1 CRÓNICAS 15 - Dios Rimashca Shimicunami

Davidca Diospaj arcata Jerusalenman apashcami

¹ Davidca paipaj pueblopimi, paipaj quiquin huasicunata shayachirca. Diospaj arcata churangapajpish sumajta allichishpami arpa huasita shayachirca.

² Chaipimi Davidca: “Diospaj arcataca pipish mana apanallachu. Levitacunallami apai tucun. Mandaj Diospaj arcata apachunpish, tucui paicunapaj causaipi paipajta rurachunpish Mandaj Diosca paicunatami agllashca” nircami.

³ Chai q'uipami Davidca pai sumajta allichishcaman Mandaj Diospaj arcata apachun tucui israelcunata Jerusalenpi tandachirca.

⁴ Shinallataj Davidca Aaronpaj huahua huahuacunatapish, levitacunatapishmi tandachirca.

⁵ Coatpaj huahua huahuacunapuramantaca paicunata pushaj Urielca, 120 levitacunahuanmi shamurca.

⁶ Meraripaj huahua huahuacunapuramantaca paicunata pushaj Asaiasmi, 220 levitacunahuan shamurca.

⁷ Gersonpaj huahua huahuacunapuramantaca paicunata pushaj Joelmi, 130 levitacunahuan shamurca.

⁸ Elizafanpaj huahua huahuacunapuramantaca paicunata pushaj Semaiasmi, 200 levitacunahuan shamurca.

⁹ Hebronpaj huahua huahuacunapuramantaca paicunata pushaj Elielmi, pusaj chunga levitacunahuan shamurca.

¹⁰ Uzielpaj huahua huahuacunapuramantaca paicunata pushaj Aminadabmi, 112 levitacunahuan shamurca.

¹¹ Davidca Sadoc, Abiatar curacunatapish, Uriel, Asaías, Joel, Semaías, Eliel, Aminadab shuti levitacunatapish cayashpami,

¹² paicunataca: “Cancunaca levitacunapaj familiacunata pushajcunami canguichij. Chaimanta ñuca sumajta allichishcapi israelcunata Mandaj Taita Diospaj arcata churangapaj cancunapish, cancunapaj huauquicunapish tucuicuna allichirishpa ima mapa illajlla tucuichij.

¹³ Sarunca cancuna mana chashna rurashcamantami ñucanchijta Mandaj Diosca huañuchirca. Mana pai mandashca shina rurajpimi chashna rurarca” nircami.

¹⁴ Shina nijpimi, israelcunata Mandaj Taita Diospaj arcata apangapajca curacunapish, levitacunapish allichirishpa ima mapa illajlla tucurcacuna.

¹⁵ Chai q'uipami levitacunaca Mandaj Dios mandajpi Moisés mandashca shinallataj, chai arcataca huanduna caspicunapi churashpa paicunapaj rigra jahuapi apamurcacuna.

¹⁶ Shinallataj Davidca levitacunata mandajcunataca: “Salteriocunapi, arpacunapi, cimbalocunapi tocashpa cantashpa cushicushpa richun, cancunapuramanta agllashpa churaichij” nircami.

¹⁷ Shina nijpi levitacunata mandajcunaca caicunatami agllarcacuna: Joelpaj churi Hemanta, paipaj familiapura Berequiaspaj churi Asafta, Meraripaj huahua huahuacunapuramantaca Cusaiaspaj churi Etantami agllashpa churarcacuna.

¹⁸ Paicunata ayudajcuna cachunca Zacarías, Jaaziel, Semiramot, Jehiel, Uni, Eliab, Benaía, Maasías, Matatías, Elifelehu, Micnías shuti levitacunatami agllarcacuna. Pungupi cuidajcuna cachunca Obed-edom, Jeiel shuti levitacunatami agllarca.

¹⁹ Hemán, Asaf, Etán shuti levitacunaca bronce cimbalocunapi tocajcunami carca.

²⁰ Zacarías, Aziel, Semiramot, Jehiel, Uni, Eliab, Maasías, Benaía shuti levitacunaca salteriocunapi ñañujlla tonocunata tocajcunami carca.

²¹ Matatías, Elifelehu, Micnías, Obed-edom, Jeiel, Azazías shuti levitacunaca arpacunapi racu tonota tocajcunami carca.

²² Chai tucui cantajcunata imalla tonocunapi cantanata yachachishpa pushachunca levitacunata mandaj Quenaniastami churarcacuna. Paica tonocunatapish, cantachinatapish alli yachajmi carca.

²³ Diospaj arcata cuidajcunaca Berequías, Elcana shuti levitacunami carca.

²⁴ Sebanías, Josafat, Natanael, Amasai, Zacarías, Benaía, Eliezer shuti curacunaca Diospaj arca ñaupajpi trompetacunapi tocajcunami carca. Obed-edom, Jehías shuti levitacunapish Diospaj arcata cuidajcunami carca.

²⁵ Davidpish, israelcunata cunaj yuyajcunapish, huaranga huaranga soldadocunata mandaj soldadocunapish cushicuihuanmi Obed-edompaj huasimanta Mandaj Dios paicunahuan ari ninacushca quillcata huaquichina arcata apanaman rircacuna.

²⁶ Mandaj Dioshuan ari ninacushca quillcata huaquichina arcata apacujpi paicunata Dios ayudashcamantaca canchis jatun huagracunata, canchis carnerocunatami Diosman cushpa huañuchircacuna.

²⁷ Davidpish, arcata apacuj levitacunapish ashtahuan alli linomanta rurashca churanata churashcacunami carca. Shinallataj cantaj levitacunapish, chai cantajcunata pushaj Quenaniaspish chashnallataj churanata churashcami carca. Davidca linomanta rurashca efodtapish churashcami carca.

²⁸ Chashnami Mandaj Dioshuan ari ninacushca quillcata huaquichina arcata apacushpaca, tucui israelcuna cushicuihuan caparishpa, bocinacunapi, trompetacunapi, cimbalocunapi, salteriocunapi, arpacunapipish sinchita tocashpa aparcacuna.

²⁹ Mandaj Dioshuan ari ninacushca quillcata huaquichina arcahuan Davidpaj puebloman chashna ña chayacujpica, jatun mandaj Davidca Mandaj Diospaj ñaupajpi jahuata saltashpa tushuihuan shamucujtami, Saulpaj ushushi Micalca huasi shuj ventanamanta ricurca. Chaimantami paipaj shungupica Davidtaca p'iñarca.