1 Corintios 11 - Dios Rimashca Shimicunami

¹ Cristota ñuca catij shinallataj, ñucata ricushpa catichij.

Crij huarmicuna ima shina allichirinami

² Huauquicuna, cancunaca tucui imapipish ñucata yuyaricushcamanta, ñuca yachachishcacunatapish chariracushcamantami cancunataca alli nini.

³ Ashtahuanpish caitami yachachun nini: Cristoca tucui c'aricunapaj umami, c'arica huarmipaj umami, Diosca Cristopaj umami.

⁴ Maijan c'aripish Diosta mañacushpa, mana cashpaca profetizacushpa, umata ch'ungurishpaca paipaj uma caj Cristotami pingachin.

⁵ Ashtahuanpish maijan huarmipish Diosta mañacushpa, mana cashpaca profetizacushpa, umata mana ch'ungurishpaca, paipaj uma caj cusatami pingachin. Chashna rurashpaca, ajchata lluchuta rutuchishca shinami.

⁶ Umata mana ch'ungurij huarmica, ajchata tucuita p'itichichun. P'itichinata, mana cashpaca lluchuta rutuchinata pinganachishpaca, umata ch'ungurichun.

⁷ C'arica, Diosman rijchaj, Dios sumaj cashcata ricuchij cashcamantami, umataca mana ch'ungurina. Ashtahuanpish huarmica, c'ari sumaj cashcata ricuchijmi.

⁸ C'arica mana huarmimantachu shamurca, ashtahuanpish huarmimi c'arimanta shamurca.

⁹ C'aritaca mana huarmipajchu, ashtahuanpish huarmitami c'aripaj rurashca carca.

¹⁰ Chaimantami huarmica, cusa mandaj cashcata ricuchij señalta paipaj umapi charina. Angelcunamantapishmi umata taparina.

¹¹ Ashtahuanpish Mandaj Jesuspi cajcunapajca, c'aripish huarmita mana yallichu, huarmipish c'arita mana yallichu.

¹² Ima shinami huarmica c'arimanta shamurca, chashnallatajmi c'aripish huarmimanta huacharin. Chashna cajpipish tucuimi Diosmanta shamun.

¹³ Cancunallataj yuyarichij: Huarmica, Diosta mañacushpa umata mana ch'ungurishca cashpaca ¿allichu ricuringa?

¹⁴ C'ari paipaj ajchata sunita huiñachijpica ¿manachu chashna rurashcallataj pingachicushcataca ricuchin?

¹⁵ Ashtahuanpish huarmipajca, paipaj ajcha sunita huiñachun saquinaca sumajmari. Ch'ungurinapaj randimi ajchataca curca.

¹⁶ Maijancuna caicunamanta rimanacusha nishpaca ñucanchijpish, Diospaj tandanacushca crijcunapish chashnaca mana ruraj cashcata yachachun.

Mandaj Jesús huañushcata yuyarishpa micucunchij nishpa maipish cachun ruracushcata rimashcami

¹⁷ Caita cancunaman ashtahuan yachachishpa catishpaca allimi ruracunguichij mana ni tucunichu. Cancunaca allipaj tandanacunapaj randica, ashtahuan llaquipajmari tandanacunguichij.

¹⁸ Caitarajmi ricuchisha nini: Tandanacushca crijcuna tandanacushpaca, chaupirinacui tiyan nijtami uyani. Chashna canataca maitaca crinimi.

¹⁹ Cancunapurapi crijtaj cashca ricurinapajca, chaupirinacui tiyanallatajmi.

²⁰ Chaimanta cancuna Mandaj Jesús huañushcata yuyarishpa micungapaj tandanacushcaca, ña mana chaipajchu.

²¹ Micushpaca quiquin micuita cada quiquinmi ñaupashpa micucunguichij. Chashna rurashpaca shujcunaca yaricaihuanmi, caishujcunaca machashcacunami.

²² Micungapaj, ubyangapajca ¿manachu huasiyujcuna canguichij? ¿Diospajlla tandanacushca, imata mana charijcunatachu yanganchishpa, pingachishun ninguichij? ¿Imatataj cancunataca nisha? ¿Allimi canguichij nishachu? Chashna rurashcataca, allimi mana ni tucunichu.

Mandaj Jesús huañushcata yuyarishpa micunata ima shina callarichishcata yuyachishcami

²³ Mandaj Jesusmanta ñuca chasquishcatami cancunamanpish yachachircani: Mandaj Jesusca, paita japichi tutallatajmi tandata japishpa,

²⁴ Taita Diosta pagui nishpa, chaupishpaca: “Japichij, micuichij. Caica, cancunamanta chaupishca ñuca cuerpomi. Ñucata yuyarishpa, caitaca ruracunguichijlla” nircami.

²⁵ Chashnallatajmi micushca q'uipa, copata japishpaca: “Cai copaca, mushuj ruranata ñuca yahuarpi callarishcata ricuchijmi. Caita mashna cutin rurashpaca, ñucata yuyarishpa ubyanguichij” nircami.

²⁶ Chaimanta cancunaca, mashna cutin cai tandata micushpaca, cai copamanta ubyashpaca, Mandaj Jesús huañushcatami pai shamungacama huillacunguichij.

Mandaj Jesús huañushcata yuyachij micunataca allichirishpami micuna nishcami

²⁷ Chashna cajpica maijanpish mana alli shunguhuan Mandaj Jesuspaj cai tandata micushpa, cai copamanta ubyashpaca, Mandaj Jesuspaj cuerpomanta, yahuarmantaca juchachishcami canga.

²⁸ Chaimanta tandata manaraj micushpa, copamanta manaraj ubyashpa, cancunallataj ima shina cashcata alli yuyarichij.

²⁹ Maijanpish mana alli shunguhuan micujca, ubyajca, Mandaj Jesuspaj cuerpo cajta mana alli yuyarishcamantami, paipaj llaquipajllataj micun, ubyan.

³⁰ Chaimantami cancunapurapica achca ungushcacuna, irquicuna tiyanguichij, achcacunapishmi huañushca.

³¹ Ñucanchijllataj ima shina cashcata ricurishca cashpaca, mana llaquichishca canchijmanchu.

³² Ashtahuanpish cai pachapaj cajcunahuan ama jatun llaquiman cachangapajmi, Mandaj Jesusca ñucanchijtaca llaquichishpa yachachin.

³³ Chaimanta ñuca huauquicuna, micungapaj cancuna tandanacushpaca, caishuj chaishuj shuyanacuichij.

³⁴ Chai tandanacui ama llaquipaj cachunca, maijanpish yaricachijca huasipi micuchun. Ima shujtajcunataca, ñuca shamushpami allichisha.