SALMOS 89 - Dios Rimashcata Quillcashcami

Dios Davidhuan ari nishcamanta

Yachachingapac ezraitapuramanta Hemán ruhuashca Salmomi.

¹ Mandac Dioslla, can llaquic cashcataca huiñaitami cantacushalla. Can nishcata pactachic cashcataca huahua huahuamanmi huillasha.

² Ñucaca: «Canca alli rumicunahuan huasichishca shina huiñaita llaquicmi cangui. Can cashcata nic cashcapish, jahua pacha shina sinchimi» nircani.

³ Can acllashca, canta servic Davidhuan ari nishpaca:

⁴ «Huiñaitami cambac huahuacunatapish mandachun churasha. Cambac jatun tiyarinapica paicunami huahua huahuacunacaman tiyaringa» nircanguimi.

⁵ Mandac Dioslla, can sumaimanacunata ruhuashcataca jahua pachapi caccunami alli ningacuna. Can cashcata nic cashcataca cambaclla chicanyachishcacunami alli ningacuna.

⁶ ¿Pitac jahua pachapica can Mandac Dios-huanca chimbapurai pudinyari? Jahua pachapi causaccunapurapica, ¿pitac Mandac Dios shina jatunca tiyangayari?

⁷ Cambaclla tandanacushcapica manchana Diosmi cangui. Tucui cambac muyundipi tiyaccunapac cumurina Diosmi cangui.

⁸ Tucuita ruhuac Mandac Dioslla, ¿pitac can shinaca tiyanyari? ¡Canca tucuita mandacmi cangui! Cashcata nic Diosmi cangui.

⁹ Piñarishca mama cuchatapish canmi mandangui. Yacu jatarishpa huaj nicuctapish canmi casillata ruhuangui.

¹⁰ Canmi Rahab manchana animaltaca macanacuipi chugrichic shina llaquichircangui. Canta piñaccunatapish cambac tucuita ruhuac maquihuanmi shic-huarcangui.

¹¹ Jahua pachapish, cai pachapish cambacmi. Canmi cai pachapi imalla tiyaccunatapish ruhuarcangui.

¹² Jahuaman tiyaccunatapish, uraman tiyaccunatapish canmi ruhuarcangui. Tabor urcupish, Hermón urcupish cambac shutitami cantangacuna.

¹³ Cambac maquica tucuita ruhuac, sinchi maquimi. Cambac alli lado maquica alli nishcami.

¹⁴ Can mandashpa tiyarina callari rumi shinaca cashcata ruhuana, imatapish allita ruhuanami. Cambac ñaupataca llaquina, cashcata nina yuyaimi ricun.

¹⁵ ¡Canta caparishpa cantaccunaca yallita cushicuchun! Mandac Dioslla, cambac ñahuihuan achicyachishcapimi puringacuna.

¹⁶ Cambac shutimantami punzhanta cushicungacuna. Can cashcata ruhuac cashcamantami jatunyachingacuna.

¹⁷ Canmi sumaimanapish, sinchiyachicpish cangui. Can yallita cuyashpami ñucanchic mandanataca sinchiyachingui.

¹⁸ ¡Mandac Diosca ñucanchic jarcarina escudomi! ¡Ñucanchic Jatun Mandacca israelcunapac jucha illac Diosmi!

¹⁹ Cambaclla runacunaman muscuipi shina ricurishpaca: «Shuc sinchi runatami ayudarcani. Ñuca acllashcapuramantami shuc runata jatunyachircani.

²⁰ Ñucata servic Davidta japishpami, ñucapaclla cachun aceitehuan cahuircani.

²¹ Tucuita ruhuac ñuca maquimi tucui causaipi paihuan canga. Ñuca rigrapish paita sinchiyachingami.

²² Paita piñacpish mana paita llaquichingachu. Mana allita ruhuaccunapish mana mishangachu.

²³ Ashtahuanpish paita piñaccunataca paipac ñaupapimi llaquichisha. Paita millanayachiccunataca chugrichishami.

²⁴ Ñucaca cashcata ruhuashpami paitaca llaquicushalla. Ñuca shutimantami paica poderta charinga.

²⁵ Shinallatac paipac maquitaca mama cuchata mandachunmi churasha. Jatun yacucunatapish paipac alli lado maquihuanmi mandanga.

