1 Corintios 5 - Dios Rimashca Shimicunami

Huainayashpa causajtami rimashca

¹ Cancunapurapica, huainayaj tiyan nishcami uyarin. Chaica yayapaj huarmihuanmi causacun ninmi. Chashnataj huainayajcunaca, Diosta mana rijsijcunapurapipish manamari uyarinchu.

² Ashtahuanpish cancunaca jatun tucucunguichijmi. Chaipaj randica ¿manachu llaquirishpa, chashna rurajtaca cancunapaj chaupimanta llujshichina carcanguichij?

³ Ñucaca cuerpohuan mana chaipi cashpapish, espiritupica chaipimi cani. Chaimanta ñuca chaipi cashca shinallatajmi, chaita rurajtaca llaquichishca cachun nircani.

⁴ Ñucanchijta Mandaj Jesucristopaj shutipi tandanacuichij. Ñucapish espiritupica, ñucanchijta Mandaj Jesucristopaj poderhuan cancunahuanmi casha.

⁵ Chashna rurajtaca, paipaj aichata jatunta llaquichichun Satanasman cuichij, paipaj espirituca Mandaj Jesuspaj punllapi quishpichishca cachun.

⁶ Cancunapaj jatun tucushcaca manamari allichu. Ashalla levadura tucui masata p'unguillichij cashcataca yachanguichijllatajmi.

⁷ Mushuj masa tucungapajca, ismushca levadurataca tucui p'ichaichij. Ñucanchij Pascua, Cristo ñucanchijmanta ña sacrificashca cashcamantami, levadura illaj masa shina tucushcanguichij.

⁸ Chashna cashcamanta fiestataca, ama ismushca levadurahuan, ama millai yuyaihuan, ama ima mapa levadurahuan rurashunchij. Ashtahuanpish levadura illajlla tandahuan, mana nij tucushpalla, chuya shunguhuan rurashunchij.

⁹ Cancunaman quillcashpaca, huainayajcunahuan ama tandanacuichijchu nircanimi.

¹⁰ Cai pachapaj cashcamanta huainayajcunahuan, quiquinpajlla charinata munajcunahuan, shuhuacunahuan, rurashcalla dioscunata adorajcunahuanca ama tandanacunguichijchu mana nisha ninichu. Chashna cana cajpica, cai pachamantami llujshinataj canguichijman.

¹¹ Ashtahuanpish crijmi cani nishpapish, huainayaj, quiquinpajlla charinata munaj, rurashcalla dioscunata adoraj, llaqui tucushca canman nij, machaj, shuhua, chashna millai causacujhuanmi ama tandanacunguichij, ama micunguichijllapish nishpa quillcarcani.

¹² Canllaman cajcunata imata ningapajca ¿ñucaca imataj caniyari? Ucuman cajcunataca, cancunami ima shina cashcata alli ricushpa caicunapi nishca shina rurana canguichij.

¹³ Canllaman cajcunataca Diosmi imatapish ninga. Cancunapurapi caj millaita rurajtaca, llujshichichij.