1 CRÓNICAS 17 - Dios Rimashca Shimicunami

Taita Diosca Davidmanca bendiciashami nishcami

¹ Davidca paipaj huasipi ña causacushpami, profeta Natantaca: –Riqui, ñucaca cedro caspicunahuan rurashca huasipimari causacuni. Mandaj Diospaj arcaca linsocunahuan shayachishca ucullapimari tiyacun– nirca.

² Chaimi Natanca Davidtaca: –Cambaj shungupi imallata yuyarishcataca chaita rurailla. Taita Diosca canhuanmari– nirca.

³ Chai tutallatajmi Taita Diosca Natantaca:

⁴ “Ñucapajta ruraj Davidpajman rishpa cashna nigri: Mandaj Diosca cashnami nin: Ñuca causana huasitaca mana canchu shayachingui.

⁵ Egiptomanta israelcunata llujshichimui punllamanta cunan punllacamaca, huasicunapica mana causamushcanichu. Ashtahuanpish carpa huasicunallapimi shuj tucurijpica shujpi, chai tucurijpipish shujtajpi causarcani, llajtacunapipish caipi chaipimi causarcani.

⁶ Tucui chaicunapi israelcunahuan puricushpaca, paicunataca ima shimicunata mana rimashcanichu. Ñuca israelcunata michinaman cachacushpapish Israelcunapaj juezcunataca ñucapaj huasita cedro caspicunahuan ruraichij nishpa maijanta mana nishcanichu.

⁷ Chaimanta cunanca ñucapajta ruraj Davidtaca cashna nigri: Tucuita Mandaj Diosca cashnami nin: Ovejacunata michishpa, ovejacunapaj corralpi cuidashpa puricujta japishpami, ñuca israelcunata mandaj cachun churarcani,

⁸ chaimantami can maita puricujpipish canhuan carcani. Canta p'iñajcunatapish cambaj ñaupajmantaca, tucuicunatami anchuchircani. Canmanca jatun shutitami curcani. Cai pachapi jatun mandajcuna shinallataj jatun mandaj cachunmi churarcani.

⁹ Ñuca israelcunapajca shuj llajtatami paicunapajtaj cachun curcani. Chaipi causachunmi paicunataca yurata tarpuj shina churarcani. Chaimantaca pi manataj cuyuchingachu. Millaicunapish callari punllapi shina mana llaquichingachu.

¹⁰ Ñuca agllashca israelcunata mandaj cachun juezcunata churashca punllamanta cunancamami llaquichircacuna. Shina cajpipish canta p'iñajcunataca cumurichishami. Mandaj Diosca caitapish canmanca yachaj chayachinmi. Canpica huasitami shayachinga.

¹¹ Cambaj causai tucurijpi, cambaj ñaupa yayacunahuan can samaricujpica, cambaj q'uipaca cambaj huahua huahuacunapuramantami shuj mandajta churasha. Paica cambaj huahua huahuacunamantami llujshinga. Paitaca paipaj mandana huiñaipaj cachunmi churasha.

¹² Paimi ñuca huasitaca shayachinga. Pai mandashpa tiyanataca ñucami huiñaipaj churasha.

¹³ Ñucaca paipaj yayami casha, paica ñuca churimi canga. Paimantaca ñuca c'uyaitaca mana cambaj ñaupa mandajmanta shina anchuchishachu.

¹⁴ Ashtahuanpish ñuca huasipipish, ñuca mandanapipish huiñaita causachunmi churasha. Pai mandanaca pi mana cuyuchipaj huiñaipajmi canga ninmi nigri” nircami.

¹⁵ Natanca tucui cai shimicunata, muscuipi shina tucui ricushcacunataca chai shinatajmi Davidmanca huillarca.

¹⁶ Chashna nijpi jatun mandaj David yaicushpa, Mandaj Diospaj ñaupajpi shayarishpaca: “Ñucata Mandaj Taita Dios, ñucaca ¿pitaj caniyari? Ñuca huasi familiapish ¿pitaj cajpi ñucanchijtaca caicama pushamunguiyari?

¹⁷ Taita Dioslla, cai tucuita rurashcaca cambajca mana achca shinami cashca. Chai jahuamari cambajta ruraj ñuca huasi ucupuracuna q'uipa punllacunapi ima shina canatapish rimashcangui. Ñucatapish ima alli runata shinamari alli nihuangui, Mandaj Taita Dioslla.

¹⁸ Cambajta ruraj ñucata chashna alli nijpica, cambajta ruraj Davidca ¿imatataj ashtahuan nishari? Cambajta ruraj ñucataca tucuitami rijsingui.

¹⁹ Mandaj Dioslla, cai jatun ruranacunataca cambajta ruraj ñucata c'uyashcamanta, cambaj shungu yuyashca shina rurashpami, cambajta ruraj ñucamanca yachaj chayachishcangui.

²⁰ Mandaj Dioslla, can shinaca pi mana tiyanchu. Can imallata rurashcata ñucanchij uyashca shina shujtaj Diosca mana tiyanchu.

²¹ Cai pachapica can agllashca israelcuna shinapish shujtajcunaca mana tiyanchu. Can jatun Diosca paicunallatamari cambajlla cachun agllarcangui. Chashna jatun allicunata rurashpami, canca jatun cashcata ricuchishpa pi mana rurai tucuipaj mancharinacunata rurashpa paicunataca Egiptomanta llujshichimushcangui. Cai llajtapi causacushca shujtajcunata llujshichishpa cachashpami, paicunataca caipi churashcangui.

²² Cambaj israelcunataca canllataj agllashpamari huiñaipaj cambaj cachun churarcangui. Mandaj Dioslla canca paicunapaj Diosmari tucushcangui.

²³ Cunanca Mandaj Dioslla, cambajta ruraj ñucamanpish, ñuca huahua huahuacunamanpish huiñaipaj imallata rurasha nishcataca chaitataj pajtachinguilla”.

²⁴ Cambaj shutitaca huiñaita jatunyachicuchunlla. Paicunaca: “Tucuita Mandaj Diosca israelcunapaj Diosmi. Chai Diosmari israelcunapaj Dios” nichun. Cambajta ruraj Davidpaj huahua huahuacunaca cambaj ñaupajpica cambajlla sinchicuna cachun.

²⁵ Can ñuca Diosmi cambajta ruraj ñucamanca canpica huasitami shayachisha nircangui. Chaimantami cambajta ruraj ñucaca, cambaj ñaupajpi tucui shunguhuan canta mañani.

²⁶ Mandaj Taita Dios canca Diostajmi cangui. Cambajta ruraj ñucaman allicunata cunataca cambaj shimihuantajmi rimashcangui.

²⁷ Cambajta rurajpaj huahua huahuacunaca huiñaita cambaj ñaupajpi cambajlla cachun paicunataca can alli nichunmi rogani. Mandaj Dios ima shinami rurasha nircangui chai shinallataj can alli nishcahuanca huiñaipaj alli nishca cachun nircami.