ZACARÍAS 6 - Dios Rimashcata Quillcashcami

Chuscu carretamanta

¹ Cutinllatac huichai ricushpaca, ishcai urcu chaupimanta chuscu carretacuna llucshimuctami ricurcani. Chai urcucunaca bronce urcucunami carca.

² Shucniqui carretataca puca caballocuna, ishcainiqui carretataca yana caballocuna,

³ quimsaniqui carretataca yurac caballocuna, chuscuniqui carretataca muru bayu caballocunami aisacurca.

⁴ Chaita ricushpami, ñucahuan parlacuc angeltaca: —Ñuca mandaclla, ¿caicunaca imatac?— nircani.

⁵ Shina tapucpimi angelca: —Caicunaca jahua pacha chuscu huairacunami cai pachata Mandac Diospac ñaupamanta llucshimucun.

⁶ Yana caballocuna aisashca carretaca jahua llactamanmi ricun. Yurac caballocunaca aisashca carretaca inti tigrana ladomanmi ricun. Muru caballocunaca aisashca carretaca ura lado llactamanmi ricun— nirca.

⁷ Bayu caballocuna aisashca carretaca cai pachata muyugrinatami yallita munarca. Chaimantami angelca: —¡Cai pachata muyugrichic!— nirca. Chaimantami cai pachata muyugrirca.

⁸ Chai quipata ángel ñucata cayashpaca: —Riqui, jahua lado llactaman riccunaca chai llactapi ñuca piñarishcata chiriyachingapacmi rirca— nirca.

Josuepac curunamanta

⁹ Mandac Dios ñucata rimashpaca:

¹⁰ «Babiloniapi prezu cashpa, cutimuc Heldaimanta, Tobiasmanta, Jedaiasmanta ofrendata chasqui. Chaimantaca chai punzhallatac Sofoniaspac churi Josiaspac huasiman ri.

¹¹ Chaiman chayashpaca cullquimanta, curimanta coronata ruhuangui. Chaitaca Josadacpac churi, curacunata mandac Josueman churachingui.

¹² Chashna churachishpaca, tucuita Mandac Dios ñucaca: “¡Retoño shuti runaca ñallami shamunga! ¡Paica, paipac sapillamantatac huiñashpami, Mandac Dios ñuca huasitaca shayachinga!

¹³ Paimi, Mandac Dios ñuca huasitaca shayachinga. Paica tucuipac alli nishcami canga. Pai mandashpa tiyarinapi tiyarishpami, tucuita mandanga. Paipac ladopica shuc curami shayacunga. Paihuanca shuc yuyaillami canga” ninimi.

¹⁴ Chai coronaca Helem, Tobías, Jedaías runacunapish, Sofoniaspac churi Henpish yuyarichunmi Mandac Diospac huasipi churashca canga» nirca.

¹⁵ Carupi causaccuna shamushpami, Mandac Diospac huasita shayachinata ayudanga. Chaita ricushpami, Mandac Diosllatac cancunapacman ñucata cachashcata yachanguichic. Mandac Dios rimashcata uyashpa cazucpimi, chashnaca tucunga.