1 CRÓNICAS 21 - Dios Rimashca Shimicunami

Israelcuna mashna cashcata yachangapaj David yupashcami

¹ Satanasca israelcunata p'iñashpa jatarishpami, Davidmanca israelcuna mashna cashcata yupana yuyaita curca.

² Chaimi Davidca Joabtapish, israelcunata mandajcunatapish: –Tucui israelcuna mashna cashcata ñuca yachangapaj, Beersebamanta callarishpa, Dan pueblocama rishpa tucui israelcunata yupamugri– nirca.

³ Shina nijpi Joabca: –Jatun mandaj ñuca amo, Mandaj Diosca israelcunataca cunan mashna cashcamanta patsaj cutihuan mirachishca cachun. Cambajta ruraj tucui caicunaca ¿manachu tucuicuna can ñuca amopajllataj? Ñuca amo ¿imapajtaj chaita ruranata yuyarircanguiyari? Israelcunapaj jahuapi jucha cachunchu chashna rurasha ningui– nircami.

⁴ Joab chashna nijpipish jatun mandajca chashna rurachuntaj nishpa mandajpimi, Joabca tucui Israel llajtata rishpa, paicunata yupagrirca. Ña Jerusalenman tigrashpaca, Davidmanca israelcuna mashna cashcata yupashcataca,

⁵ tucui Israelpica, macanacuiman llujshinalla runacunaca shuj millón cien mil tiyashcata, Judá llajtapipish macanacuiman llujshinalla runacunaca 470.000 tiyashcatami yupashcata curca.

⁶ Tucui chaicunaca Levipaj, Benjaminpaj aillucunata mana yupashcami chaica carca. Jatun mandaj chaita rurachun mandashcaca, Joabpica millanana cajpimi, chai aillucunataca mana yuparca.

⁷ David chashna rurashcaca Taita Diospajca manataj munashca cajpimi, israelcunata llaquichirca.

⁸ Chaimi Davidca Taita Diostaca: –Chashna rurashpaca yallitaj jatun juchatami rurashcani. Mandaj Dioslla cambajta ruraj ñuca juchallishcata anchuchipailla nishpami rogani. Ñucaca upa shinami chashna rurashcani– nircami.

⁹ Chashna mañajpimi, Mandaj Diosca, Dios huillachishcata Davidman huillaj Gad runata cashna Davidman huillachirca:

¹⁰ “Davidpajman rishpa Mandaj Diosca cashnami nin nigri: Cambajca quimsatami rurasha nini. Chaicunamanta can shujta agllai. Chaita ñuca rurangapaj” nircami.

¹¹ Shina nijpi Gad runa Davidpajman shamushpaca: –Mandaj Diosca cashnami nin:

¹² ¿Cambaj llajtapi quimsa huatacunapaj yaricai shamuchunchu munangui? ¿Mana cashpaca canta p'iñajcuna mishajpi quimsa quillacunata miticushpa purinatachu munangui? ¿Mana cashpaca, quimsa punllacunata Mandaj Diospaj espada ungüihuan llaquichichunchu munangui? Chaitaca Mandaj Diospaj angelmi tucui Israel llajtapi ñutuchinga. Cunanca chaitaca can agllai. Can imata agllashcata ñucata cambajman cachajman huillagringapaj– nircami.

¹³ Shina nijpi Davidca, Gad runataca: –Jatun llaquipimari cani. Mandaj Diosca yallitaj c'uyaj cashcamanta paipaj maquipi urmanatami munani. Runacunapaj maquipica mana urmasha ninichu– nircami.

¹⁴ Chashna nijpi Mandaj Dios Israelcunaman chai ungüita cachajpimi, 70.000 runacuna huañurca.

¹⁵ Mandaj Diosca, Jerusalenpi causajcunata ñutuchingapajca angeltami cacharca. Chai ángel ñutucujta Mandaj Dios ricushpaca, yallitaj llaqui cajpimi, ñutucuj angeltaca: “Ña chailla, saqui” nirca. Mandaj Diospaj angelca, jebuseocunapura caj Ornán runapaj parba c'uchupimi carca.

