SALMOS 95 - Dios Rimashcata Quillcashcami

Diosta alli nishpa cantashcamanta

¹ ¡Mandac Diosta cushicushpa cantangapac shamuichic! Ñucanchic quishpichic jatun rumitaca yallita cushicushpa cantashunchic.

² Paita pagui ningapac paipac ñaupaman cuchuyashunchic. Salmocunahuan caparishpa cantashunchicyari.

³ Mandac Diosca jatun Diosmi. Tucui dioscunamanta ashtahuan jatun Mandac Diosmi.

⁴ Allpa ucupi ima tiyaccunapish, jatun urcucunapish paipac maquipimi. Tucui caicunaca paipacmi.

⁵ Mama cuchapish paipacmi. Paimi yacutapish, chaquishca allpatapish paipac maquihuan ruhuarca.

⁶ ¡Paita jatunyachishpa, paipac ñaupapi cumuringapac shamuichic! Ñucanchicta ruhuac Mandac Diospac ñaupapi cungurishunchic.

⁷ Paica ñucanchic Diosmi. Ñucanchicca pai acllashcacuna, paipac michina pambapi micuc ovejacunami canchic. Ashtahuanpish cunan pai rimashcata uyashpaca:

⁸ «Meriba pambapi ruhuashca shina, shitashca pamba Masapi ruhuashca punzhacuna shina ama cancunapish rumi shungu tucuichicchu.

⁹ Chaipica cancunapac taitacunami ñuca imallata ruhuashcata ricushca jahuapish caita chaita ruhuai nircacuna.

¹⁰ Chaimantami paicunahuanca chuscu chunga huatata piñarishca carcani. Paicunataca: “Cai gentecunaca pandata yuyashpami, ñuca mandashcacunataca mana yachashun” nircacuna.

¹¹ Chashna yallimana piñarishpami ñuca samachina llactapica manatac yaicungacunachu nircani» nirca.