ZACARÍAS 8 - Dios Rimashcata Quillcashcami

Mandac Dios Jerusalentan cutin allichinamanta

¹ Tucuita Mandac Dios ñucata rimashpaca:

² «Tucuita Mandac Diosca: Sionpi causaccunataca ñucapaclla cachunmi munani. Chaimantami paicunata piñaccunatapish yallita piñani.

³ Ñucaca Sionman cutimushpami, Jerusalén chaupipi causasha. Jerusalenca cashcata nic llacta nishcami canga. Tucuita Mandac Dios ñucapaclla Sión urcuca ñucapaclla chicanyachishca urcumi canga.

⁴ Tucuita Mandac Diosca: Jerusalén ñancunapica yuyac caricunapish, yuyac huarmicunapishmi taunahuan puringa.

⁵ Shinallatac chai callecunapica tauca cari huahuacunapish, huarmi huahuacunapishmi pucllanga.

⁶ Chai punzhacunapica saquirishca gentecunamanca mancharinami ricuringa. Shina cacpipish, ñucamanca mana mancharinachu canga. Chaitaca Mandac Dios ñucami nini.

⁷ Tucuita Mandac Diosca: Ñuca acllashcacunataca inti llucshina ladomanta, inti tigrana ladomantami quishpichimusha.

⁸ Chashnami Jerusalén chaupipi causachun churasha. Paicunaca ñuca acllashcacunami canga. Ñucapish paicunapacca cashcata nic, cashcata ruhuac Diosmi casha» ninmi.

⁹ Tucuita Mandac Diosca: «Ñucapac huasita shayachingapac callari rumita churashca punzhamanta pacha ñuca ima nishcata huillaccuna rimashcata uyaccuna sinchiyaichic.

¹⁰ Manarac chai punzhacuna chayacpica, runacuna trabajashcamanpish mana pagarcachu, animalcunamanpish mana cararcachu. Piñaccunata manchashcamantami runacunaca maiman cushilla llucshinatapish, yaicunatapish mana pudirca. Ñucami gentecunapura llaquichinacuchun saquircani.

¹¹ Ashtahuanpish cunanca maijan saquirishca gentecunataca utcapi shinaca mana llaquichishachu.

¹² Ashtahuanpish paicunapacca cushi causaica muyuta tarpushca shinami canga. Uvaspish achcami pucunga, allpapipish achca granomi pucunga, jahua pachaca tamyatami cachanga. Chai tucui allicunataca maijan saquirishcacunamanmi cusha.

¹³ Judá llactapi causaccunalla, israelcunalla, shuctac llactacunapac mana alli nishcami causarcanguichic. Shina cacpipish, chai llaquimanta quishpichishpami bendiciasha. ¡Ama manchaichicchu! ¡Cushicuichic!

¹⁴ Tucuita Mandac Diosca: Cancunapac ñaupa taitacuna ñucata yalli piñachicpi llaquichinata yuyarishca shinallatacmi cancunatapish llaquichisha. Chaitaca pactachishatacmi.

¹⁵ Ashtahuanpish cunan punzhacunapica Jerusalenpi causaccunamanpish, Judá llactapi causaccunamanpish allita ruhuanatami yuyarircani. Chaimanta ama manchaichicchu.

¹⁶ Cancunaca caicunatami ruhuana canguichic: Caishuc-huan chaishuc-huan cashcallata parlaichic. Cashcallata ruhuashpa taripaichic. Chashna ruhuashpami cushilla causanguichic.

¹⁷ Ama cancunapac shungupi shuccunata mana allita yuyaichicchu. Ama llullashpa ari nichicchu. Ñucaca tucui chaicunatami piñani» ninmi.

¹⁸ Tucuita Mandac Dios cutin ñucata rimashpaca:

¹⁹ «Judá llactapi causaccuna chuscu quillapi, pichca quillapi, canchis quillapi, chunga quillapi ayunanaca yallita cushicuna fiesta punzhacunami tucunga. Chaimanta cashcata ninata, cushi causaita munaichic» nirca.

²⁰ Tucuita Mandac Dios cutin rimashpaca: «Achca llactapi causaccunapish, jatun llactapi causaccunapish shamungami.

²¹ Shuc llactapi causaccuna, shuctac llactaman rishpaca: “¡Ñucanchic-huan alli cachun Mandac Diosta jacuchic mañashun, tucuita Mandac Diosta servishun! ¡Ñucapish cancunahuanmi rishami!” ningami.

²² Shina nishpami, llactapi causaccunapish, jatun llactacunapi causaccunapish tucuita Mandac Diosta Jerusalenpi mañangapac, servingapac shamunga. Chashnami Mandac Diostaca allita ruhuachun mañangapac shamunga.

²³ Chai punzhacunapica tauca llactacunamanta chican rimaicunata rimac chunga runacunami shamunga. Paicunaca Judá llactamanta runata jahualla churanapi japirishpa: “¡Ñucanchicpish cancunahuan rinatami munanchic. Mandac Diosca cancunahuan cactami yachanchic!” ninga» nirca.