1 Juan 3 - Dios Rimashca Shimicunami

Diospaj huahuacunataj cajcuna ima shina canami

¹ Dios ñucanchijta ima shina c'uyashcataca ricuichigari. Diospaj huahuacunami nishca cachunmi chashna c'uyashca. Chaimantami cai pachapi cajcunaca, Diosta mana rijsishcamanta ñucanchijtapish pipaj huahuacuna cashcata mana rijsincuna.

² C'uyashcacuna, ñami Diospaj huahuacuna canchij. Ñucanchij ima shina canataca manaraj ricuchishcachu. Ashtahuanpish pai ricurijpi, pai ima shina caj shinallataj tucuna cashcataca yachanchijmi.

³ Jesús shina tucuna cashcamanta maijanpish chai yuyailla cajca, Jesús ima shinami chuya chai shinallataj chuya cangapajmi punllanta chuyayacun.

⁴ Maijanpish juchata rurajca Mandashcatami p'aquin. Juchaca Mandashcata p'aquinami.

⁵ Jesucristoca, ñucanchij juchacunata anchuchingapaj shamushcataca yachanguichijmi. Paica mana juchayujchu mana juchallingapishchu.

⁶ Maijanpish Jesushuan shujlla tucushcapi caticujca mana juchallinchu. Maijanpish juchallijca paitaca mana ricushcachu, mana rijsishcapishchu.

⁷ Huahuacuna, cancunataca pi ama umachun. Maijanpish cashcata rurajca, Cristo cashcata ruraj shinallataj cashcata rurajmi.

⁸ Maijanpish juchata rurashpa catijca, diablopajmi. Diabloca callarimantami juchallin. Diablopaj rurashcacunata chingachingapajmi, Diospaj Churica shamurca.

⁹ Maijanpish Diosmanta huacharishca cajca, Diospaj mushuj causaita charishcamanta juchallishpallaca mana causai tucunchu. Diosmanta huacharishcataj cashcamantami juchallishpallaca mana causai tucun.

¹⁰ Diospaj huahuacuna cajtapish, diablopaj huahuacuna cajtapish ricunallami. Maijanpish cashcata mana ruraj, paipaj huauquita mana c'uyajca, mana Diospajchu.

¹¹ Cancunaman callarimanta huillashcacunaca caicunami: Caishujhuan chaishujhuan c'uyanacunami.

¹² Ama Caín shina cashunchij. Paica diablopaj cashpami, paipaj huauquitaca huañuchirca. ¿Imamantataj huañuchirca? Pai rurashcacunaca millai cajpi, huauquipaj rurashcacunaca alli cajpimi huañuchirca.

¹³ Ñuca huauquicunalla, cai pachapaj cajcuna cancunata p'iñajpipish, ama manchaichijchu.

¹⁴ Huauquicunata c'uyashpami, huañushca cashca cashpapish, causaiyuj tucushcata yachanchij. Maijanpish paipaj huauquita mana c'uyajca, huañushcallatajmi.

¹⁵ Paipaj huauquita maijanpish p'iñajca huañuchij shinallatajmi. Maijanpish huañuchijca, huiñai causaita mana charij cashcataca yachanguichijmi.

¹⁶ Ñucanchijmanta Cristo paipaj causaita cujpimi, c'uyai ima cashcataca rijsircanchij. Chai shinallatajmi huauquicunamantaca, ñucanchijpish causaita cuna canchij.

¹⁷ Ashtahuanpish cai pachapaj charinacunata charishpapish, maijan huauqui ima illajlla cajta ricushpapish, paipaj shungupi mitsashpa mana cujca, Diospaj c'uyaitaca mana charinchu.

¹⁸ Ñuca huahuacunalla, ama shimillahuan, c'allullahuan c'uyanimi nishunchij. Ashtahuanpish imatapish rurashpataj c'uyashcata ricuchishunchij.

¹⁹ Chashna rurashpami, mana llullapaj cashcataca yachanchij. Ñucanchij shungupish Diospaj ñaupajpica allitaj cashcatapish yachanchijmi.

²⁰ Ñucanchij shungullataj mana alli cashcata ricuchicujpica, Dioscarin ñucanchij shungutapish yalli tucuita yachajmari.

²¹ C'uyashcacuna, ñucanchij shungullataj allimi cangui nijpica, Diospimi shunguta churanchij.

²² Dios mandashcacunata cazushpa, pai munashcacunata paipaj ñaupajpi ruracushcamantaca, ñucanchijca imata mañashpapish paimantaca chasquishunllami.

²³ Diosca: Paipaj Churi Jesucristopi crichun, ñucanchijpish pai mandashca shina caishuj chaishuj c'uyanacuchunmi mandarca.

²⁴ Dios mandashcacunata cazujca paihuanca shuj shinallami causan. Diospish paihuanca shuj shinallami. Chaitaca pai cushca Espíritu ñucanchijpi causacushcamantami yachanchij.