1 Corintios 8 - Dios Rimashca Shimicunami

Rurashcalla dioscunaman cushca aichacunamanta rimashcami

¹ Rurashcalla dioscunaman rupachinapaj cushca ima cashcata yachanataca tucuicunami yachanchij. Chaita yachanaca jatun tucunapajllami, ashtahuanpish c'uyaimi crijtaca sinchiyachin.

² Maijanpish yachajmi cani yuyashpapish, ima shina yachana cashca shinatajca manaraj imata yachanchu.

³ Ashtahuanpish Diosta maijan c'uyajca, Dios rijsishcami.

⁴ Rurashcalla dioscunaman rupachinapaj cushca micuicunamantaca caitami yachanchij. Rurashcalla diosca cai pachapica, ima mana canchu. Shujlla Diosmi tiyan.

⁵ Jahua pachapipish, cai pachapipish dioscunami tiyan nijcunapajca, achca dioscuna, achca mandajcunami tiyan.

⁶ Shina cajpipish ñucanchijpajca, shujlla Taita Diosmi tiyan. Pai Yayamantami tucui imapish shamun, ñucanchijpish paipajmi tiyanchij. Mandaj Jesucristopish shujllami. Paihuanmi tucui ima tiyajtapish rurarca, paimantami ñucanchijpish tiyanchij.

⁷ Ashtahuanpish cai yachanataca, mana tucuicuna yachancunachu. Maijancunaca rurashcalla dioscunata cunancama adorajcuna cashcamantami, rurashcalla dioscunaman rupachinapaj cushcaca chai diospajtaj cashcata yuyashpa micuncuna. Chaimantami paicunapaj yuyaica, irqui cashcamanta mapayan.

⁸ Micunaca, mana ashtahuan Diosman c'uchuyachinchu. Micushpapish mana ashtahuan alli cashunchu, mana micushpapish mana huashayashunchu.

⁹ Chashna cancuna micushpaca, irquicunata pandachinguichijman alli yuyaringuichij.

¹⁰ Yachanimi nishpa, rurashcalla dioscunata adoranapi caj mezapi quiquin tiyacujta maijan ricushpaca, ricujpaj yuyai irqui cashcamantaca ¿manachu chai rurashcalla dioscunaman rupachinapaj cushcata micunachinga?

¹¹ Quiquin yachashcamanta chashna rurajpica, irqui huauquica chingaringami. Paimantapishmi Cristoca huañurca.

¹² Chashna rurashpaca, huauquicunapaj irqui yuyaitami chugrichishpa juchallinguichij. Cristotapish p'iñashpami juchallinguichij.

¹³ Chai micui ñuca huauquita urmachina cajpica, ñuca huauquita ama ñitcachingapaj aichataca manataj micushachu.