SALMOS 90 - Dios Rimashcata Quillcashcami

CHUSCUNIQUI PARTE (Salmos 90—106 ) Diosca huiñaita, runaca ashacamanlla causac cashcamanta

Diosta servic Moisés mañashcami.

¹ Jatun Dioslla, tucui huahua huahuacunapac miticunami cangui.

² Urcucuna manarac tiyacpi, shinallatac cai pachatapish manarac ruhuashpami canca ña tiyashcangui. Ñaupamanta huiñaicamanmi Dios cangui.

³ Canca: «Huañuclla runacuna allpallamantac cutichic» nishpami allpallamantac cutichingui.

⁴ Canmanca huaranga huatacunaca pasashca caina punzha shinallami. Tutaca asha horas shinallami.

⁵ Gentecunataca jatun yacuta cacharic shinami tucuchingui. Muscushca shinallami chingarincuna. Tutamanta huiñashca quihua shinami canchic.

⁶ Quihuaca tutamanta huiñashpa sisashca cashpapish, chishipacca anguyashpa chaquinllami.

⁷ Can nina japiric shina rabiarishpami ñucanchictaca tucuchingui. Cutin piñarishpaca manchachishpami muspachingui.

⁸ Ñucanchic millaita ruhuashcataca cambac ñaupapimi ricuchingui. Ñucanchic pacalla ruhuashca juchacunapish, cambac ñahuipi tucuimi ricuricun.

⁹ Can piñaricpica, ñucanchic causaica utcami tucurin. Ñucanchic causana huatacunaca samaita aisashpa, cacharic shinami chingarin.

¹⁰ Ñucanchicca canchis chunga huatallatami causanchic. Unaita causac nishcami pusac chunga huatata causan. Chashna unaita causashpapish llaquihuan, nanaillahuanmi causanchic. Huatacuna utca pasacpica, ñucanchic causaipish utcami chingarin.

¹¹ ¿Pitac can yallita piñarishca ima shina cashcata yachan? ¿Pitac yallita piñarishcataca entendinyari?

¹² Ñucanchic shungupi alli yuyaita japingapac, ñucanchic causana punzhacuna yupashcalla cashcata allita ricuchiyari.

¹³ ¡Mandac Dioslla, cutimuiyari! ¿Ima horascamantac cutimugringui? Canta serviccunata llaquiyari.

¹⁴ Tutamantapi ñucanchicta yallita llaquiyari. Punzhantami ñucanchicca cushicushpa cantashun.

¹⁵ Ñucanchicca tauca huatacunatami llaquihuan cashcanchic. Chai huatacunapica mana allitami ricushcanchic. Chai tucui huatacunallatatac cushi causaita cuiyari.

¹⁶ Can ruhuashcataca canta serviccuna ricuchun. Can sumaimana cashcataca, paicunapac huahua huahuacuna ricuchun.

¹⁷ Ñucanchicta Mandac Dioslla, cambac cuyaica ñucanchic-huan cashca cachun. Ñucanchic maquihuan tucui ima ruhuashcapish, ama yanga cachun. Tucui ima ruhuanapipish alli cashca cachun.