SALMOS 91 - Dios Rimashcata Quillcashcami

Mandac Diosca ñucanchicta huacaichic cashcamanta

¹ Maijanpish jahua pachapi causac Diospi miticucca tucuita ruhuac Dios cuidashcami causan.

² Chaimantami Mandac Diostaca: «Canca ñuca miticuna, ñuca jarcarina jatun torre shinami cangui. Canpimi shunguta churani» nini.

³ Paimi pacallapi churashca tucllamanta, huañuchic ungüimantapish huacaichin.

⁴ Paipac plumahuan pacashpami, paipac alas ucupi cuidashpa charinga. Cashcata nic cashcahuanmi escudo shina, fierro churana shina huacaichinga.

⁵ Chashna cashcamanta tutaca ima manchaitapish mana charinguichu. Flechahuan punzha huañuchictapish

⁶ tuta shamuc mapa ungüitapish, punzha pacha huañuchiccunatapish mana manchanguichu.

⁷ Cambac lluqui ladopi huaranga, alli ladopi chunga huaranga urmashpa huañucpipish, cantaca pi imata mana ruhuangachu.

⁸ Canca Diosta mana manchaccuna llaquita apacuctaca cambac ñahuihuantacmi ricungui.

⁹ Jahua pachapi causac ñuca miticuna Mandac Diostami cambac huasita ruhuashcangui.

¹⁰ Chashna cashcamantaca ima llaquipish, ima ungüipish cambac huasimanca mana yaicungachu.

¹¹ Paipac angelcunatami can mai ñanta ricpipish, cuidachun cachanga.

¹² Cambac chaqui rumipi ama mitcarichunmi paicunapac maquipi apanga.

¹³ Leonpac, culebrapac jahuatami puringui. Maltón leontapish, huañuchic culebratapish sarunguimi.

¹⁴ Sumac Diosca: «Paitaca ñucata cuyashcamantami quishpichisha. Ñuca shutita ricsishcamantami ashtahuan jahuapi churasha.

¹⁵ Pai ñucata mañacpica, ñucaca uyashami. Pai yallita llaquihuan cacpica, ñucaca paihuanmi casha. Paita quishpichishpami alli nishca cachun ruhuasha.

¹⁶ Paimanca unai huatacunatami causachun saquisha. Paita quishpichishpami cushichisha» nirca.