ZACARÍAS 5 - Dios Rimashcata Quillcashcami

Shuc quillca huairapi rishcamanta

¹ Cutinllatac huichaita ricushpaca, quillcashca cara jahuata ricuctami ricurcani.

² Chai ángel ñucata tapushpaca: —¿Imatatac ricucungui?— nirca. Shina nicpimi ñucaca: —Largomanca iscun metro, anchomanca chuscu metro chaupi pillushca cara huairapi rictami ricucuni— nircani.

³ Shina nicpimi angelca: —Chaipica tucui cai pachapi causaccuna llaqui tucunatami quillcashca. Chai pillushca carapi shuc ladopi nicushca shinallatacmi shuhuaccunaca tucuchinga. Caishuc ladopi imata nicushca shinallatacmi llullashpa ari niccunapish tucuchinga.

⁴ Tucuita Mandac Diosca: «Chai llaquicunataca ñucami cacharcani. Chai llaquimi shuhuaccunapac huasimanpish, ñuca shutipi llullashpa ari niccunapac huasimanpish chayanga. Chashnami paicunapac huasicunapi tiyac caspicunatapish, rumicunatapish tucuchinga» ninmi.

Granota medina cajonpi shuc huarmi tiyacushcamanta

⁵ Ñucahuan parlacuc ángel llucshimushpaca: —Cambac ñahuita alzashpa, ima ricurimucucta ricuiyari— nirca.

⁶ Chaita ricushpami ñucaca: —Chaica, ¿imatac?— nircani. Shina tapucpimi angelca: —Chai can ricushcaca granota medina cajonmi. Chai cajonca tucui cai pachapi causaccunapac juchata medingapacmi— nirca.

⁷ Plomomanta ruhuashca tapata pascacpica, shuc huarmimi chai cajón chaupipi tiyacushca carca.

⁸ Chai angelca: —Cajón ucupi tiyacuc huarmica gentecunapac mana allita ruhuashcami— nirca. Shina nishpami, chai huarmitaca cajón ucullapitac churashpa, llashac plomohuan taparca.

⁹ Cutin huichai ricushpaca, ishcai huarmicuna cigüeña animalpac alascunayuc shamucuctami ricurcani. Paicunaca chai alascunapimi huairata apamurca. Chai alasyuc huarmicunaca cajonta apashpami vola rirca.

¹⁰ Chaimantami ñucahuan parlacuc angeltaca: —Cajontaca, ¿maimantac apacun?— nircani.

¹¹ Shina tapucpimi angelca: —Chaitaca Sinar llactaman apashpami, Diosta yuyarina huasita ruhuanga. Chai huasita ña tucuchishca cacpimi, cajonta churana pushtupimi churanga— nirca.