ZACARÍAS 14 - Dios Rimashcata Quillcashcami

Jerusalén shuctac llactacunata atinamanta

¹ Mandac Dios shamuna punzhami ña pactamun. Cancunamanta imata quichushcataca cancunapac chaupillapitacmi chaupinga.

² Mandac Diosmi Jerusalenpi causaccunahuan macanacuchun, shuctac llactacunamanta tandachimunga. Paicunami cai llactata quichushpa, huasicunapi ima charishcacunatapish quichuga. Huarmicunatapish, japirishpa llaquichingami. Cai llactapi causacpuramanta chaupica prezumi ringa. Ashtahuanpish chai puchushca gentecunallami caipica saquiringa.

³ Chai quipami Mandac Diosca jatun macanacuipi macanacuc shina, chai llaquichic llactacunahuan macanacungapac llucshinga.

⁴ Chai punzhami Mandac Diosca Jerusalén chimbapuramanta inti llucshina ladoman cac Olivos urcu jahuapi sarunga. Chashna sarucpimi, chai urcuca inti llucshina ladomanpish, inti tigrana ladomanpish chaupiringa. Shina chaupiricpimi, chai urcu chaupica jatun pugru pamba tucunga. Chaupi urcuca jahua ladoman, caishuc chaupi urcuca ura ladomanmi saquiringa.

⁵ Chai pugru pambaca Azal llactacamanmi canga. Cancunaca chai urcu chaupipi tiyac pugru pambapi miticugringuichic. Judá llactata jatun mandac Uzías mandacui punzhacunapi jatun allpa chucchucpi, miticugrishca shinami miticugringuichic. Chai quipami ñucata Mandac Diosca paipac angelcunahuan shamunga.

⁶ Chai punzhapica intipish, chiripish, casapish mana tiyangachu.

⁷ Chai punzhaca Mandac Diospac ricsishca punzhami canga. Chaipica tutapish, punzhapish mana tiyangachu. Ashtahuanpish punzha shinami tutaca canga.

⁸ Causaita cuc yacumi Jerusalenmantaca llucshinga. Chai yacuca tamya punzhacunapipish, usyai punzhacunapipish chaupica inti llucshina lado mama cuchaman, chaupica inti tigrana lado mama cuchamanmi ringa.

⁹ Mandac Diosmi tucui cai pachata jatun mandacca canga. Chai punzhapica Mandac Diosllami ricsishca canga. Paipac shutillami ricsishca canga.

¹⁰ Tucui llactami Geba llactamantaca Jerusalén ura ladoman tiyac Rimón llactacamanmi pugru pamba tucunga. Jerusalenca jahuapimi canga. Chai puebloca Benjaminpac pungumantaca punta pungucaman, pirca esquinapi tiyac pungucamanmi canga. Hananeelpac jatun torremantaca jatun mandacpac uvasta cutana pushtucunacamanmi causanga.

¹¹ Chaipimi causanga. Jerusalenca mana ashtahuan tucuchishcachu canga. Ashtahuanpish chaipica mana manchashpami cushilla causanga.

¹² Mandac Diosca Jerusalenpi causaccunahuan macanacuc gentecunataca cai ungüihuanmi llaquichinga. Paicuna causacucllapitacmi paicunapac aichaca ismunga. Ñahui murucunapish chaillapitacmi chaquinga. Callupish shimillapitacmi tucuringa.

¹³ Chai punzhapica Mandac Diosllatac yallita manchachicpimi, paicunapurallatac mancharinga. Ricsishcapurallatac maquipura japinacushpa macanacunga.

¹⁴ Judá llactapi causaccunapish Jerusalenpimi macanacunga. Chai muyundi llactacunapi causaccunapac sumac charishca curita, cullquita, churanacunatami chaipi achcata tandachinga.

¹⁵ Chai runacunapac ungüillatacmi caballocunatapish, mulacunatapish, camellocunatapish, burrocunatapish carpa huasicunapi tiyac animalcunatapish japinga.

¹⁶ Jerusalenpi causaccunahuan macanacungapac ric llactacunamanta saquirishca gentecunaca Jatun Mandacta, tucuita Mandac Diosta mañangapac, ramacunahuan chucllata ruhuana fiestata ruhuangapacmi cada huata huichai shamunga.

¹⁷ Cai pacha familiacunamanta maijan Jatun Mandacta, tucuita Mandac Diosta Jerusalenpi mañangapac mana shamucpica, paicunapac llactapi mana tamyangachu.

¹⁸ Egiptomanta maijan familia Jerusalenman mana shamucpica, paicunapac llactapica mana tamyangachu. Mandac Diosca ramacunahuan chucllata ruhuana fiestata ruhuangapac mana shamuc gentecunapac llactacunataca jatun ungüihuanmi llaquichinga.

¹⁹ Chashnami Egiptopi causaccunatapish, ramacunahuan chucllata ruhuana fiestaman mana shamuc llactacunataca llaquichinga.

²⁰ Chai punzhapica caballocunapi churashca campanillapica: «Mandac Diospac chicanyachishcami» nishpa quillcashcami canga. Chaitami aparishca puringa. Diospac huasipi tiyac mangacunapish altar ladopi tiyacuc jatun lavacaracuna shinallatacmi canga.

²¹ Jerusalenpi, Judá llacta mangacunapish Mandac Diospac chicanyachishcami canga. Diosman animalta cushpa huañuchiccunaca chai mangacunata japishpami, chaipi yanunga. Chai punzhapica tucuita Mandac Diospac huasipica randicpish, catucpish mana ashtahuan tiyangachu.