SALMOS 98 - Dios Rimashcata Quillcashcami

Dios israelcunata mishachicpi cantashcamanta

Caica Salmomi.

¹ ¡Mandac Diostaca jatun mancharinacunata ruhuashcamanta mushuc cantohuan cantaichicyari! Paipac alli maquihuan, jucha illac rigrahuanmi mishachirca.

² Mandac Diosca tucui llactapi causaccunapac ñaupapimi mishachic cashcata, cashcata ruhuac cashcata ricuchishca.

³ Israelcunata llaquishcatapish, pai nishcata pactachic cashcatapish mana cungarishcachu. Tucui cai pacha muyundipi causaccunami ñucanchic Dios mishachic cashcataca ricushca.

⁴ ¡Tucui cai pachapi causaccuna Mandac Diosta cushicushpa cantaichicyari! ¡Sinchita caparishpa, maquita huactashpa salmocunata cantaichicyari!

⁵ Mandac Diostaca arpapi tocashpa salmocunahuan cantaichicyari. Cuerdayuc shuc tocanacunahuanpish sumacta cantaichicyari.

⁶ Trompetacunapi, bocinapi tocashpa, jatun Mandac Diospac ñaupapi caparishpa cantaichicyari.

⁷ Mama cuchapish, chaipi imalla tiyaccunapish yallita huaj nichicyari. Cai pachapish, chaipi causaccunapish yallita caparichicyari.

⁸ Jatun yacucunapish maquita huactac shina cushicuichicyari. Urcucunapish tucui mashna cushicuichicyari.

⁹ Chashna cai pachapi causaccunata taripangapac shamuc Mandac Diospac ñaupapi cushicuichicyari. Tucui cai pachapi causaccunataca cashcata ruhuashpami taripanga. Shuctac gentecunataca cashcata nishpami mandanga.