca, alli crijmi nishcami.

²⁰ Juchata rurashcamanta llaquichijpi llaquita apacushpaca ¿ima allitataj ruracunguiyari? Ashtahuanpish allita ruracujpi llaquichijpi llaquita apashpami, Diospaj ñaupajpica alli crijmi nishca cangui.

²¹ Chashna llaquita apachun cayashcacunami carcanguichij. Cristopish ñucanchijmantaca llaquita aparcami. Pai apashca shinallataj ñucanchijpish llaquita apachunmi chashna tucurca.

²² Cristoca ima juchata mana rurarcachu, paipica umaj canaca manataj tiyarcachu.

²³ Llaqui tucushca alli canman nijpipish, mana chashnallataj cutichircachu. Llaquichicujpipish, ñucapish llaquichishami nishpa mana manchachircachu. Chaipaj randica tucui imatapish cashcata ricuchij Diospaj maquipimi mingarca.

²⁴ Cristollatajmi ñucanchij juchacunataca paipaj aichapi apashpa caspipi chacatashca huañurca. Ñucanchijca juchata ama rurangapajca huañushca shina cashpa, Dios munashca shina causachunmi chashnaca huañurca. Paita chugrichishcamantami cancunaca jambishca canguichij.

²⁵ Cancunaca chingarishca ovejacuna shinami carcanguichij. Ashtahuanpish cunanca cancunapaj almacunata Michijpajman Obispopajmanmi tigrashcanguichij.