1 CRÓNICAS 7 - Dios Rimashca Shimicunami

Isacarpaj huahua huahuacunami

¹ Isacarpaj churicunaca: Tola, Fúa, Jasub, Simrón shuti chuscu churicunami carca.

² Tolapaj churicunaca: Uzi, Refaías, Jeriel, Jahmai, Jibsam, Semuel shuticunami carca. Paicunaca paicunapaj ñaupa yayacunamanta mirarishca paicunapaj quiquin familiacuna mandajcunami carca. Tolapaj huahua huahuacunaca David mandacujpica, 22.600 soldadocunami macanacunata alli yachaj c'ari c'aricuna carca.

³ Uzipaj churica Israhiasmi. Israhiaspaj churicunaca: Micael, Obadías, Joel, Isías shuticunami carca. Tucuimantaca paicunaca pichca mandajcunami carca.

⁴ Paicunaca achca huarmicunayuj cashpa achca huahuacunata charishpami tauca huahua huahuacunapura tucurca. Paicunaca macanacunata alli yachaj 36.000 runacunami carca.

⁵ Isacarmanta mirarimushcacunata paicunapaj quiquinpurallata yupajpica 87.000 c'ari c'ari runacunami carca.

Benjaminpaj huahua huahuacunami

⁶ Benjaminpaj churicunaca: Bela, Bequer, Jediael shuti quimsa churicunami carca.

⁷ Belapaj churicunaca: Ezbón, Uzi, Uziel, Jerimot, Iri shuti pichca churicunami carca. Paicunaca paicunapaj ñaupa yayacunamanta mirarimushcacunata mandajcuna, macanacunata alli yachajcunami carca. Paicunapaj huahua huahuacunata yupajpica 22.034 runacunami carca.

⁸ Bequerpaj churicunaca: Zemira, Joás, Eliezer, Elioenai, Omri, Jerimot, Abías, Anatot, Alamet shuticunami carca. Tucui paicunami Bequerpaj churicuna carca.

⁹ Paicunapaj ñaupa yayacunamanta mirarimushca huahua huahuacunata, quiquin familiacunata mandajcunata yupajpica, 20.200 c'ari c'ari runacunami carca.

¹⁰ Jediaelpaj churica Bilhanmi. Bilhanpaj churicunaca: Jeús, Benjamín, Aod, Quenaana, Zetán, Tarsis, Ahisahar shuticunami carca.

¹¹ Tucui paicunami Jediaelpaj huahua huahuacuna carca. Quiquin familiacunata mandajcunapish, c'ari c'ari runacunapishmi carca. Macanacunaman llujshijcunaca 17.200 runacunami carca.

¹² Hirpaj churicunaca: Supim, Hupim shuticunami carca. Aherpaj churica Husimmi carca.

Neftalipaj huahua huahuacunami

¹³ Bilha huarmipi Neftalí charishca churicunaca: Jahzeel, Guni, Jezer, Salum shuticunami carca.

Manasespaj huahua huahuacunami

¹⁴ Manasesca Siria llajtamanta caj caishuj huarmipica Asriel, Maquir shuti churicunatami charirca. Maquirca, Galaadpaj yayami carca.

¹⁵ Maquirca Hupim, Supim runacunapaj pani Maacatami paipaj huarmi cachun japirca. Galaadpaj q'uipapish Maquirca, Zelofehad churitami charirca. Zelofehadca ushushicunallatami charirca.

¹⁶ Maquirca, Maaca huarmipica shuj churitami charirca. Paitaca Perestami shutichirca. Perespaj huauquica Seresmi carca. Serespaj churicunaca: Ulam, Requem shuticunami carca.

¹⁷ Ulampaj churica Bedanmi carca. Tucui chaicunaca Maquirpaj churi Galaadpaj huahua huahuacunami carca. Maquirca Manasespaj churimi carca.

¹⁸ Maquirpaj pani Hamolequetca Isod, Abiezer, Mahala shuti churicunatami charirca.

¹⁹ Semidapaj churicunaca: Ahián, Siquem, Likhi, Aniam shuticunami carca.

