ZACARÍAS 3 - Dios Rimashcata Quillcashcami

Curacunata mandac Josuemanta

¹ Chai quipaca Josué Mandac Diospac angelpac ñaupapi shayacuctami ricurcani. Josuepac alli ladopica Satanasmi paita juchanchingapac shayacurca.

² Mandac Diosca: «Satanaslla, cantaca Mandac Dios ñucami rimani. Jerusalenta acllac Mandac Dios ñucallatacmi rimashpa llaquichini. ¿Manachu cai runaca mana tucui rupashca yanta shina?» nirca.

³ Josueca mapa churanata churarishcami angelpac ñaupapi shayacurca.

⁴ Chai angelca paipac ñaupapi shayacuccunata mandashpaca: «Chai mapa churanata llucchichic» nirca. Chai quipami Josuetaca: «Riqui, cambac juchacunata anchuchishpami sumac churanata churachini» nirca.

⁵ Chai quipaca: «Josuepac umapi chuya mitrata churachichic» nirca. Shina nicpimi, paicunaca chuya mitrata umapi churachishpa, sumac churanatapish churachirca. Mandac Diospac angelca shayacurcallatacmi.

⁶ Chai quipa Mandac Diospac ángel Josueta rimarishpaca:

⁷ «Tucuita Mandac Diosca: “Ñuca yachachishca shina causashpa, mandashcacunatapish punzhanta alli pactachishpaca, ñuca huasipi mandanguimi. Shinallatac ñuca huasi canzha pambatapish cuidangui. Chashna ruhuacpica, caipi shayacucpura shinatami cantaca ruhuasha.

⁸ Curacunata mandac Josuella, canpish, cambac ñaupapi tiyacuc cambac ricsishcacunapish alli uyaichic. Retoñashca ñucata servic shamunata ricuchiccunami canguichic.

⁹ Riquichic, Josuepac ñaupapimi canchis ñahuiyuc shuclla rumita churasha. Chai rumipica ñucami sellota churasha. Shuc punzhallami cai llactapi causaccunapac juchataca anchuchisha.

¹⁰ Chai punzhapica cancunaca shuctaccunata cayashpami, cancunapac uvas yuracuna, higo yuracuna ucupi tiyachinguichic. Caitaca tucuita Mandac Dios ñucami nini” ninmi» nirca