SANTIAGO 1 - Dios Rimashcata Quillcashcami

Santiago saludashpa quillcashcamanta

¹ Ñucaca Diospacta, Apunchic Jesucristopacta ruhuac Santiagomi cani. Israelpac chunga ishcai aillucuna shic-huarishpa, caipi chaipi causaccunatami “allillachu canguichic” nishpa, quillcani.

Llaquicuna japicpipish cushicuna cashcamanta

² Ñuca cuyashca criccuna, cancunata ima llaquicuna japicpica, achcata cushicunguichic.

³ Cancuna cric cashcamanta ima llaqui japicpica, mana piñarishpa, alli shunguhuan llaquicunata apana cashcataca cancunallatacmi yachanguichic.

⁴ Ashtahuanpish tucuimanta yallica mana piñarishpa, alli shunguyuc canata yuyaichic. Chashna cashpami alli sinchiyashpa, imapish mana illac, alli criccuna canguichic.

⁵ Cancunapuramanta maijanpish yachaita mana charishpaca, Diosta mañaichic, paica cungallami. Diosca pimanpish mana misarishpami, tucui mañaccunamanca achcata cunga.

⁶ Ashtahuanpish cancuna mañashpaca, crishpami, japina yuyailla mañana canguichic. Maijanpish jahua shungulla mañacca, cucha yacu huairahuan caiman chaiman cuyucuc shinallami can.

⁷ Maijanpish chashna mañacca Mandac Diosmanta imata japina cashcata ama yuyachun.

⁸ Chashna mana shuc yuyailla cac runaca tucui causaipimi mana alli causan.

⁹ Maijan cric imata mana charishpapish, Dios jatunyachina cashcamantaca cushillami cana can.

¹⁰ Shinallatac chayucpish Dios yangallata ruhuacpica cushillami cana can. Chayucca quihua sisa chaquiric shinami tucunga.

¹¹ Yuraca inti llucshishpa, nina rupaihuan chaquichicpica, sisaca urmanmi, pai sumac cashcaca chingarinmi. Chai shinallatacmi chayucpish, paipac randina, catunapica chingarin.

Mana alli munaicuna shamucpi, mishana cashcamanta

¹² Imapish millai munaicuna shamucpi, chaita mishacca mai cushillami can. Chashna mishacmi Dios paita cuyaccunaman cusha nishca causaita cuc coronata japinga.

¹³ Maijantapish mana alli ruhuana munaicuna japicpica, “Diosmi chai munaitaca cun” nishpa, ama yuyachun. Diosca jaicapi mana allitaca mana ruhuanchu. Ima mana allicunata ruhuachunpish millai yuyaitaca mana cunchu.

¹⁴ Ashtahuanpish quiquinllapitac mana alli munaicuna tiyashcamantami, mishquilliric shina, mana allita ruhuanaman pushan.

¹⁵ Chai shina mana alli munaicunamantami, juchaca chichushca shina tucushpa huacharin. Chai juchata ruhuacpica huañuimanmi apan.

¹⁶ Ñuca cuyashca criccuna, ama pandarichicchu.

¹⁷ Jahua pachapi sumac achiccunata ruhuac Diosmantami, ima allita ruhuana yuyaipish, cashcata ruhuana yuyaipish shamun. Paica mana shuctacyanchu, llandu shinapish mana tucunchu.

¹⁸ Diosca chai shina munashcamantami, cashcata nic alli huillaita huillashpa, ñucanchicmanca causaita curca. Tucui pai ruhuashcacunamanta ñucanchic punta cachunmi, chashnaca ruhuarca.

Alli huillaita huillashcata pactachina cashcamanta

¹⁹ Ñuca cuyashca criccuna, imapish uyanallataca alli uyaichic. Rimaringapacpish, piñaringapacpish jarcariccuna caichic.

²⁰ Pipish piñaricca, Dios munashcataca mana ruhuanchu.

²¹ Chashna cashcamanta tucui mapamanta, shinallatac tucui mana allicunamanta anchurishpa, cancunapac shungupi tarpushca alli huillaitaca cuyac shunguhuan chasquichic. Chai alli huillaimi cancunataca quishpichinata pudin.

²² Dios rimashcacunataca ama uyaccunalla caichicchu, pactachiccunatac caichic. Chashna uyaccunalla cashpaca, cancunallatacmi pandaringuichic.

²³ Maijanpish Dios rimashcata uyashpa mana pactachicca, paipac ñahuita espejopi ricuric shinallami.

²⁴ Espejopi ricurishpa, anchurishpaca, pai ima shina cashcataca cungarinmi.

²⁵ Ashtahuanpish huatashca shina cashcamanta cacharichic, Dios mandashpa rimashca shimita uyashpa, mana cungarishpa, shungupi huacaichicca imata ruhuashpapish cushicungami.

²⁶ Maijanpish “ñucaca Diosta alli cricmi cani” nishpapish, paipac calluta mana jarcaricca paillatacmi pandaricun. Pai “alli cricmi cani” nishcaca, yangallami can.

²⁷ Diospac ñaupapi mapa illac, Diosta alli cricmi cani ninaca, llaquipi cac viuda huarmicunatapish, taita mama illaclla cac huahuacunatapish ayudanami can. Shinallatac cai pachapi tiyac imapish mana allicunamanta huacaichirinami can.