SALMOS 99 - Dios Rimashcata Quillcashcami

Mandac Dios israelcunaman tucuita pactachishcamanta

¹ ¡Mandac Diosmi mandacun, tucui gentecunaca chucchungami! Paipac mandanaca querubincunapac jahuapimi. Tucui cai pachami cuyuringa.

² Mandac Diosca Sionpica jatunmi. Tucui gentecunata yalli jatunmari.

³ Manchana paipac jatun shutitaca alabaichicyari. ¡Paica jucha illacmi!

⁴ Tucuita ruhuac Jatun Mandaclla, canca cashcata ricushpami mandangui. Cashcata ruhuanataca canmi callarichircangui. Canmi Jacobopac huahua huahuapurapica allita ricushpa mandashpa, imatapish cashcata ruhuacungui.

⁵ ¡Ñucanchicta Mandac Diostaca jatunyachichicyari! Pai jucha illac cashcamantaca paipac chaqui ñaupapi cumurichicyari.

⁶ Moisespish, Aaronpish paipac curacunapurami carca. Samuelpish paita mañaccunapurallatacmi carca. Paicuna mañashcataca Mandac Diosca uyacmi carca.

⁷ Diosca suniclla puyumantami paicunahuanca parlac carca. Paicunaca ima shina causanata yachachishcatapish, quillcashpa mandashcacunatapish cazushpami causarcacuna.

⁸ Ñucanchicta Mandac Dioslla, canmi paicuna mañashcataca cutichic carcangui. Paicuna mana allita ruhuashcataca perdonacmi carcangui. Shina cashpapish paicuna millaita ruhuashcamantaca llaquichicmi carcangui.

⁹ ¡Ñucanchicta Mandac Diostaca jatunyachichicyari! Ñucanchicta Mandac Dios jucha illac cashcamantaca paipaclla urcu ñaupapi cumurichicyari.