1 Corintios 15 - Dios Rimashca Shimicunami

¹ Cunanca huauquicuna, cancunaman alli huillaita ñuca huillashcatami yuyachisha nini. Chai huillashcataca chasquircanguichijmi. Chai huillashcapi nishca shinami sinchita caticunguichij.

² Chai ñuca huillashcata crishcataj cashpaca, ña quishpichishcami canguichij. Chai huillashcacunapimi catiranguichij.

³ Ima shina chasquishca shinallatajmi, cancunamanca chaitaraj yachachircani: Cristoca, Quillcachishcacunapi nishca shinallataj ñucanchij juchacunamantami huañurca.

⁴ Quillcachishcacunapi nishca shinallatajmi pambashca carca, quimsa punllapica causarircami.

⁵ Causarishpaca Cefasmanrajmi ricurirca, chai q'uipaca chunga ishquicunamanmi ricurirca.

⁶ Chai q'uipaca tandanacushca 500 yalli huauquicunamanmi shuj ricuripi ricurirca. Chaicunamantaca achcacunami causacunraj, maijancunaca ña huañushcacunami.

⁷ Chai q'uipaca Jacoboman, chai q'uipaca tucui apostolcunamanpishmi ricurirca.

⁸ Tucuicunaman ricurishca q'uipaca, shullurishca shina ñucamanmi ricurirca.

⁹ Diospaj tandanacushca crijcunata catirashpa llaquichij cashcamantaca, caishuj apostolcunapaj q'uipallami cani. Apóstol nishcapish mana caipajmi cani.

¹⁰ Ashtahuanpish Diospaj mana c'uyaipaj c'uyaimantaca ima shinami cani, chaimi cani. Diospaj mana c'uyaipajta c'uyaica, ñucapajca mana yanga cashcachu. Ashtahuanpish ñucaca, tucui caishujcunata yallimi trabajashcani. Chaitaca mana ñucallatajchu, ashtahuanpish Diospaj mana c'uyaipajta c'uyai ñucahuan cashpami chashna rurachishca.

¹¹ Ñuca cashpa, caishujcuna cashpapish, chaillatatajmi huillacunchij, chaillatatajmi crircanguichij.

¹² Cristoca huañushcacunapaj chaupimantami causarirca nishpa huillacujpipish ¿ima nishpataj cancunapurapi maijancunaca huañushcacuna causarinaca mana tiyanchu nincuna?

¹³ Huañushcacuna causarina mana tiyajpica, Cristopish mana causarinmanchu carca.

¹⁴ Cristo mana causarishca cajpica, ñucanchij huillashcapish yangallami, cancuna crishcapish yangallami canman.

¹⁵ Diosca Cristotami causachirca nishpa huillashcamantaca, Diosmanta llullashpa huillajcunami canchijman. Paita mana causachishca cajpica, huañushcacunaca manatajmari causarinmanchu.

¹⁶ Huañushcacuna mana causarina cajpica, Cristopish mana causarinmanchu carca.

¹⁷ Cristo mana causarishca cajpica, cancuna crishcapish yangallami: Cancunaca juchacunapirajmi canguichijman.

¹⁸ Shina cajpica Cristopi huañushcacunapish chingarishcacunallatajmi canman.

¹⁹ Ñucanchijca cai causaipajlla Cristopi shuyacushpaca, tucui gentecuna llaquinachinami canchijman.

²⁰ Ashtahuanpish cunanca, huañushcacunapaj chaupimanta Cristoca causarishcami. Paica huañushcacuna causarinata ricuchishpa punta causarijmi.

²¹ Ima shinami shuj runallamanta huañuica cai pachaman yaicurca, chashnallatajmi huañushcacunapaj chaupimanta causarinapish shuj runallamanta tiyan.

²² Ima shinami Adanmantaca tucuicuna huañun, chashnallatajmi Cristopi cajcunaca tucuicuna causachishca canga.

²³ Ashtahuanpish tucuicunami paicuna causarina cashcapica huashan huashan causaringa: Cristomi puntaca causarirca. Chai q'uipaca Cristopaj cajcunami pai shamuipica chashna causaringacuna.

²⁴ Cristoca tucui paita p'iñaj mandajcunata, tucui poderyujcunata chingachishpami, pai mandacushcataca Dios Yayaman cunga. Chai q'uipaca tucurimi canga.

²⁵ Tucui paita p'iñajcunata paipaj chaqui sarunapi churangacamami, paillataj mandacungalla.

²⁶ Tucui p'iñajcunapaj q'uipa chingachishca canapaj p'iñajca, huañuimi.

²⁷ Diosca tucui ima tiyajtami paipaj chaqui sarunapi churarca. Tucui ima tiyajta paipaj chaqui sarunapi churarca nishpaca, paipaj chaqui sarunapi churaj Diostapish cazuchicun mana nisha ninchu.

²⁸ Tucui ima tiyajta Cristopaj ucupi churashca q'uipaca, tucuita churaj Diospaj ñaupajpica paipaj Churillatajmi cumuringa. Chashnami Diosca tucuipi, tucuicunata mandanga.

²⁹ Huañushcacuna causarina manataj tiyajpica, huañushcacunapaj randi bautizarijcunaca ¿imatataj rurangacuna? Huañushcacunapaj randica ¿imapajtaj bautizarincunamanri?

³⁰ ¿Ima nishpataj ñucanchijca, pipish maipipish huañuchina manchailla canchij?

