ZACARÍAS 13 - Dios Rimashcata Quillcashcami

¹ Chai punzhapica Davidpac huahuacunapish, Jerusalenpi causaccunapish tucyacuc yacutami charinga. Chaihuanmi juchata ruhuashpa mapayashcataca chuyayanga.

² Tucuita Mandac Diosca: «Chai punzhapica cai llactapi tiyac ruhuashcalla dioscunapac shuticunataca tucuitami anchuchisha. Chai dioscunataca mana ashtahuan yuyaringacunachu. Llulla huillaccunatapish, mapayachic espiritutapish cai llactamanta anchuchishami.

³ Maijanpish huillasha nicpica, paipac taita mamallatacmi: “¡Mandac Diospac shutipimi llullashpa huillashcamantaca mana causanguichu!” ninga. Shina nishpami, paipac taita mamallatac tucsishpa huañuchinga.

⁴ Chai punzhapica muscuipi shina ricushcata llullashpa huillaccunaca pingaichishcami canga. Paicuna millmayuc churanacunata churarishpa llullanaca tucuringami.

⁵ Chaimantami paicunapuramanta cada shuc: “Ñucaca mana huillacchu cani, allpapi trabajashpa causacmi cani. Ñucaca huambramanta pachami allpapi trabajashpa causani” ninga.

⁶ Shina nicpipish, maijancunaca paitaca: “¿Imamantatac cuerpopi chugrircangui?” ninga. Shina nicpica paica: “Ñuca ricsiccunapac huasipimi chugrichirca” ninga» ninmi.

Mandac Diospac michicta chugrichinamanta

⁷ Tucuita Mandac Diosca: «¡Espadalla, michictapish, ñuca ricsiccunatapish llaquichingapac jatariyari! Chai michicta can chugrichicpi, ovejacuna caita chaita ricpica, ñucami huahua ovejacunata llaquichisha.

⁸ Cai llactapi causaccunaca quimsa partepi chicanyachishcaca caillapitacmi huañushpa chingaringa. Ashtahuanpish caishuc quimsa partepi chicanyachishcallami puchunga.

⁹ Chai quimsa partepi chicanyachishcataca ninapi churashpami ricusha. Cullquita yacuyachic shinami yacuyachisha. Ninapi churashpa alli curita ricuc shinami ricusha. Shina ruhuacpimi, paicunaca ñuca shutita mañanga. Paicuna mañashcata ñuca uyashpaca: “Ñuca acllashcacunami canguichic” nishami. Cutin paicunaca: “Ñucanchicta Mandac Diosmi cangui” ningami» ninmi.