SANTIAGO 2 - Dios Rimashcata Quillcashcami

Pitapish mana chicanyachinamanta

¹ Ñuca cuyashca criccuna, cancunaca ñucanchic sumaimana Apunchic Jesucristota criccuna cashcamantaca, shucllata allipi llucchishpa mana chicanta ruhuanachu canguichic.

² Cancunapac tandanacuimanca shuc curi sortejas churashca, sumac churanahuan yaicungachari. Shinallatac shuc huaccha, mauca churanahuan yaicungachari.

³ Chai sumac churanahuan cac runa yaicucpica, alli chasquishpami: «Caipi tiyarinapi» nishpa, alli tiyarinapi tiyachinguichicman. Cutin caishuc huaccha runataca: «Canca caillapi shayari, mana cashpaca pambapi tiyari» ninguichicmanmi.

⁴ Chai shina ruhuashpaca cancunapurallatac chicanyachishpami mana alli yuyaicunahuan ruhuacunguichic.

⁵ Ñuca cuyashca criccuna: Diosca cai pachapi imata mana chariccunataca, crishcahuan chayuc tucuchun, Dios maipi mandacucpi paita cuyaccuna Pai cusha nishcata japichunmi, chashnaca acllarca.

⁶ Shina cacpipish cancunaca huacchami nishpami, paicunataca yangapi churanguichic. Cancunata llaquichishpa, juezpacman apaccunaca, ¿manachu chayuccuna can?

⁷ ¿Manachu paicunallatac cancuna alli nina shutitapish mana allichu nishpa rimancuna?

⁸ Tucuimanta yalli mandashcata pactachishpaca, allitami ruhuanguichic. Dios quillcachishcapica: “Can quiquinllatac ima shinami cuyaringui, chai shinallatac shuccunatapish cuyangui” ninmi.

⁹ Ashtahuanpish shucllata allipi llucchishpa chicanyachishpaca cancunallatacmi juchallinguichic. Dios mandashcata mana cazushcamantaca, juchanchishcami canguichic.

¹⁰ Maijanpish tucui mandashcacunata pactachicushpa, shuc mandashcallata mana pactachishpaca, tucui mandashcata mana pactachishca shinallatacmi tucun.

¹¹ Diosllatacmi: «Ama huaclliringui» shinallatac «ama huañuchingui» nirca. Shina cashcamanta maijan mana huainayashpapish, cutin huañuchishpaca, ñami mandashcata paquishca.

¹² Ñucanchicta huatashca shinamanta cacharichic mandashcapi nishca shinami, Diosca taripanga. Shina cashcamanta imatapish allita rimaichic, allita ruhuaichic.

¹³ Shuccunata mana llaquiccunataca, paicunatapish mana llaquishpami, Diosca taripashpa llaquichinga. Ashtahuanpish shuccunata llaquiccunataca, taripana punzhapica alli ningami.

Crishpaca, imata ruhuashpatac ricuchina cashcamanta

¹⁴ Ñuca cuyashca criccuna, cricmi cani nishpapish, imapish allicunata mana ruhuashpaca, ¿ima allitac cangayari? Cricmi cani nishpallaca, ¿paica quishpiringachu?

¹⁵ Cric pani cashpa, cric huauqui cashpa, churana illac, micuna illac causacungachari.

¹⁶ Chaita ricushpapish, maijan cancunapuramanta ima illashcata mana cushpa: «Allilla ringui, alli churaringui, alli micungui» nishpaca, ¿ima allitac cangayari?

¹⁷ Chai shinallatacmi crishpapish, ima allita mana ruhuacpica, huañushca shinallatac can.

¹⁸ Ashtahuanpish maijanca: «Canca cricmi cangui, cutin ñucaca allicunata ruhuacmi cani» ningachari. Chashna nictaca: «Ima allita mana ruhuashpa, can crishcata ricuchiyari, cutin ñucaca imatapish allita ruhuashpa, cric cashcataca ricuchisha» ninimi.

¹⁹ Canca shuclla Dios tiyashcatami cringui. Shina crishpaca, allitami ruhuangui. Supaicunapish crincunami, shinallatac manchaihuanmi chucchuncuna.

²⁰ Ama upa shina caichu. Can crishpapish, ima allita mana ruhuashpaca, huañushca shinallatacmi cangui.

²¹ Ñucanchic ñaupa taita Abrahamtaca, paipac churi Isaacta huañuchingapac Diosman cushcamantami, Diosca cashcata ruhuacmi nishpa chasquirca.

²² Chashnami crishcaca imatapish allita ruhuashcahuan pacta can. Pai crishpa allita ruhuacpimi, ashtahuan alli cashcata ricunchic.

²³ Chashnami Dios quillcachishcapi: «Abrahamca Diosta crircami. Chashna crishcamantami Diosca paihuan alli tucuchun chasquirca» ninmi. Chaimantami Abrahamtaca Diosca «ñucahuan apanacucmi cangui» nishca pactarca.

²⁴ Diosca crishcallamanta mana chasquishcata, ashtahuanpish allita ruhuashcamantapish chasquishcatami ricunguichic.

²⁵ Chai shinallatacmi huainayashpa causac Rahabtapish, chai llactata pacalla ricungapac shamuccunata huasipi chasquishpa shuc ñanta cachashcamanta, Diosca “cashcata ruhuacmi” nishpa chasquirca.

²⁶ Shinashpaca ima shinami shuc cuerpo alma illaclla huañushca can, chai shinallatacmi crishcapish ima allita mana ruhuashpaca, huañushca shina can.