ZACARÍAS 12 - Dios Rimashcata Quillcashcami

Jerusalenpi causaccunata quishpichinamanta

¹ Mandac Diosca israelcuna ima tucunamantami huillan. Jahua pachatapish, cai pachatapish ruhuac, runamanpish samaita cuc Mandac Diosca:

² «Ñucami Jerusalenpi causaccunataca muyundipi causaccunapac vino copata shina ruhuasha. Paicunami Judá llacta muyundipi causac paicunata piñaccunataca chucchuchinga. Jerusalenta piñaccuna muyunacushpa shayacuc punzhami chashnaca ruhuanga.

³ Chai punzhapica Jerusalentaca muyundi llactacunapi causaccunapac llashac jatun rumi shinatami ruhuasha. Chai rumita alzasha niccunaca tucuimi ñuturinga. Tucui cai pacha llactacunamantami paita llaquichingapac tandanacunga.

⁴ Chai punzhapica tucui caballocunata yallita manchachishpami, caballopi ric soldadocunaca loco shinata ruhuasha. Ñucaca Judá llactapi causaccunataca cuidashami. Tucui shuctac llacta caballocunataca ñahui mana ricuctami ruhuasha.

⁵ Judá llacta soldadocunata mandaccunaca paicunapac shungupica: “¡Jerusalenpi causaccunaca tucuita Mandac Diosmantami fuerzata charin!” ninga.

⁶ Chai punzhapica Judá llacta mandaccunataca ninapi churana fierrota shinata, trigo chagra chaupipi antorcha japiricuc shinatami ruhuasha. Shina ruhuacpimi, muyundi llactacunataca alli ladopi causaccunatapish, lluqui ladopi causaccunatapish tucuchinga. Ashtahuanpish Jerusalenpi causaccunaca paicuna causashcallapitacmi causacunga.

⁷ Mandac Dios ñucaca Davidpac huasi ucupuracunapish, Jerusalenpi causaccunapish ama Judá aillupac ñaupapi jatun tucuchunmi Judá aillupac carpa huasicunatarac quishpichisha.

⁸ Chai punzhapica Mandac Dios ñucami Jerusalenpi causaccunataca cuidasha. Chaimantami paicunapuramanta maijan fuerza illacca jatun mandac David shina sinchi canga. Cutin Davidpac huahuapuramantaca Dios shina, Mandac Dios ñucapac ángel shinami, paicunapac ñaupapica canga.

⁹ Chai punzhapica Jerusalenta llaquichingapac shamuc llactacunataca tucui tucuchishami.

¹⁰ Davidpac huahuapuramanpish, Jerusalenpi causaccunamanpish cuyac shunguta, shinallatac ñucata mañana yuyaitami yallita cusha. Shina cucpimi, paicunaca ñucata chugrichic shina llaquichishcata ricunga. Chaimantami shuclla churi huañushcamanta shina, punta churi huañushcamanta shina, yallita llaquirishpa huacanga.

¹¹ Chai punzhapica Jerusalenpi causaccunaca Meguido pambapi Hadad-rimón diosmanta huacashca shinami, yallita huacanga.

¹² Cai llactapica cada aillumi chican chican tucushpa huacanga. Davidpac huahuapuracunaca caripura tucushpa, huarmicunaca huarmipura tucushpami huacanga.

¹³ Levipac huahuacunaca caricunaca caripura tucushpa, huarmicunaca huarmipura tucushpami huacanga. Simeipac aillucunapish caricunapura tucushpa, huarmicunaca huarmipura tucushpami huacanga.

¹⁴ Tucui caishuc huahuacunapish caricunapura tucushpa, huarmicunapish huarmipura tucushpami huacanga» ninmi.