ZACARÍAS 9 - Dios Rimashcata Quillcashcami

Israel llactata piñaccunata llaquichinamanta

¹ Mandac Diosca Hadrac llactata, Damasco llactata llaquichinatami huillacun. Shinallatac cai pachapi causaccunatapish, tucui Israel aillucunatapish chaparacunmi.

² Shinallatac Israel llacta cuchullapi cac Hamat llactatapish, Tiro, Sidón llactacunatapish chaipi causaccuna yallita yachaccuna cacpipish chaparacunmi.

³ Tiropi causaccunaca muyundi pircata ruhuashpami, cullquitaca polvota shina, curitaca ñanpi siricuc turuta shina tandachirca.

⁴ Shina cacpipish, Mandac Diosca paicuna charishcacunataca quichungami. Shina quichushpami, paicuna alli nishcataca mana cuchapi chingachinga. Cutin chai llactataca ninami tucuchinga.

⁵ Chaita ricushpaca, Ascalón llactapi causaccunapish, Gaza llactapi causaccunapish yallita llaquirishpa chucchungami. Ecrón llactapi causaccunaca imata mana ruhuai pudishpa, yallita llaquiringami. Gaza llactata jatun mandacpish huañungami. Ascalón pueblopica pipish mana causangachu.

⁶ Asdod llactapica shuctac llacta runacunami causanga. Chaipimi jatun tucushca filisteocunataca tucuchisha.

⁷ Yahuaryuc aichata paicunapac shimimanta quichushami. Shinallatac mana micuna nishca micunatapish paicunapac quirumanta anchuchishami. Filisteocunapuramanta maijan saquishcacunaca ñucanchic Mandac Diospacmi canga. Paicunaca Judá llacta soldadocunata mandacmi tucunga. Ecronpi causaccunaca jebuseocuna shinami canga.

⁸ Ñucaca pipish ama llucshichun, ama yaicuchunmi carpa huasita muyundita cuidashpa shayacusha. Cunan ñuca ñahuihuan ricushpa, cuidacucpica, llaquichiccunaca mana ashtahuan yaicui pudingachu.

⁹ ¡Sionpi causaccunalla, yallita cushicuichicyari! Jerusalenpi causaccunalla, cushicushpa caparichicyari. Riquichic, cancunata jatun mandacca mama burropac huahua maltón burritopimi cancunapacman shamunga. Paica cashcata ruhuac, quishpichic, cuyac shungumi canga.

¹⁰ Paica Efraín llacta carretacunatapish, Jerusalenpi causaccunapac caballocunatapish tucuchingami. Macanacuna arcocunapish paquishcami canga. Llactacunapica cushi causaimi tiyanga. Paica shuctac lado mama cuchamantaca chaishuc lado mama cuchacaman, jatun yacumanta cai pacha tucuricamanmi mandanga.

¹¹ Yahuarta jichashpa, cancunahuan ari nishcamantami cantaca yacu jundachina jutcupi prezu cacpi, chaimanta llucchisha.

¹² Prezumanta cutina yuyailla caccucunalla, muyundita pircashcaman cutimuichicyari. Cunanca, cancuna yallita llaquita apashcamantaca chaupihuan yalli allicunata cancunaman cunatami huillacuni.

¹³ Judá llactapi causaccunataca ñuca arco shina cachunmi allichisha. Efraín aillutaca flecha shinatami ruhuasha. Sionpi causaccunataca paicunata piña runacunapac espada shinatami ruhuasha. Cancunapac churicunamanca Grecia llactapi causaccunata llaquichichunmi macana yuyaita cusha.

¹⁴ Mandac Diosmi paicunapac jahuapi ricuringa. Paipac flechaca relampa shinami llucshinga. Mandac Diosmi cornetapi tocashpa, ura lado acapana huaira chaupipi shamunga.

¹⁵ Tucuita Mandac Diosmi paicunataca ayudanga. Chaimantami paicunaca, paicunata piñaccunataca tucui tucuchishpa, huaraca rumicunatapish sarunacunga. Vinota ubiac shinami yahuarta ubianga. Tazonpi jundachishca shina, gachucuna altarpi yahuarta jundachishca shinami ruhuanga.

¹⁶ Chai punzhapica, Mandac Diosmi, pai acllashcacunataca ovejacunata shina quishpichinga. Chai llactapica coronapi churana diadema curi rumicuna shinami, mai valishca canga.

¹⁷ ¡Chai llactaca mai sumacmi! Trigoca quipa huiñaicunatami sumacta huiñachinga. Vinoca carihuan manarac chayarishca solteracunatami cushichinga.