ZACARÍAS 7 - Dios Rimashcata Quillcashcami

¿Ayunanachu canchic? nishpa tapushcamanta

¹ Chuscu huata, Quisleu nishca iscun quilla, chuscu punzhata jatun mandac Darío mandacucpimi, Mandac Diosca Zacariasta rimarca.

² Chai punzhacunami Bet-el llactapi causaccunaca Sarezertapish, Regem-melectapish, paicunapac runacunandi, Mandac Diosta mañachun cacharca.

³ Shinallatac tucuita Mandac Diospac huasipi causac curacunaman, Dios ima nishcata huillaccunaman: «¿Ñaupa huatacunapi shinallatac pichca quilla chayacpica, llaquilla tucushpa ayunanachu canchic?» nishpa tapuchunpishmi cacharca.

⁴ Chaimantami tucuita Mandac Diosca ñucataca:

⁵ «Cai llactapi tucui causaccunatapish, curacunatapish rimashpaca: “Cancuna cai canchis chunga huatacunata, pichca quillapi, canchis quillapi llaquilla tucushpa, ayunashpaca, ¿ñucata yuyarishpachu ayunarcanguichic?

⁶ Micushpapish, ubiashpapish, ¿manachu cancunallamantac ruhuarcanguichic?” ningui» nirca.

⁷ ¿Manachu caicunataca Jerusalenpi causaccunapish Neguevpi, Sefela pambapi cushilla causacucpi, Mandac Diosca pai ima nishcata ñaupa huillaccunata huillachirca?

Mana cazushcamanta prezu rishcamanta

⁸ Mandac Dios Zacariasman huillashpaca:

⁹ «Tucuita Mandac Dios ñucaca: “Cashcata ruhuashpa taripanguichic. Tucui mashna cuyanacuichic, llaquinacuichic.

¹⁰ Viuda huarmitapish, taita mama illactapish, caru llacta runatapish, huacchatapish ama llaquichinguichicchu. Ama quiquin huauquicunata ucu shungupi piñanguichicchu” nini» nirca.

¹¹ Shina nicpipish, mana uyashun nircachu. Ashtahuanpish huashaman tigrarishpa, mana uyasha nishpami, ringrita taparca.

¹² Paicunaca tucuita Mandac Dios mandashcatapish, paipac Espíritu huillashcatapish, pai ima nishcata ñaupa huillaccuna huillashcatapish mana uyashun nishpa, diamante rumi shina sinchi shungu tucurca. Chaimantami tucuita Mandac Diosca paicunahuan nina japiric shina piñarirca.

¹³ Chaimantami tucuita Mandac Diosca: «Ñuca paicunata cayacpi, mana cazushca shinallatacmi paicuna mañashcataca mana uyarcani.

¹⁴ Ashtahuanpish paicunataca jatun acapana huairahuanmi paicuna mana ricsishca llactacunaman shic-huashpa cacharcani. Paicuna rishca quipaca, paicunapac llactaca shitashca pambami saquirirca. Chai llactaman yaicunataca pipish mana munangachu. Paicuna munashca llactataca shitashca pambatami saquirirca» nirca.