²⁶ Pai ñucata mañashpaca: “Canca ñuca taitami cangui. Ñuca Diosmi cangui. Ñuca miticuna quishpichic jatun rumimi cangui” ningami.

²⁷ Ñucapish paitaca punta churi cachunmi churasha. Shinallatac cai pacha jatun mandaccunapac jahuapimi churasha.

²⁸ Ñucaca paitaca huiñaitami llaquicushalla. Ñuca paihuan ari nishcataca manatac paquishachu.

²⁹ Paipac huahua huahuacunataca huiñaitami mandac cachun churasha. Pai mandashpa tiyarinapish jahua pacha shinami huiñaita canga.

³⁰ Shina cacpipish, paipac huahua huahuacuna ñuca mandashcata saquishpa, ñuca mandashcacuna nishca shina mana causacpi,

³¹ ñuca quillcashpa mandashcacunata yangata ruhuacpi, ñuca mandashcacunata mana cazucpica,

³² chashna ñucata mana cazushpa, millaita ruhuashcamantaca varahuan azotishpami llaquichisha.

³³ Shina cacpipish, Davidta llaquinataca manatac saquishachu. Cashcata ninatapish mana saquishachu.

³⁴ Paihuan ari nishcatapish mana yangata ruhuashachu. Ñuca nishcacunataca mana nishcanichu nishpaca mana nishachu.

³⁵ Ñuca jucha illac cashcamantaca shuc cutinllami ari nircani. Davidmanca manatac llullashachu.

³⁶ Huiñaitami paipac huahua huahuacunaca causanga. Pai mandashpa tiyarinapish ñuca ñaupapica inti shinami canga.

³⁷ Quilla shinami huiñaita sinchi tiyacungalla. Jahua pachapica mana llullashpa huillac runa shinami tiyacun» nircanguimi.

³⁸ Ashtahuanpish canllatacmi jatun mandac cachun aceitehuan cahuishca mandactaca yangapi churashcangui. Canllatacmi paihuan piñarishcangui.

³⁹ Canta servic-huan ari nishcatapish paquishcanguimi. Paipac coronatapish sarushpami yangapi churashcangui.

⁴⁰ Pueblo muyundi pircashcatapish tuñishpami, sinchi torrecunatapish urmachishcangui.

⁴¹ Ñanta pasaccunaca tucuimi shuhuashpa rincuna. Cuchullapi causaccunapish burlashpami asincuna.

⁴² Paita piñaccunapac alli lado maquitami sinchiyachishcangui. Paita mana ricunayachiccunatami cushichishcangui.

⁴³ Paipac espadataca filo illactami ruhuashcangui. Jatun macanacuipipish mana ayudarcanguichu.

⁴⁴ Pai sumac cashcatapish tucuchircanguimi. Pai mandashpa tiyarinataca pambatami shitarcangui.

⁴⁵ Huambrarac causana huatacunatapish ashallayachishcanguimi. Churanahuan pilluc shinami pingaihuan pillushcangui.

⁴⁶ Mandac Dioslla, ¿ima horascamantac caruyashpa ñahuita pacagringui? ¿Huiñaitachu ñucanchic-huanca nina japiric shina piñarigringui?

⁴⁷ Ñuca causaica llandu shinalla cashcataca yuyaringuiyari. ¿Imapactac aichayuc runapac huahuacunataca ruhuarcanguiyari?

⁴⁸ ¿Pi runata mana huañushpa causacungalla? ¿Pitac Seolman rinamantaca quishpiringa?

⁴⁹ Jatun Dioslla, ¿utcapi llaquinaca imatac tucurca? Cashcata nic cashcamantami Davidhuan ari ninacurcangui.

⁵⁰ Jatun Dioslla, canta servicta burlashpa llaquichicucta ricuiyari. Tauca gentecuna mana alli nishpa rimashcataca ñuca shungupimi charicuni.

⁵¹ Mandac Dioslla, canta piñaccunami ñucanchicta camincuna. Jatun mandac cachun aceitahuan cahuishca jatun mandactaca punzhantami pingaichincuna.

⁵² ¡Mandac Diosca huiñaita alli nishca cachun! ¡Chashna cachun, chashna cachun!