1 Corintios 3 - Dios Rimashca Shimicunami

Diospajta paihuan rurajcunami canchij

¹ Huauquicuna, ñucaca cancunataca Espiritupajlla cajcunata shinaca mana rimai tucurcanichu. Cristopi huahuarajcuna cashpa, aicha munaillata ruracujcunamanmi rimarcani.

² Cancunamanca lechellatami ubyachircani, chaquishca micuitaca mana carai tucurcanichu. Chaitaca manaraj micui tucurcanguichijchu, cunancamapish manaraj micui tucunguichijchu.

³ Aicha munaitapish ruracujraj cashcamantami chashna canguichij. Chaimantami cancunapurapica huañurinacucunguichij, p'iñanacushpa rimanacucunguichij, chaupirinacucunguichij. Chashna cashpaca ¿manachu aicha munaita rurashpa mana crijcuna shinallataj puricunguichij?

⁴ Shujca: “Ñucaca Pablopajtajmi cani”, caishujca: “Ñucaca Apolospajtajmi cani” ninacucushpaca ¿manachu aicha munaita ruracunguichij?

⁵ ¿Pablopish, Apolospish imataj canchigari? Ñucanchij huillajpimi crircanguichij. Ñucanchijca Cristopajta rurajcunallami canchij. Ñucanchijca cada quiquinman imata rurai tucunata Mandaj Jesús cushca shinalla rurajcunami canchij.

⁶ Ñucaca tarpurcanimi, Apolosca yacutami churarca, ashtahuanpish huiñachijca Diosmari.

⁷ Chashnami tarpujpish, yacuta churajpish mana ima canchij, ashtahuanpish huiñachijca Diosmari.

⁸ Tarpujpish, yacuta churajpish chai shinallatajmi. Shina cashpapish cada quiquin imata rurashca shinallatajmi japinga.

⁹ Ñucanchijca, Diospajta paihuan rurajcunami canchij. Cancunaca Diospaj chagrami canguichij, Dios huasichicun huasipishmi canguichij.

¹⁰ Diosca paipaj mana c'uyaipajta c'uyaj canata ñucaman cushca shinallatajmi, huasichinata alli yachaj shina callarichircani. Chai callarichishca jahuapica, shujtajmi huasichicun. Ima shina huasichicushcataca cada quiquin alli yuyarichun.

¹¹ Callarichishcapica shujtaj callaritaca pi mana churai tucunchu. Paica Jesucristomi.

¹² Chai callarichishca jahuapica maijanpish curihuan, cullquihuan, sumaj rumicunahuan, mana cashpaca caspihuan, ujshahuan, p'angacunahuan huasichingachari.

¹³ Cada quiquin imata rurashcataca, shamuj punllapimi ninahuan ricuchishca canga. Cada quiquinpaj imalla rurashcataca, alli cashcatapish mana alli cashcatapish ninallatajmi ricuchinga.

¹⁴ Maijanpaj huasichishca mana chingarijpica, japina cashcataca chasquingami.

¹⁵ Maijanpaj rurashcapish rupajpica, chingachishcamanta llaquitami apanga. Shina cajpipish, paillami rupacuj ninamanta llujshishpa quishpirishca canga.

¹⁶ Cancunaca Diospaj huasi cashcata, Diospaj Espíritu cancunapi cashcatapish ¿manachu yachanguichij?

¹⁷ Maijanpish Diospaj huasita chingachijtaca, Diospish paitaca chingachingami. Diospaj huasica, jucha illajmi. Chai huasica, cancunallatajmi canguichij.

¹⁸ Pi cashpapish quiquinllatajca ama umarichun. Cancunapurapi maijanpish cai pachamanta yachaihuan yachaisapami cani yuyashpaca, mana yachaj shina cachun. Chashna cashpami yachaisapataj canamanca chayanga.

¹⁹ Cai pachamanta yachashcahuanca, Diospaj ñaupajpica yuyai illaj shinami. Cashnami quillcashca tiyacun: “Paimi yachaisapacunataca, paicuna umangapaj yachaj cashcallapitaj tsagnarichin”.

²⁰ Cashnapish ninmi: “Jatun Diosca yachaisapacunapaj yuyaicunataca rijsinmi, chai yachaica yanga cashcatapish yachanmi”.

²¹ Chaimantami maijanpish yachachijcunallamantaca mana jatun tucuna. Tucuimi cancunapaj:

²² Pablo cashpa, Apolos cashpa, Cefas cashpa, cai pacha cashpa, causai cashpa, huañui cashpa, cunan punllacuna cashpa, shamuj punllacuna cashpapish tucuimi cancunapaj.

²³ Cancunaca Cristopajmi canguichij, Cristoca Diospajmi.