¹⁶ David huichilla ricushpaca, huaquichinamanta espadata llujshichishpa Jerusalén puebloman espadata chutashpa, jahua pachahuan cai pachahuan chaupipi Mandaj Diospaj ángel shayacujtami ricurca. Chaimi Davidpish, cunaj yuyajcunapish cañamazuta churarishcacuna pambaman tupajta cumurishpa,

¹⁷ Davidca, Taita Diostaca: –Ñucamari israelcunata yupachijca cani. Ñucamari juchallijca cani. Ñucamari millaita rurajca cani. Cai ovejacunaca ima millaita mana rurarcachu. Cunanca Mandaj Dioslla cambaj maquihuan llaquichicushcaca ñuca jahuapi, ñuca yayapaj huasi familia jahuapi urmachun. Cai ungüitaca paicunapaj jahuamanca ama cachapaichu– nishpami mañarca.

Diospaj altarta David rurashcami

¹⁸ Chaimi Mandaj Diospaj angelca Gad runataca: “Chai jebuseocunapura caj Ornán runa trillana patioman huichiyashpa, Mandaj Diospaj shuj altarta rurachun ninmi nishpa Davidman huillagri” nirca.

¹⁹ Shina nijpimi Davidca Gad runaman Mandaj Dios ima shina huillachishca shinallataj rurangapaj huichi rirca.

²⁰ Ornanca trigota trillacushpa tigralla ricushpaca angeltami ricurca. Paihuan chaipi caj chuscu churicunaca pacatucurcacunami.

²¹ Ornán runa trillacunman David ña chayagricujpimi, Davidta Ornán ricushpaca, trillacunmanta llujshishpa paipaj ñaupajpi cumurirca.

²² Chaipimi Davidca Ornantaca: –Israelcuna huañucun pararichun Mandaj Diospajlla cachun chaipi shuj altarta rurangapaj cai trillana patiotaca cuilla. Mashna valijpipish chaita cushallami– nirca.

²³ Chaimi Ornanca Davidtaca: –Cambaj cachun japilla. Jatun mandaj ñuca amopi ima shinami alli, chaita rurailla. Mandaj Diosman cushpa tucui rupachingapaj huagracunapish shayacunmi. Yantapajpish trillana caspicuna chaipimi. Diosman cungapaj trigopish chaipimi. Tucuitami cuni– nirca.

²⁴ Shina nijpi jatun mandaj Davidca Ornantaca: –Mana, ashtahuanpish mashna valishcata pagashpami randisha nini. Cambaj cashcataca Mandaj Diosmanca mana cusha ninichu. Shujtaj cushcallatapish Mandaj Diosman cushpa mana rupachisha ninichu– nircami.

²⁵ Chashna nishpaca Davidca, Ornanmanca chai pamba allpamantaca, 600 siclo curitami curca.

²⁶ Davidca, chaipi Mandaj Diospaj shuj altarta rurashpami, paiman tucui rupachingapaj cunatapish, Mandaj Dioshuan alli cangapaj cunatapish cushpa Mandaj Diosta mañarca. Mandaj Diosca pai mañashcataca tucui rupachingapaj cushca altar jahuaman jahua pachamanta ninata cachashpami cutichirca.

²⁷ Mandaj Dios mandajpimi, angelca espadata huaquichinapi huaquichirca.

Diospaj huasita shayachingapaj allpata randishcami

²⁸ Davidca, jebuseocunapura caj Ornán runa trillanapi, Mandaj Diosta mañajpi, pai mañashcata Mandaj Dios cutichishcata ricushpami, paiman sacrificiocunata curca.

²⁹ Shitashca pambapi Moisés rurashca Mandaj Diospaj carpa huasipish, Diosman cushpa animalcunata tucui rupachina altarpish chai punllacunapica Gabaón lomapimi carca.

³⁰ Mandaj Diospaj angelpaj espadata ricushpa yallitaj manchaihuan cashcamantami Davidca, Taita Diosta tapungapajca chaimanca mana ri tucurca.