SALMOS 94 - Dios Rimashcata Quillcashcami

Diosca cashcata ruhuac juez cashcamanta

¹ Mandac Dioslla, ima shina llaquichishca shinallatac llaquichic Diosmi cangui. Ima shina llaquichishca shinallatac llaquichishpa ricuchiyari.

² Canmi cai pachapi causaccunapac juez cangui. Jatun tucushcacunataca paicuna ima shina ruhuashca shinallatac llaquichiyari.

³ Mandac Dioslla, ¿ima horascamantac canta mana manchaccuna cushicungayari? ¿Ima horascamantac chashna cachun saquinguiyari?

⁴ Paicunaca millaita ruhuaccunami. Capariccuna, jatun tucushcacunami. ¿Maicamantac millaita ruhuashpa cushicuchun saquinguiyari?

⁵ Mandac Dioslla, paicunaca cambac gentecunatami llaquichincuna. Cambaclla acllashcacunatami ñacachincuna.

⁶ Viuda huarmicunata, shuctac llactamanta caccunatami huañuchincuna. Taita mama illac huahuacunatami tucuchincuna.

⁷ Chashna ruhuashpaca: «Mandac Diosca mana ricunchu. Jacobopac Diosca mana yachanchu» nincunami.

⁸ Mana entendic gentecuna entendichiyari. ¿Ima horastac yuyaita japigringuichicyari?

⁹ Ringrita ruhuac Diosca, ¿manachu uyanga? Ñahuita ruhuac Diosca, ¿manachu ricunga?

¹⁰ Llactacunapi causaccunata llaquichicca, ¿manachu sinchita rimashpa entendichinga? Gentecunata allita yachachicca, ¿manachu imata yachanga?

¹¹ Mandac Diosca, gentecunapac yuyai yangalla cashcata yachanmi.

¹² Mandac Dioslla, can cunashca, cambac mandashcacunata yachachishca causac runaca mai cushimi can.

¹³ Chaica llaqui punzhacunapi samachingapacmi chashnaca yachachingui. Ashtahuanpish canta mana manchaccunamanca jutcutami ruhuacungui.

¹⁴ Mandac Diosca paipac gentecunataca mana saquingachu. Paipaclla causaccunataca manatac cungaringachu.

¹⁵ Ashtahuanpish mandaccunaca cashcatami ruhuai callaringa. Shungupi ima millai yuyaita mana chariccunaca chaitami catingacuna.

¹⁶ Millaita ruhuaccunahuan shayaringapacca ¿pitac ñucataca ayudangayari? Mana allita ruhuaccunahuan shayaringapacca ¿pitac ñuca parte tucungayari?

¹⁷ Mandac Dios mana ayudashca cacpica, utcami huañushpa chunlla siricuiman carcani.

¹⁸ Ñuca: «Mandac Dioslla, ñuca chaquica lluchcaricunmi» nicpica, canmi llaquishpa charic carcangui.

¹⁹ Ñuca caita chaita yuyashpa musparicucpica, canmi ñuca almata cushichic carcangui.

²⁰ ¿Millaita ruhuangapac tandanacushpa yuyarinacuc millai jatun mandaccunahuan tandanacunguichu?

²¹ Paicunaca cashcata ruhuacta huañuchingapac yuyarinacushpami, manapish faltayuc runata huañuchincuna.

²² Shina cacpipish Mandac Diosmi ñuca miticunaca. Ñucapac miticuna jatun rumimi. Paipimi ñucaca shunguta churani.

²³ Paimi, paicuna millaita ruhuashcamantaca paicuna ima shina ruhuashca shinallatac llaquichinga. Paicuna millaita ruhuashcamantami chingachinga. Ñucanchicta Mandac Diosmi tucuchinga.