SALMOS 96 - Dios Rimashcata Quillcashcami

Mandac Diosta jatunyachishpa cantanamanta

¹ ¡Mandac Diostaca mushuc cantohuan cantaichic! ¡Mandac Diostaca tucui cai pachapi causaccuna cantaichicyari!

² ¡Mandac Diosta cantashpa paipac shutita alli nichicyari! Pai quishpichic cashcataca punzhanta huillaichicyari.

³ Pai sumaimana cashcataca tucui llactacunapi huillaichic. Pai mancharinacunata ruhuashcataca shuctac gentecunaman parlaichicyari.

⁴ Mandac Diosca jatunmi. Tucuimanta yalli alabana Diosmi. Tucui dioscunamanta yalli manchana Diosmi.

⁵ Shuctac gentecunapac dioscunaca yangalla dioscunami. Ashtahuanpish Mandac Diosmi jahua pachataca ruhuarca.

⁶ Sumaimana achic nicucmi cambac ñaupapica tiyan. Cambac huasipica sumac podermi tiyan.

⁷ Tucui gentecuna Mandac Diostaca sumaimanami cangui, tucuita ruhuacmi cangui nichic.

⁸ Mandac Diostaca paipac shutita alli nina cashcamanta sumaimanami cangui nichic. Paiman ofrendata apashpa, paipac huasi canzha pambaman shamuichic.

⁹ Mandac Diostaca sumaimana jucha illac cashcamanta alabaichic. Paipac ñaupapica tucui cai pachapi causaccuna chucchuichic.

¹⁰ Tucui llactapi causaccunaman huillashpaca: «¡Mandac Diosca mandacunmi!» nichicyari. Paimi cai pachataca pi mana cuyuchipacta sinchita ruhuarca. Paimi tucui gentecunataca cashcata ruhuashpa taripanga.

¹¹ ¡Jahua pachapish, cai pachapi causaccunapish cushicuichicyari! Mama cuchapish, chaipi tiyaccunapish cushicushpa huac nishpa uyarichic.

¹² ¡Pambacunapish, chaipi tucui tiyaccunapish cushicuichic! ¡Sachacunapi tiyac yuracunapish cushicuichic!

¹³ Chashna cai pachapi causaccunata taripangapac shamuc Mandac Diospac ñaupapi cushicuichicyari. Tucui cai pachapi causaccunataca cashcata ruhuashpami taripanga. Shuctac gentecunataca cashcata nishpami mandanga.