ZACARÍAS 4 - Dios Rimashcata Quillcashcami

Curi candeleromantapish, olivos yuracunamantapish

¹ Ñucahuan parlacuc ángel cutimushpami, shuc sueñucuc runata riccharic shina ricchachirca.

² Chai ángel tapushpaca: —¿Imatatac ricungui?— nirca. Shina tapucpimi ñucaca: —Aceiteta churana curi candelerota, cutin chai jahuapica canchis lamparacunatapish, canchis tubocunatapishmi ricucuni.

³ Candeleropac ishcai ladopica olivos yuracuna, shucca alli ladoman, shucca lluqui ladoman shayacuctami ricuni— nircani.

⁴ Ashtahuan ñucahuan parlacuc angelta tapushpaca: —Ñuca mandaclla, ¿caica imatac?— nircani.

⁵ Shina nicpimi angelca: —¿Manachu ima cacta yachangui?— nirca. Shina nicpimi ñucaca: —Ñuca mandaclla, mana yachanichu— nircani.

⁶ Shina nicpimi paica: «Tucuita Mandac Diosca Zorobabeltaca: “Caitaca mana soldadocunahuan, mana sinchi cashcahuanchu mishangui. Ashtahuanpish ñuca Espirituhuanmi mishangui.

⁷ Jatun urculla, Zorobabelpac ñaupapica, ¿imatac cangui? ¡Canca Zorobabelpac ñaupapica pugru pambami tucungui! Paimi ucupi cac rumita llucchinga. Shina llucchicpica: ‘¡Sumacmari, sumacmari!’ nishpami caparinga” ninmi.

⁸ Chaimantami Mandac Dios ñucata rimashpaca:

⁹ “Zorobabelmi ñucapac huasi callari rumitaca churarca. Paillatacmi tucuchinga. Chaita ricushpami, Mandac Diosllatac ñucataca cachashcata yachanguichic.

¹⁰ Cai huasita ruhuai callari punzhapi ‘Mana caipacmi’ niccunaca Zorobabel plomadata charicucta ricushpaca cushicungami” nirca. Chai quipaca angelca: “Chai canchis lamparacunaca Mandac Dios paipac ñahuihuan tucui cai pachata ricucuctami nisha nin” nirca» nirca.

¹¹ Ñuca ashtahuan tapushpaca: —Candeleropac ishcai ladopi, shucca alli ladoman, shucca lluqui ladoman shayacuc olivos yuracunaca, ¿imatatac nisha nin?— nircani.

¹² Cutinllatac tapushpaca: —Curi aceite shina llucshicuc ishcai curi tubo ladopi cac ishcai olivos ramacunaca, ¿imatatac nisha nin?— nircani.

¹³ Shina nicpimi angelca: —¿Manachu ima cacta yachangui?— nirca. Shina nicpimi ñucaca: —Ñuca mandaclla, mana yachanichu— nircani.

¹⁴ Shina nicpimi angelca: —Caicunaca tucui cai pachata Mandac Diospac ñaupapi, aceiteta cahuishca ishcai runacunatami nisha nin— nirca.