1 Corintios 6 - Dios Rimashca Shimicunami

Crijcunaca mana juicionacunachu

¹ Cancunapurapi maijancuna sinchi llaquicunata charishpaca chaita allichichunca maitataj manapish cashcata rurajcunapajmanca apanguichigari. Ashtahuanpish jucha illajcuna allichichun paicunapajmanmari apana canguichij.

² Jucha illajcunaca, cai pachataca paicuna ima rurashcata ricuchina cashcataca ¿manachu yachanguichij? Cai pachataca, paicuna imalla rurashcata cancuna ricuchina cashpaca ¿chai uchilla llaquicunatachu mana allichijcuna canguichij?

³ Angelcunatapish imalla rurashcata ñucanchij ricuchina cashcataca ¿manachu yachanguichij? Cai causaipi ima llaquicunallatacarin ¿manachu allichi tucunguichij?

⁴ Cai causaipaj imamanta p'iñanacuita charishpaca ¿ima nishpataj tandanacushca crijcunapaj manapish ima cajcuna allichichun paicunapaj ñaupajpi churanguichij?

⁵ Pingachingapajmi cashnaca nini. Huauquicunapura p'iñanacushcata allichingapajca, cancunapurapica ¿manachu shujllapish yachaisapa tiyanguichij?

⁶ Maijan huauqui caishuj huauquita juiciopi churashpaca ¡mana crijcunapaj ñaupajpimi mana allita ruran!

⁷ Cancunapura juiciopi churashpaca, cancunallatajmi llaqui tucunguichij. Llaquichijpipish ¿ima nishpataj chai llaquitaca mana apanguichij? Umashpa shuhuajpipish ¿ima nishpataj mana saquinguichij?

⁸ Ashtahuanpish cancunallatajmari llaquichinacunguichij, umashpa shuhuanacunguichij. ¡Huauquicunallatatajmi chashna llaquichinguichij!

⁹ Millaita rurajcunaca, Dios mandanapica imata mana japina cashcataca ¿manachu yachanguichij? Ama umarichijchu: Apanacushpa causajcuna, rurashcalla dioscunata adorajcuna, huainayajcuna, huarmi shina casha nijcuna, c'aripurallataj siririjcuna,

¹⁰ shuhuacuna, quiquinpajlla charinata munajcuna, machajcuna, llaqui tucushca canman nijcuna, umashpa shuhuajcunapish Dios mandanapica imata mana japingacunachu.

¹¹ Cancunapish maijancunaca chashnallatajmi carcanguichij. Ashtahuanpish Mandaj Jesucristopaj shutipimi, ñucanchij Taita Diospaj Espiritumanta ña maillashcacuna, jucha illajta rurashcacuna, justificashcacuna canguichij.

Cancunapaj cuerpopi Diosta sumajyachichij

¹² Tucui imatapish rurai tucunimi. Ashtahuanpish tucuita ruranaca manamari allichu. Tucui imatapish rurai tucunimi. Ashtahuanpish ñucata imapish mandachunca, manataj saquishachu.

¹³ Micunaca huijsapajmi, huijsaca micunapajmi. Chashna cajpipish Taita Diosca ishquindijtami chingachinga. Ashtahuanpish cuerpoca mana huainayanapajchu, Mandaj Jesuspajmi, Mandaj Jesuspish cuerpopajmi.

¹⁴ Mandaj Jesusta causachij Taita Diosmi, paipaj poderhuan ñucanchijtapish causachinga.

¹⁵ Cancunapaj cuerpocunaca Cristopaj cuerpopaj miembrocuna cashcataca ¿manachu yachanguichij? ¿Cristomanta anchushpachu, huainayashpa causaj huarmipaj cuerpopaj miembrocuna cachun curisha? ¡Chashnaca manataj rurashachu!

¹⁶ Huainayashpa causaj huarmihuan maijanpish chayarinacujca, paihuan shuj cuerpolla tucushcataca ¿manachu yachanguichij? ¿Manachu Quillcachishcapica: “Ishquindij shuj aichallami tucun” nin?

¹⁷ Ashtahuanpish Mandaj Jesushuan shujlla tucujca, paihuanca shuj espiritullami.

¹⁸ Huainayajcunamanta caruyaichij. Maijanpish ima juchata rurashpaca, paipaj cuerpotaca mana imata ruranchu. Ashtahuanpish huainayajca, paipaj cuerpopaj llaquipajllatajmi juchallin.

¹⁹ Jucha illaj Espiritupaj huasi cashcata, paica cancunapi causacushcatapish ¿manachu yachanguichij? Chaitaca Diosmanta chasquishca cashcamanta, mana cancunapajllatajchu canguichij.

²⁰ Achca valijhuan randishcacunami canguichij. Chashna cashcamanta cancunapaj cuerpopi, cancunapaj espiritupi Diosta sumajyachichij, chaicunaca Diospajmari.