1 Corintios 16 - Dios Rimashca Shimicunami

Jucha illajcunaman cunapaj ofrendami

¹ Jucha illajcunaman ofrendata cachangapajca, Galaciapi tandanacushca crijcunata ñuca mandashca shinallataj cancunapish ruraichij.

² Ñuca chayajpi ofrendata ama tandana tucuchunca, cada quiquin ima shina japishca shinallataj, cada semana callari punllapi ch'icanchishpa huaquichichij.

³ Ñuca chayashpami, cancuna maijanllata agllashca cajpica, quillcata rurashpa cancuna cushcataca, Jerusalenpi saquigrichun paicunata cachasha.

⁴ Ñucapish rinataj cajpica, paicunahuan rishallami.

Pabloca maillaman rinata yuyarishcami

⁵ Macedoniata pasashpaca, cancunata ricunaman shamushami. (Macedoniatatajmi pasana cani).

⁶ Shamushpaca, cancunahuanmi saquiripaj yuyachini. Maiman rina cashcamanca, cancuna ayudashpa cachachunmi, tamya quillacuna pasangacama chaipi saquiripaj cani.

⁷ Cunanca ricushpalla mana pasasha ninichu. Mandaj Jesús munajpica, asha punllacunallatapish cancunahuanmi casha nini.

⁸ Efesopimi Pentecostescama saquirisha.

⁹ Achcacuna ñucata p'iñajpipish, shuj jatun pungumi ñucapajca pascarishca, chaica allimari.

¹⁰ Timoteo chayajpica, cancunahuan cashpa ama manchaihuan cachun ricupanguichij. Paipish Mandaj Jesuspajta ñuca shinallataj rurajmi.

¹¹ Chaimanta paitaca, pajta pipish yanganchinguichijman. Ashtahuanpish ñucapajman shamuchun, ayudashpa sumajta cachanguichij. Shujtaj huauquicunandijmi shuyacuni.

¹² Huauquicunahuan cancunapajman richunmi, huauqui Apolostaca achcata rogarcani. Ashtahuanpish cunanca manataj rina munaita charircachu. Q'uipata rina cajpica ringallami.

Tucuchinapaj allilla canguichij nishcami

¹³ Chaparaichij, crishcapi sinchi caichij. C'ari c'ari sinchicuna caichij.

¹⁴ Tucui imata rurashpapish, c'uyaihuan ruraichij.

¹⁵ Huauquicuna, Acaya llajtapi Estefanaspaj familiacuna punta crijcuna cashcata, paicunaca jucha illajcunapajta ruranapaj curishca cashcatapish ña yachanguichijmi.

¹⁶ Paicuna shina rurajcunata, shinallataj tucui ayudajcunata, trabajajcunatapish cazupanguichij nipanimi.

¹⁷ Ñucaca Estéfanas, Fortunato, Acaico huauquicuna shamushcamantami yallitaj cushicuni. Paicunami cancuna carupi cashpa mana rurai tucushcataca ruracuncuna.

¹⁸ Paicunami ñuca espirituta, cancunapaj espiritutapish cushichircacuna. Chashnacunamanca, paicuna japina cashcataca cupanguichij.

¹⁹ Asiapi tandanacushca crijcunami cancunataca alli cashca cachun nincuna. Aquilapish, Priscilapish, paicunapaj huasipi tandanacushca crijcunapish cancunataca, Mandaj Jesuspaj shutipimi achca alli cashca cachun nincuna.

²⁰ Cancunataca tucui huauquicunami alli cashca cachun nincuna. Caishuj chaishuj jucha illaj muchahuan alli cashca cachun ninacuichij.

²¹ Pablomi cai alli cashca cachun nishcataca, ñuca maquihuantaj quillcani.

²² Mandaj Jesucristota maijanpish mana c'uyajca, llaquichinapaj cachun. ¡Mandaj Jesusca shamugrinmi!

²³ Mandaj Jesucristopaj mana c'uyaipajta c'uyaj canaca cancunahuan cachun.

²⁴ Cristo Jesuspi ñuca c'uyaica cancunahuan cachun. Chashna cachun.