SALMOS 92 - Dios Rimashcata Quillcashcami

Diosta jatunyachishpa cantashcamanta

Samana punzhapi cantana Salmomi.

¹ Mandac Diosta jatunyachishpa cantanaca mai sumacmi. Jahua pachapi causac Dioslla, canta salmocunahuan cantana sumacmari.

² Can llaquic cashcata tutamanta huillana, can cashcata nic cashcata tuta huillanaca mai sumacmi.

³ Chunga cuerdayuc tocanapi, salteriopi, arpapi sumacta tocashpami cantani.

⁴ Mandac Dioslla, can ruhuashcacunahuanca cushichishcanguimi. Cambac maquicunahuan ruhuashcata ricushpami yallita cushicuni.

⁵ ¡Mandac Dioslla, can ruhuashcacunaca mai jatunmi! ¡Cambac yuyaica pi mana entendipac yallita jatunmi!

⁶ Mana entendic runaca caitaca mana yachanchu. Yuyai illac runaca mana entendinchu.

⁷ Diosta mana manchaccuna quihua shina huiñashca cashpapish, millaita ruhuaccuna, yura sumacta sisac shina cashpapish, huiñaita chingaringapacmi cancuna.

⁸ Mandac Dioslla, canca huiñaita jahua pachapi causac Diosmi cangui.

⁹ Mandac Dioslla, canta piñaccunaca chingaringami. Millaita ruhuaccunataca caita chaitami cachangui.

¹⁰ Shina cacpipish canca sacha huagrata shinami ñucataca sinchiyachingui. Ashtahuan alli aceitehuanmi cahuishca casha.

¹¹ Ñucata piñaccuna llaqui tucuctaca ñuca ñahuihuantac ricuchun, ñucata mana ricunayachiccuna aij nicuctaca ñuca ringrihuantac uyachunmi saquishcangui.

¹² Cashcata ruhuaccunaca palmera yura shinami sisacunga. Líbano urcupi tiyac cedro shinami huiñanga.

¹³ Mandac Diospac huasipi tarpushca shinami, Diospac huasi canzha pambapica sisanga.

¹⁴ Yuyac cashpapish alli granota pucuc yura shinami canga. Paicunaca verdinlla yuracuna shinami sinchi canga.

¹⁵ Chaica: «Ñucanchicta huacaichic Diosca cashcata ruhuacmi, jucha illacmi» nishpa huillangapacmi chashna canga.