SALMOS 86 - Dios Rimashcata Quillcashcami

Ashtahuan llaquichun Diosta mañashcamanta

David Diosta mañashcami.

¹ Mandac Dioslla, ñucaca imapish illac, llaquillami cani. Chaimanta ñuca mañashcata cambac ringrihuan uyaiyari.

² Ñuca Dioslla, canpi shunguta churashpa, canta cazushpami causacuni. Chaimanta canta servic ñuca almata cuidashpa quishpichiyari.

³ Mandac Dioslla, ñucata llaquiyari. Canllatami tucui punzha mañani.

⁴ Jatun Dioslla, punzhantami canta mañacunilla. Canta servic ñucata cushichiyari.

⁵ Jatun Dioslla, juchacunata perdonac cuyac Diosmi cangui. Canta mañaccunataca yallitami cuyangui.

⁶ Mandac Dioslla, ñuca mañashcata uyaiyari. Caparishpa canta mañashcata uyaiyari.

⁷ Ñuca mañashcata uyac cacpimi, llaqui punzhapica canta cayani.

⁸ Mandac Dioslla, dioscunapurapica can shina Diosca pi mana tiyanchu. Can ruhuashca shinataca pi mana ruhuai pudinchu.

⁹ Jatun Dioslla, tucui can ruhuashca llactacunami cambac ñaupaman shamushpa, cantaca sumacmi cangui ningacuna.

¹⁰ Canca sumaimanacunata ruhuac jatun Diosmi cangui. ¡Canllami Diosca cangui!

¹¹ Mandac Dioslla, can munashca shina causanata yachachiyari. Cashcata nic ñanpimi causasha. Ñuca shungupipish canta manchana yuyaita churaiyari.

¹² Ñucata Mandac Dioslla, tucui shunguhuanmi canta alabasha. Huiñaitami cambac shutitaca jatunyachishpa causasha.

¹³ Canca ñucataca yallitami cuyac cangui. Seolpi ucuyanamantami ñucataca llucchircangui.

¹⁴ Dioslla, jatun tucushcacunaca ñucata llaquichingapacmi jatarishcacuna. Huañuchic runacunami tandanacushpa ñucata huañuchinata yuyarinacuncuna. Cantaca mana yuyarincunachu.

¹⁵ Shina cacpipish, Mandac Diosca llaquic, cuyac Diosmi cangui. Mana utca piñaric, yallita cuyacpish, cashcata nicpish canguimi.

¹⁶ Ñucata ricushpa llaquiyari. Canta servic ñucata sinchiyaichicyari. Canta servic huarmipac cari huahuataca huacaichiyari.

¹⁷ Mandac Dioslla, ñucata mana ricunayachiccuna ricushpa pingachun ñucata cuyacushcata ricuchiyari. Can Mandac Diosmi ñucata ayudashpa cushichircangui.