SANTIAGO 3 - Dios Rimashcata Quillcashcami

Maipish cachun mana rimanamanta

¹ Ñuca cuyashca criccuna, ama taucacuna Diosmanta yachachiccuna tucushunchic. Diosca ñucanchictami tucuimanta yallica ashtahuan taripanga.

² Tucuimi tauca cutin imapipish pandarinchic. Maijan imata rimashpa mana pandaricca, mana juchanchipac alli runami. Chashnaca, paipac cuerpotapish ima mana allimantaca jarcarinmi.

³ Caballopi maiman ringapacca, shimipimi frenota churanchic. Shina churashpaca, ñucanchic maiman risha nicushcamanmi apanchic.

⁴ Chashnallatac shuc barco jatun cacpipish, huaira yallita jatarishpaca, maiman cashpapish apanllami. Chashna cacpipish barcota purichic runaca, shuc uchilla caspillahuanmi maiman cashpapish apanlla.

⁵ Chai shinallatacmi calluca ñucanchic cuerpopi uchilla cashpapish, imatapish rimashpaca, yallita llaquichinlla. Shinallatac ninapish pitillamanta mirarishpaca, mashna jatun sachacunatapish tucui rupachinllami.

⁶ Calluca shuc nina shinami millaita callarichichishpa runata mapayachin. Calluca ucu pacha nina rupacuc shinami, tucui causaipi mana allita ruhuachishpa rupachic shina llaquichicun.

⁷ Gentecunaca sachapi causac, volashpa puric, allpata aisarishpa puric, yacupi causac animalcunatapish mansoyachi pudinmi.

⁸ Shina cashpapish callutaca pipish mana jarcai pudinchu. Calluca pipish mana jarcaipac huañuchic veneno shina jundami can.

⁹ Chai callullahuantacmi Diostapish allimari cangui ninchic, shinallatac Dios pai shina ruhuashca gentecunatapish, imapish tucushca canman ninchic.

¹⁰ Chaillamantatacmi alli shimicunapish mana alli shimicunapish llucshin. Ñuca cuyashca criccuna, chaica mana chashnachu cana can.

¹¹ Mishqui yacupish, jayac yacupish chaillamantatacca mana tucyanchu.

¹² Ñuca cuyashca criccuna, higo yuraca olivos murutaca mana pucunchu. Uvas yurapish higotaca mana pucunchu. Chashnallatacmi cachi yacupish, mishqui yacupish chaillamantacca mana tucyan.

Dios alli yuyaita cuc cashcamanta

¹³ Cancunapuramanta maijan alli yachac, yuyaisapa cashpaca, imatapish allita ruhuashpa, mana piñaric alli shungu tucushpa, yachac cashcataca ricuchichic.

¹⁴ Shina cashpapish shuccuna shina casha nishpa shungupi canirishpa, quiquinlla imata ruhuashpaca ama ñucaca yachacmi cani nichicchu, shinallatac, cashcata nic huillashcatapish mana cazucunguichicchu.

¹⁵ Chai shina yachac canaca mana Diosmantachu shamun, ashtahuanpish cai pacha gentecuna yuyashcallamanta shinallatac diablomantami shamun.

¹⁶ Shuccuna shina casha nishpa, quiquinlla imatapish ruhuana yuyaicuna tiyacpimi tucuilaya mana allicuna shinallatac imapish maipipish cachun ruhuarin.

¹⁷ Ashtahuanpish Dios cushca yachaita chariccunaca ima millaita mana ruhuashpami sumacta causanata munancuna. Paicunaca alli shungucuna, mana piñariccuna, llaquiccuna, pimanpish mana tucuccuna, imatapish mana huashalla rimaccuna ashtahuanpish allitac ruhuaccunami can.

¹⁸ Maijanpish sumac causaita causachun munaccunaca, allita tarpushpa tandac shinami, cashcata ruhuashpa causanata japingacuna.