1 Corintios 9 - Dios Rimashca Shimicunami

Apóstol imallata rurai tucushcami

¹ ¿Manachu apóstol cani? ¿Manachu imatapish ruraipaj cani? ¿Manachu ñucanchijta Mandaj Jesustaca ricurcani? ¿Manachu cancunaca, Mandaj Jesuspajta ñuca trabajashcata ricuchijcuna canguichij?

² Shujtajcunapaj mana apóstol cashpapish, cancunapajca apostoltajmi cani. Cancuna Mandaj Jesuspi shujlla tucushpami ñucaca apóstol cashcata ricuchij selloca canguichij.

³ Ñucata juchachijcunamanca, ima shina cashcatami huillasha nini:

⁴ ¿Manachu ñucanchijpish micui tucunchij, ubyai tucunchij?

⁵ ¿Manachu caishuj apostolcuna shina, Mandaj Jesuspaj huauquicuna shina, Cefas shinallatajpish shuj crij panita ñucanchijpaj huarmi cachun japishpa pushai tucunchij?

⁶ ¿Ñucahuan Bernabellahuanchu ñucanchij trabajashcallahuantaj huillacushunlla?

⁷ ¿Maijantaj quiquin charishcallahuantaj soldado tucushca? ¿Maijantaj uva chagrata tarpushpaca, p'ucujpi mana micun? ¿Maijan michijtaj paipaj canllamanta lecheta capishpa mana ubyan?

⁸ Caitaca mana ñuca yuyaillamantachu nini. ¿Manachu Mandashcapipish caitaca nin?

⁹ Moisés Mandashcapica, cashnami quillcashca tiyacun: “Trillaj huagrataca ama shimita huatangui” ninmi. ¿Diosca huagracunatachu llaquishca canga?

¹⁰ ¿Manachu ñucanchijta llaquishpa, ñucanchijpajtaj chashna quillcashca canga? Yapujca japina yuyaimi yapun, trillajpish granota chasquina yuyaimi trillan.

¹¹ Ñucanchijca Diospajtami cancunapurapica tarpurcanchij. Chaimanta ¿charinacunallata cancunamanta mañashpa tandachinaca chaita yallichu canga?

¹² Caishuj huillajcuna cancunamanta chasquicujpicarin, ñucanchijcarin chasquinatatajmi charinchij. Chashna cajpipish ñucanchijca mana mañashcanchijchu. Ashtahuanpish Cristomanta alli huillaita huillacushca ama jarcarichunmi, ñucanchijca tucui llaquita apanchijlla.

¹³ Diospaj huasipi paipajllata trabajajcunaca chaimantami micuncuna, shinallataj altarpi servijcunapish chai altarmantami japincuna. Chaitaca ¿manachu yachanguichij?

¹⁴ Chashnallatajmi Mandaj Jesusca, alli huillaita huillajcunaca alli huillaimanta causachun mandarca.

¹⁵ Ashtahuanpish ñucaca, chai japina cashcataca mana japishcanichu. Cancuna ñucaman cuchun nishpapish mana quillcanichu. Ñucata jatunyachinata pi manaraj quichujpi huañunami alli canman.

¹⁶ Alli huillaita huillashpaca, imamanta mana jatun tucunachu cani. Ashtahuanpish huillanataj cashcamantami huillani. ¡Alli huillaita mana huillashpaca aij ñucalla!

¹⁷ Chaimanta ñuca munaihuantaj rurashpaca, japina cashcatami charisha. Ashtahuanpish mana ñuca munaihuantaj rurashpaca, rurachun nishpa mingashcallatami pajtachini.

¹⁸ ¿Imataj ñuca japinaca? Cristomanta alli huillaitaca imata mana japishpa huillana, alli huillaimanta ñuca japina cashcahuan pita mana llaquichinami.

¹⁹ Chaimanta ima shinapish achcacuna quishpirichunmi, pipajta ruraj mana cashpapish, tucuicunapajta ruraj tucurcani.

²⁰ Judiocunahuan cashpaca, judiocuna quishpirichunmi, judío shina tucurcani. Mandashca ucupi cajcunahuan cashpaca, paicuna quishpirichunmi, (Mandashca ucupi ñuca mana cashpapish) paicuna shina tucurcani.

²¹ Mandashcata mana charijcunahuanca, paicuna quishpirichunmi (Dios mandashca illaj ñuca mana cashpapish), Mandashca illaj shina tucurcani. (Ashtahuanpish Cristo mandashca ucupimi cani).

²² Irquicunata sinchiyachingapajca, irquicunahuanca irquimi tucurcani. Tucuicunahuanmi paicuna ima shina cajpipish, paicuna shina tucurcani. Pipish quishpirichunmi chashna tucurcani.

²³ Alli huillaita huillangapaj, chai alli huillaita huillashcamanta ñucapish huillajcunahuan japingapajmi chashna rurani.

²⁴ Estadiopi callpajcunaca tucuicunami callpantaj, shina cashpapish japina cashcataca shujllami japin. Chaitaca ¿manachu yachanguichij? Chashna japingapajca callpaichijtagari.

²⁵ Maijanpish mishanacujca tucuimantami jarcarin. Paicunaca chingarijlla coronata japingapajmi chashna rurancuna. Ashtahuanpish ñucanchijcarin, mana chingarij coronata japingapajmi chashna ruranchij.

²⁶ Chashnami ñucaca mishanataj yuyaihuan callpani. Macanacushpapish, mana huairallapi huajtaj shina huajtanichu.

²⁷ Ashtahuanpish ñuca cuerpotaca huajtashpatajmi cazuchini. Caishujcunaman huillacushca jahua, ñucallataj ama anchuchishca cangapajmi chashna rurani.