SALMOS 93 - Dios Rimashcata Quillcashcami

Mandac Dios jatun Mandac cashcamanta

¹ ¡Mandac Diosmi tucuita mandacun! Paica sumac achiclla churana churarishcami. Paica tucuita ruhuac cashcahuanmi churanata churarishca shina, chumbillishca shinapish can. Paimi cai pachataca pi mana cuyuchipacta sinchita ruhuarca.

² Can mandanaca ñaupamanta pachami sinchi tiyacun. Canca huiñaita causac Diosmi cangui.

³ Mandac Dioslla, jatun yacucunapish jatarinmi. Manchanayaitami huaj nishpa jatarin.

⁴ Jahua pachapi causac Dioslla, canca tucuita ruhuacmi cangui. Canmi jatun yacu huaj nicuctapish, mama cucha jatarishcatapish yalli cangui.

⁵ Mandac Dioslla, cambac yachachishcaca mana paquipacmi. Cambac huasipish huiñaitami cambaclla canga.