³¹ Huauquicuna, punllantami pipish huañuchinalla puricuni. Cancuna ñucanchijta Mandaj Jesucristota crij cajpi cushicushpami chashna caitaca nicuni.

³² Éfeso pueblopi p'iña animalcunahuan jatun tucungapajlla macanacushca cashpaca ¿ima allitataj japishari? Huañushcacuna mana causarina cajpica: “Micushunchij, ubyashunchij, cayaca huañushunmi” nimanmari.

³³ Ama umarichijchu. “Mana alli parlocunaca, alli causaitami llaquichin”.

³⁴ Alli yuyaihuan chapaichij, ama juchallichijchu. Cancunamanta maijancunaca Diosta mana rijsinguichijchu. Cancuna pingarichunmi chashnaca nini.

³⁵ Ashtahuanpish maijanca: “Huañushcacunaca ¿ima shinashi causaringa? ¿Ima cuerpohuanshi jataringa?” nishpa tapungachari.

³⁶ Upa, can tarpushcaca manaraj huañushpaca mana causaiman tigranchu.

³⁷ Imata tarpushpapish, ña huiñashcataca mana tarpunguichu. Muyullatami trigota cashpa, ima shujtajta cashpapish tarpungui.

³⁸ Diosca pai munashca yuratami huiñachin. Ima muyuta cashpapish, chaitatajmi yurayachin.

³⁹ Tucui aichacunaca mana chai shinallatajchu. Gentecunapaj aichaca shuj shinami, animalcunapaj aichaca shujtajmi, chalhuacunapaj aichapish ch'icanmi, alasyujcunapaj aichapish ch'icanmi.

⁴⁰ Jahua pachapaj cuerpocunapish, cai pachapaj cuerpocunapish tiyanmi. Ashtahuanpish jahua pachapaj cuerpocunaca shujtaj shina sumajmi, cai pachapaj cuerpocunapish shujtaj shina sumajmi.

⁴¹ Intica shuj shinami achijyachin, lunapish shujtaj shinami achijyachin, luzerocunapish shujtaj shinami achijyachin. Shuj luzeroca, caishuj luzeromanta ch'icanmi achijyachin.

⁴² Huañushcacuna causarinapish chashnallatajmi. Ismujllata tarpujpica, mana ismujmi causaringa.

⁴³ Millananata tarpujpica, sumajmari causaringa. Irquiyashcata tarpujpica, imatapish rurai tucujmari causaringa.

⁴⁴ Huañujlla cuerpota tarpujpica, Diospajlla cuerpomi causaringa. Huañujlla cuerpopish tiyanmi, Diospajlla cuerpopish tiyanmi.

⁴⁵ Cashnapishmi quillcashca tiyacun: “Punta rurashca Adán runaca, causaj almayujmari” ninmi. Q'uipa Adanca, causaita cuj Espiritumari.

⁴⁶ Ashtahuanpish Diosmanta cajca mana puntachu, aichayujmi puntaca, chai q'uipami Diosmanta cajca.

⁴⁷ Punta runaca allpamantami carca, allpallatajmi. Q'uipa runaca jahua pachamantami, paica Mandaj Jesusmi.

⁴⁸ Allpamanta caj shinallatajmi allpapaj cajcunapish, jahua pachamanta caj shinallatajmi jahua pachapaj cajcunapish.

⁴⁹ Ima shinami allpamanta cajman rijchaj shamurcanchij, chashnallatajmi jahua pachamanta cajman rijchaj ricurishun.

⁵⁰ Ashtahuanpish caitami nisha nini, huauquicuna: Aichapish, yahuarpish Dios mandanapica, ima japinata mana charingachu. Imapish ismujca, mana ismujpica ima japinata mana charingachu.

⁵¹ Cancunamanca pi mana yachashcatami huillasha nini: Mana tucuicuna huañushunchu, ashtahuanpish tucuicunami shujtajyachishca cashun.

⁵² Tucuri trompeta uyarijpica, ñahui quimllai shinallapimi shujtajyachishca cashun. Trompetapi tocajpica huañushcacunaca, mana ismuj cuerpohuanmi causachishca cangacuna. Ñucanchijpish shujtajyachishcami cashun.

⁵³ Cai ismuj aichaca mana ismujta churarinatajmi, cai huañujlla aichaca mana huañujta churarinatajmi.

⁵⁴ Cai ismuj aichaca mana ismujta churarijpi, shinallataj cai huañujlla aichaca mana huañujta churarijpimi, cashna quillcashca tiyacuj shimica pajtanga: “Mishajmi huañuitaca tucuchishca.

⁵⁵ Huañui, ¿maipitaj cambaj tujsishpa huañuchinaca? Pambana jutcu ¿maipitaj can cushicunaca?”

⁵⁶ Huañuchijpaj tujsinaca juchami, juchaca Mandashcahuan tucushpami llaquichin.

⁵⁷ Ashtahuanpish ñucanchijta Mandaj Jesucristomanta mishanata cushcamantami, Taita Diostaca pagui nina canchij.

⁵⁸ Chashna cajpica ñuca c'uyashca huauquicuna, Mandaj Jesuspajta ruranapi huiñashpa, sinchiyashpa, pi mana cuyuchipaj catiraichij. Cancuna Mandaj Jesuspi shujlla tucushpa paipajta trabajashca mana yanga cashcataca yachanguichijmi.