SALMOS 9 - Dios Rimashcata Quillcashcami

Cashcata ruhuac Diosta alabanamanta

Cantaccunata pushac Mut-labén tonopi cantachichun David ruhuashca Salmomi.

¹ Mandac Dioslla, tucui ñuca shunguhuanmi cantaca alabasha. Tucui can ruhuashca sumaimanacunatami huillasha.

² Canmantami yallita cushicushpa caparisha. Jahua pachapi causac Dioslla, cambac shutitaca cantashami.

³ Ñucata piñaccunaca cutishpa callpashpami. Cambac ñaupapi urmashpa chingarirca.

⁴ Canca cashcata ruhuacmi cangui. Cambac tiyanapi tiyarishpami ñucataca cashcata ruhuashpa taripangui.

⁵ Llactacunapi causaccunatapish rimarcanguimi. Millaita ruhuaccunatapish tucuchircanguimi. Paicunapac shutitaca huiñaipacmi chingachircangui.

⁶ Ñucata piñaccunaca huiñaitami chingarishca. Pueblocunatapish tucuitami urmachircangui. Chai pueblocunapica yuyaringapacllapish imata mana saquircanguichu.

⁷ Ashtahuanpish Mandac Diosca huiñaitami causanga. Paica gentecunata taripangapacmi mandashpa tiyanapi tiyacun.

⁸ Paimi cai pachapi causaccunataca cashcata ruhuashpa taripanga. Shinallatac cashcata ruhuashpami mandanga.

⁹ Mandac Diosca llaquichishca causaccunata cuidacmi. Llaqui punzhacunapi cuidacmi can.

¹⁰ Mandac Dioslla, canta mashcaccunataca mana saquircanguichu. Cambac shutita ricsiccunaca canpimi shunguta churangacuna.

¹¹ Sionpi causac Mandac Diostaca cantaichicyari. Pai ruhuashcacunata shuccunamanpish huillaichicyari.

¹² Diosca llaquilla caccunatami yuyarirca, paicuna huacashcataca mana cungarinchu Huañuchiccunata llaquichinmi.

¹³ Mandac Dioslla, ñucata llaquiyari. Ñucata piñaccuna llaquichicuctaca ricuiyari. Ñucataca huañuna pungumanta quishpichiyari.

¹⁴ Chashna ruhuacpimi, Sión pungupi canta alabana cashcata tucuiman huillashpa, can quishpichic cashcamantaca yallita cushicusha.

¹⁵ Shuctac llactapi causaccunaca paicunallatac ruhuashca jutcupimi urmarcacuna. Paicunallatac pacalla churashca tucllapimi paicunapac chaquicunaca churarirca.

¹⁶ Mandac Diosca cashcata ruhuashpami paipac shutitaca ricsichirca. Ashtahuanpish millaita ruhuaccunaca shuccunata urmachingapac paicunallatac ruhuashca tucllapimi urmarcacuna.

¹⁷ Millaita ruhuaccunapish, Diosta cungaric gentecunatapish Seolmanmi apashca canga.

¹⁸ Mandac Diosca huacchacunataca mana huiñaita cungaringachu. Paicuna shuyanapish mana huiñaita chingaringachu.

¹⁹ ¡Mandac Dioslla shayariyari! ¡Runacuna jatun tucushpa causachunca ama saquichu! Llactacunapi causaccuna ima ruhuashcataca cambac ñaupapi ricuchiyari.

²⁰ Mandac Dioslla, paicunapica manchaita churaiyari. Paicunaca runallami. Chaitaca paicunaman ricuchiyari.