1 CRÓNICAS 20 - Dios Rimashca Shimicunami

Rabá pueblota David japishcami

¹ Chai q'uipa huataca cashnami tucurca: Cozicha punllacuna tucurijpi, jatun mandajcuna macanacuiman llujshina punllapimi, Joabca paipaj soldadocunahuan llujshishpa amonitacunata chingachishpa, Rabá pueblomanpish rishpa chai pueblota muyujta shayarishpaca, chai pueblopi causajcunahuan macanacushpa Rabá pueblotapish chingachirca. Davidca Jerusalenpimi carca.

² Chaimi Davidca, Rabá pueblota jatun mandajpaj umamanta coronata quichurca. Chai coronaca shuj talento curitami pezarca. Chaipica, sumaj rumicunami tiyarca. Chaitaca Davidpaj umapimi churachirca. Chai pueblomantaca achca charinacunatapishmi llujshichirca.

³ Chai pueblopi causajcunatapish llujshichishpami, sierracunahuan, trillana fierrocunahuan, hachacunahuan trabajachun churarca. Davidca amonitacunapaj tucui pueblocunapi causajcunatapish chashnallatajmi rurarca. Chai q'uipaca, Davidca tucui israelcunandijmi Jerusalenman tigrarca.

Davidpaj runacuna yallitaj jatun runacunata huañuchishcami

⁴ Chai q'uipaca cashnami tucurca: Gezer pueblopi filisteocunahuan macanacui tiyajpimi, husatitapuramanta caj Sibecai runaca yallitaj jatun runacunapaj huahua huahuapura Sipai runata huañuchishpa paicunata cumurichirca.

⁵ Chai q'uipapish cutinllataj filisteocunahuan macanacui tiyajpimi, Jairpaj churi Elhananca geteopuramanta caj Goliatpaj huauqui Lahmi runata huañuchirca. Lahmipaj lanzaca, ahuana telarpaj pilluna caspi shina racumi carca.

⁶ Jatun runa causan Gat pueblopica cutinllatajmi jatun macanacui tiyarca. Chai runaca chaquicunapipish, maquicunapipish shujta dedocunatami charirca. Tucuimantaca ishqui chunga chuscu dedocunatami charirca. Paica yallitaj jatun runacunapaj huahua huahuapuramantami carca.

⁷ Paica israelcunata yanganchishpa c'amijpimi, Davidpaj huauqui Simeapaj churi Jonatán paita huañuchirca.

⁸ Chai runacunaca Gat pueblopi causaj yallitaj jatun runacunapaj huahua huahuapuramantami carca. Paicunami Davidpaj maquipipish, paipajta rurajcunapaj maquipipish urmarcacuna.