ZACARÍAS 11 - Dios Rimashcata Quillcashcami

¹ ¡Líbano urculla, cambac cedro yuracunata nina tucuchichun, pungucunata pascaiyari!

² Ciprés yuralla, cedro yura urmashcamanta, jatun yuracuna urmashcamanta huacaiyari. Basán llactapi encina yuracunapish caparishpa huacaichicyari. Quichqui yuracunaca urmashcami.

³ Sumac pambacuna tucurishcamanta, michiccuna caparishpa huacashcami uyarin. Huahua leoncunapish, Jordán yacu ladopi tiyac sachacuna tucurishcamanta huahua leoncuna sinchita huacashcami uyarin.

Ishcai michiccunamanta

⁴ Ñucata Mandac Diosca: «Huañuchina ovejacunata michi.

⁵ Chai ovejacunata randiccunaca mana llaquishpami huañuchinga. Cutin catuccuna catushpaca: “Chayucyashcanimi, chaimanta Mandac Diosca alli nishca cachun” nicunmi. Michiccunapish mana llaquinchu.

⁶ Ñucapish cai llactapi causaccunataca mana ashtahuan llaquishachu. Ñucallatacmi shuctac gentecunapac maquipi, jatun mandacpac maquipi churasha. Paicunata tucuchishpa, llactata chushaclla saquicucpipish, paicunapac maquimantaca mana cacharichishachu» nirca.

⁷ Chaimantami randiccuna huañuchina ovejacuna shina, ovejacunata michicurcani. Michingapacca ishcai tauna caspitami japircani. Shuc taunataca Cuyai, caishuctaca Tandanacuitami shutichircani. Shinami chai ovejacunata michicurcani.

⁸ Shuc quillallapimi quimsa michiccunata tucuchircani. Ñuca shungupish paicunata mana ricunayachircachu. Paicunapac shungupish ñucata mana ricunayachircachu.

⁹ Chaimantami ñucaca: «Mana ashtahuan michishachu. ¡Maijanpish huañucca, huañungachari! ¡Maijanpish chingaricca, chingaringachari! ¡Maijanpish saquiricca, paicunapurallatac tucurinacungachari!» nircani.

¹⁰ Chaimantami ñuca tucui llactacunapi causaccunahuan ari nishcata paquingapac, chai Cuyai shuti taunata paquircani.

¹¹ Chai punzhami ari nishcata pactachinaca tucurirca. Chashna paquicpimi, ovejacunata randic ñucata ricushpa shayacuccunaca Mandac Diospac rimashcata yachac chayarca.

¹² Chaimantami ñucaca paicunataca: «Cancuna munashpaca, ñuca trabajashcamanta pagaichic, mana cashpaca saquichiclla» nircani. Shina nicpimi, paicunaca quimsa chunga cullquita pezashpa pagarca.

¹³ Chaimantami Mandac Diosca: «Chaitaca ñuca huasipi tiyac cullquita huacaichinapi churai. ¡Yalli valishca cullquipimi ñucataca catucurca!» nirca. Shina nicpimi, chai quimsa chunga cullquita japishpa, Mandac Diospac huasipi tiyac cullquita huacaichinapi churarcani.

¹⁴ Chai quipaca israelcunahuan, Judá llactapi causaccunahuan apanacuita tucuchingapacmi, Tandanacui shuti caishuc taunatapish paquircani.

¹⁵ Chashna ruhuacpimi, Mandac Diosca: «Cunanca, yuyai illac michic ima shina cashcata ricuchi.

¹⁶ Chaica, cai llactapica chingarishca ovejacunatapish mana llaquic, huahua ovejacunatapish mana mashcac, suchu ovejacunatapish mana jambic michictami churagrini. Paica huira ovejacunataca shillullatapish mana saquishpami tucui micunga.

¹⁷ ¡Aij, manada ovejacunata shitac, mana vali michiclla! Paipac rigratapish, alli lado ñahuitapish, espadahuan chugrichichun. Paipac rigrapish tucui chaquichun. Alli lado ñahuipish amsayachun» nirca.