1 CRÓNICAS 10 - Dios Rimashca Shimicunami

Saulpish paipaj churicunapish huañushcami

¹ Filisteocunaca israelcunahuanmi macanacurcacuna. Israelcunaca filisteocunata miticushpa rishpaca Gilboa urcupimi huañurcacuna.

² Filisteocunaca Saultapish, paipaj churicunatapish catishpa rishpaca, Jonatán, Abinadab, Malquisúa shuti Saulpaj churicunatami huañuchircacuna.

³ Chai macanacuica ashtahuan tucushpami, flechacunahuan shitajcunaca Saulpi shitajpi, Saulca flechacunahuan chugrichishca cashpa,

⁴ paipaj escudota apajtaca: “Circuncisionta mana rurashca runacuna shamushpa ñucata ama asichun, paicunapaj espadahuan ama huañuchichun cambaj espadata surcushpa huañuchi” nirca. Shina nijpipish Saulpaj escudota apajca yallitaj manchaihuan cashpami mana huañuchisha nirca. Chaimi Saulca paipaj espadallatataj japishpa paillataj satirishpa huañurca.

⁵ Saúl huañujta ricushpami, paipaj escudota apaj runapish paipaj espadallahuantaj satirishpa huañurca.

⁶ Chashnami Saulpish, paipaj quimsa churicunapish, paipaj huasi familiapish tandalla paihuan huañurcacuna.

⁷ Pugru pambapi causaj israelcunaca Israel soldadocuna miticushpa callpashcata, Saulpish paipaj churicunapish huañushcata ricushpami, paicuna causacun pueblocunata shitashpa callpashpa miticugrircacuna. Chaimi filisteocunaca chai pueblocunaman shamushpa chaipi causai callarircacuna.

⁸ Chai cayandij punllami filisteocunaca, huañushcacunapaj churanacunata llujshichinaman rishpaca, Saulpish paipaj churicunapish huañushca chutajllata siricujta Gilboa urcupi japircacuna.

⁹ Chaipimi, Saulpaj umata p'itishpa, paipaj macanacunatapish llujshichishpa aparcacuna. Chaicunahuanmi huillajcunataca filisteocunapaj tucui llajtacunapi causajcunamanpish paicunapaj rurashcalla dioscunata yuyarina huasicunapipish, ricuchishpa huillashpa cushichichun cacharcacuna.

¹⁰ Saulpaj macanacunataca paicunapaj rurashcalla dioscunapaj huasipimi churarcacuna. Paipaj umataca, Dagón diospaj huasipimi huarcurcacuna.

¹¹ Galaadpi caj Jabes pueblopi causaj israelcunaca, filisteocuna Saulta imallata rurashcata yachaj chayashpami,

¹² tucui c'ari c'ari runacuna jatarishpa Saulpaj cuerpotapish, paipaj churicunapaj cuerpocunatapish chai Jabes Galaadman apashpa paicunapaj tullucunataca Jabes pueblopi caj encina yura ucupi pambashpa canchis punllacunata ayunarcacuna.

¹³ Saulca Mandaj Diosta c'ariyashpa juchallishcamantami chashna huañurca. Paica Mandaj Dios imalla nishcacunata mana huaquichishpa ashtahuanpish adivinaj huarmita tapushpa,

¹⁴ Mandaj Diostaca mana tapushcamantami, Mandaj Diosca Saultaca chashna huañuchishpa, pai mandanataca Isaipaj churi Davidman curca.