1 CRÓNICAS 13 - Dios Rimashca Shimicunami

Davidca Diospaj arcata Jerusalenman apanata yuyarishcami

¹ Chai q'uipami Davidca, 1.000 soldadocunata mandajcunata, patsaj soldadocunata mandajcunata, tucui caishuj mandajcunata tandachishpa tapushpaca,

² Davidca tandanacushca tucui israelcunatapish: “Ñucanchij Mandaj Diospaj munai cajpi, cancunapi alli ricurijpica, Israel tucui llajtacunapi saquirishca ñucanchij huauquicunata cayanaman cachashun. Paicunapaj pueblopi caj muyundij michina allpacunapi paicunahuan causacuj curacunatapish, levitacunatapish tucuicunata ñucanchijhuan tandanacuchun cayanaman cachashun,

³ nishpa tandachishpaca ñucanchij Taita Diospaj arcataca Saúl mandacui punllamantami chaipi saquishcanchijlla. Cunanca ñucanchijhuan caipi cachun apamushunchij” nircami.

⁴ Chashna nishcaca chaipi tucui tandanacushcacunapi alli ricurijpimi, chashna ruranaca allimi nircacuna.

Davidca Diospaj arcata Jerusalenman ima shina apanata yuyarishcami

⁵ Shina nijpica, Davidca Diospaj arcata Quiriat-jearimmanta apamugringapajca, Egipto llajtahuan tupanacunpi caj Sihor pueblopi causajcunamanta callarishpaca, Hamat puebloman yaicuna c'uchucunapi causajcunacamami tucui israelcunata tandachirca.

⁶ Chaimantaca Davidca tucui israelcunandijmi, Judapi caj Baala nishca Quiriat-jearim puebloman huichiyarca. Mandaj Taita Diospaj arcata apamungapajmi rirca. Chai arca jahuapi querubincunapaj chaupipimi tucuita Mandaj Diosca causan. Chaipimi imata cashpapish paiman mañana.

⁷ Abinadabpaj huasimanta Diospaj arcata llujshichishpaca mushuj carropi churashpami aparcacuna. Uza, Ahío shuti runacunami chai carrota maillata rinata ñaupashpa ricurcacuna.

⁸ Davidpish tucui israelcunapish Diospaj ñaupajpica tucui fuerzahuan cantashcacunahuan, arpacunapi, salteriocunapi, tamborilcunapi, cimbalocunapi, trompetacunapi tocashpa jatunta cushicushpami ricurcacuna.

⁹ Quidonpaj trillana patioman chayashpaca, huagracuna ñitcajpimi, Uza runaca, arca ama urmachun paipaj maquihuan japirca.

¹⁰ Chaimi Mandaj Diosca Uza runahuanca nina sindirij shina p'iñarirca. Mandaj Diospaj arcata tuparishcamantami Taita Diosca paitaca huañuchijpi, Diospaj ñaupajpi huañurca.

¹¹ Uza runata Mandaj Dios huañuchishcamantaca, Davidca achcatami llaquirirca. Chaimi chai pambataca, Pérez-uzata shutichirca. Cunancama chai shutillatajmi.

¹² Davidca, Taita Diosta manchashcamantami chai punllaca: “Diospaj arcataca ñuca huasimanca maitataj apashari” nirca.

¹³ Chaimantami Davidca Diospaj arcataca Davidpaj pueblopi caj paipaj huasimanca mana apashpa, geteo Obed-edompaj huasiman aparca.

¹⁴ Diospaj arcaca quimsa quillatami Obed-edompaj huasipi carca. Mandaj Diosca, Obed-edommanpish paipaj huasi ucu familiamanpish achca allicunatami carca.