SALMOS 88 - Dios Rimashcata Quillcashcami

Huañuimanta quishpichichun Diosta mañashcamanta

Corepac churicuna cantana Salmomi. Cantaccunata pushac llaquilla tonopi cantachichun ezraitapuramanta Hemán ruhuashca Salmomi.

¹ Ñucata quishpichic Mandac Dioslla, tutapish, punzhapish canllatami mañani.

² Ñuca mañashcacunaca canman uyarishca cachun. Ñuca caparishpa mañashcataca cambac ringrihuan uyaiyari.

³ Ñuca almaca yallimana millaitami ruhuashca. Ñuca causaipish Seolman rinallami.

⁴ Ñucaca enterrarina jutcuman riccunahuan yupashcami cani. Fuerza illac runami cani.

⁵ Ñucaca huañushcacunahuan tandachishpa chicanyachishcami cani. Espadahuan huañuchishpa enterrashca shinami cani. Cambac maquimanta anchurishca cashcamantami, cambacca ña cungarishca cancuna.

⁶ Mana llucshipac, manchana jutcupimi shitashcangui.

⁷ Can yallita piñarishcaca ñucapac jahuapimi urmashca. Yacu jataricuc shinami llaquichircangui.

⁸ Ñuca ricsishcacunatapish tucuimi ñucamanta caruyachishcangui. Paicunapac ñaupapica piñanatami ruhuashcangui. Ñucaca prezushca shinami cani. Mana llucshi pudinichu.

⁹ Yallita llaquihuan huacacucllapitacmi ñuca ñahuipish mana ricun. Mandac Dioslla, punzhantami maquita huichai chutashpa cantaca mañani.

¹⁰ ¿Pi mana ruhuaipaccunataca huañushcacunaman ruhuanguichu? ¿Huañushcacunaca canta jatunyachingapac jataringachu?

¹¹ ¿Can llaquic cashcataca enterrashca caccunaca parlanacungachu? ¿Abadonpi caccunapish can cashcata nic cashcataca yuyaringachu?

¹² ¿Amsapi caccunaca can mancharinacunata ruhuashcata yachangachu? Can cashcata ruhuac cungarishca, ¿allpapi caccunaca yachangachu?

¹³ Shina cacpipish Mandac Dioslla, ñucaca cantami mañani. Tutamanta jatarishpami canta mañani.

¹⁴ Mandac Dioslla, ¿imamantatac piñanguiyari? ¿Imamantatac cambac ñahuita ñucamanta pacanguiyari?

¹⁵ Ñucaca huañunalla huacchami cani. Huambramanta pachami, manchana llaquicunahuan canca llaquichishcangui. ¡Ña mana causai pudinichu!

¹⁶ Can yallita piñarishcaca ñitic shinami ñucataca llaquichicun. Can cachashca manchaimi yallita llaquichicun.

¹⁷ Ñucataca punzhantami jatun yacu muyundita shamuc shina charicun. Muyunditami chaupinchishpa churashca.

¹⁸ Ñucahuan puriccunatapish, ricsishcacunatapish ñucamanta caruyachishcanguimi. Amsallatami ñucahuan cachun saquishcangui.