1 Juan 2 - Dios Rimashca Shimicunami

Cristoca ñucanchijmanta rimajmi

¹ Ñuca huahuacunalla, cancuna ama juchallichunmi caicunata quillcani. Shina cashpapish maijan juchallishpaca, ñucanchijmanta Yayahuan rimajtami charinchij. Paica cashcata ruraj Jesucristomi.

² Paica ñucanchij juchacunamanta huañushpa Dioshuan alli tucunacuchijmi. Mana ñucanchij juchacunallamantachu, ashtahuanpish tucui cai pachapi causajcunapaj juchacunamantapishmi huañurca.

³ Pai mandashcacunata cazushpami, paita rijsishpa causacushcata yachanchij.

⁴ Maijanpish: “Ñucaca Diosta rijsinimi” nishpapish, pai mandashcacunata mana cazushpaca, llullanllami. Mana llullajca paipica mana tiyanchu.

⁵ Maijanpish paipaj Shimita cazushpaca, Dios c'uyaj cashca shinallatajmi ashtahuan c'uyaj tucun. Chashna c'uyaj cashpami Cristohuan shujlla cashcata yachanchij.

⁶ Maijanpish Dioshuan shujllami cani nijca, Jesucristo causashca shina causachun.

Mushujta mandashcami

⁷ Huauquicuna, mana shujtaj mushuj mandashcatachu cancunamanca quillcani. Ashtahuanpish callarimanta cancuna charishca ñaupa mandashcallatatajmi quillcani. Chai mandashcatami callarimanta uyarcanguichij.

⁸ Shina cajpipish shujtaj mushuj mandashcata shinami cancunamanca quillcani. Paipi tiyaj mana llullajmi cancunapipish tiyan. Amsaca chingaricunmi. Achijyachijtaj luzca ñami achijyachicun.

⁹ Maijanpish luzpimi cani nishpapish paipaj huauquita p'iñajca, amsapirajmi.

¹⁰ Maijanpish paipaj huauquita c'uyajca, luzpimi causacun. Paipica maijanta imapi pandachinaca mana tiyanchu.

¹¹ Maijanpish paipaj huauquita p'iñajca, amsapirajmi, amsallapitajmi puricun. Chai amsa paipaj ñahuita mana ricujta rurajpimi, maiman ricushcatapish mana yachan.

¹² Huahuacuna, cancunapaj juchacunataca Jesucristomanta perdonashca cajpimi, cancunamanca quillcani.

¹³ Yayacuna, callarinapaj ña tiyajta rijsijpimi, cancunamanca quillcani. Q'uipa huiñaicuna, diablota mishajcuna cajpimi, cancunamanca quillcani. Huahuacuna, Diosta rijsijcuna cajpimi, cancunamanca quillcani.

¹⁴ Yayacuna, callarinapaj ña tiyajta rijsijcuna cajpimi, cancunamanca quillcarcani. Q'uipa huiñaicuna, sinchi crijcuna cashpa, Diospaj Shimi nishca shina causashpa, diablota mishajcuna cajpimi cancunamanca quillcarcani.

¹⁵ Cai pachata, cai pachapi tiyajcunatapish ama c'uyaichijchu. Maijanpish cai pachata c'uyajpajca, Diospaj c'uyaica mana paipichu.

¹⁶ (Aicha munaicuna, ñahui ricushpa munanacuna, charinacunahuan jatun tucuna) cai pachapi ima tiyajcunaca, mana Diosmantachu, cai pachamantami shamun.

¹⁷ Cai pachaca, tucui munaicunandijmi chingaricun. Ashtahuanpish Diospaj munaita rurajca, huiñaitami causanga.

Cristota p'iñaj cajmanta

¹⁸ Huahuacuna, ñamari tucuri punllacuna. Cancunaca Cristota p'iñaj shamunga nijtami uyarcanguichij. Chashnallatajmi cunanca Cristota p'iñajcunaca, achcacuna ricurishca. Chaimantami tucuri punllacuna cashcata yachanchij.

¹⁹ Paicunaca ñucanchijpuramantami llujshircacuna, ashtahuanpish mana ñucanchijpurachu carca. Ñucanchijpura cashca cashpaca, ñucanchijhuanmi caticunman carca. Ñucanchijpurapi cajcunaca mana tucuicuna ñucanchijpura cashcata ricuchunmi chashna tucurca.

²⁰ Cancunaca Jucha Illaj Cristomantami Espirituta charinguichij. Chaimantami tucui imatapish yachanguichij.

²¹ Cancuna mana llullata mana rijsijcuna cajpica mana quillcaimanchu carcani. Ashtahuanpish rijsijcuna cajpimi quillcani. Mana llullamantaca llullaca manataj llujshi tucunchu.

²² ¿Pitaj llulla? Maijanpish Jesusta mana Cristochu nijmi llullaj. Chaimari Cristota p'iñajca. Paica Yayatapish, Churitapish mana tiyashcata rurajmi.

²³ Jesusca mana Cristochu nijca, Yayatapish mana charinchu. Jesusca Diospaj Churimi nishpa huillajmi Yayatapish charin.

²⁴ Callarimanta imatami cancuna uyarcanguichij, chaica cancunapi catichun. Callarimanta uyashca cancunapi catijpica cancunapish Churihuan, Yayahuan shujllami canguichij.

²⁵ Ñucanchijman pai cusha nishcaca huiñai causaimi.

²⁶ Caitaca, umajcuna ima shina cancunata umasha nicushcamantami quillcarcani.

²⁷ Ashtahuanpish Jesucristomanta chasquishca Espirituca cancunapimi causacun. Chaimanta pi shujtaj yachachijtaca mana minishtinguichijchu. Cancunapi caj Espiritullatajmi, tucui imatapish yachachin. Paica cashcatataj, mana llullashpami yachachin. Pai yachachishca shina Jesucristohuan shuj shinalla catichij.

²⁸ Cunanca huahuacuna, pai ricurijpi ama manchashpa ñahui ñahui ricuringapajca, paihuan shuj shinalla catichijlla.

²⁹ Cristoca Dios munashcata ruraj cashcataca yachanguichijmi. Chaimanta maijanpish Dios munashcata ruraj cajpica, Diosmanta huacharishca cashcata yachaichij.