Efrainpaj huahua huahuacunami

²⁰ Efrainpaj churicunaca: Efrainpaj churica Sutelami. Sutelapaj churica Beredmi. Beredpaj churica Tahatmi. Tahatpaj churica Eladami. Eladapaj churica Tahatmi.

²¹ Tahatpaj churica Zabadmi. Zabadpaj churica Sutelami. Sutelapaj churica Ezermi. Ezerpaj churica Eladmi carca. Ashtahuanpish Efrainpaj churicunata Gat pueblomantataj cajcunami paicunapaj animalcunata quichugrijpi huañuchircacuna.

²² Paicuna huañushcamantami paicunapaj yaya Efrainca, achca punllacunata llaquilla cashcata ricuchij churanata churashca purirca. Chaimi paipaj huauquicunaca cushichinaman shamujcuna carca.

²³ Chai q'uipa paipaj huarmipi chayarijpi chichushpami shuj c'ari huahuata huacharca. Paipaj huasipi llaquilla cai punllacunapi huacharijpimi chai huahuataca, Beriata shutichirca.

²⁴ Beriapaj ushushica, Seerami carca. Paimi janajman caj Bet-horón pueblotapish, uraman caj Bet-horón pueblotapish, shinallataj Uzen-seera pueblotapish shayachirca.

²⁵ Beriapaj huahua huahuacunaca: Beriapaj churica Refami. Refapaj churica Resefmi. Resefpaj churica Telahmi. Telahpaj churica Tahanmi,

²⁶ Tahanpaj churica Laadanmi. Laadanpaj churica Amiudmi. Amiudpaj churica Elisamami,

²⁷ Elisamapaj churica Nunmi. Nunpaj churica Josuemi carca.

²⁸ Paicuna causanapaj japishca llajtaca Bet-el pueblomi muyundij llajtacunandij paicunapaj carca. Inti llujshin ladomanca, Naarán pueblomi paicunapaj carca. Inti huashicun ladomanca, Gezer pueblomi muyundij llajtacunandij paicunapaj carca. Siquem pueblopish, Gaza pueblocamami muyundij llajtacunandij paicunapaj carca.

²⁹ Manasespaj huahua huahuacunapaj llajta c'uchupi caj Bet-seán muyundij llajtacunapish, Taanac muyundij llajtacunapish, Meguido muyundij llajtacunapish, Dor muyundij llajtacunapish paicunapajmi carca. Yaya Israelpaj churi Josepaj huahua huahuacunaca, tucui chai llajtacunapimi causarcacuna.

Aserpaj huahua huahuacunami

³⁰ Aserpaj churicunaca: Imna, Isúa, Isúi, Bería shuticunami carca. Sera shuti ushushitapishmi charirca.

³¹ Beriapaj churicunaca: Heber, Malquiel shuticunami carca. Malquielca Birzavitpaj yayami carca.

³² Heberca: Jaflet, Somer, Hotam shuti churicunatami charirca. Paicunapaj panica Suami carca.

³³ Jafletpaj churicunaca: Pasac, Bimhal, Asvat shuticunami carca. Tucui chaicunami Jafletpaj churicuna carca.

³⁴ Semerpaj churicunaca: Ahí, Rohga, Jehúba, Aram shuticunami carca.

³⁵ Paipaj huauqui Helempaj churicunaca: Zofa, Imna, Seles, Amal shuticunami carca.

³⁶ Zofapaj churicunaca: Súa, Harnefer, Súal, Beri, Imra,

³⁷ Beser, Hod, Sama, Silsa, Itrán, Beera shuticunami carca.

³⁸ Jeterpaj churicunaca: Jefone, Pispa, Ara shuticunami carca.

³⁹ Ulapaj churicunaca: Ara, Haniel, Rezia shuticunami carca.

⁴⁰ Tucui chaicunami Aserpaj huahua huahuacunaca carca. Paicunaca paicunapaj ñaupa yayacunamanta mirarishcacunata mandajcuna, agllashcacuna, macanacunata alli yachajcuna, q'uipa mandajcunata mandajcunami carca. Paicunapaj ñaupa yayacunamanta mirarimushcacunata yupashpa ricujpica, macanacunata alli yachajcunaca 26.000 runacunami carca.