SALMOS 85 - Dios Rimashcata Quillcashcami

Israelcunata llaquiyari nishpa Diosta mañashcamanta

Cantaccunata pushac cantachichun, Corepac churicunaman ruhuashca Salmomi.

¹ Mandac Dioslla, cambac llactapi causaccunahuanca yalli allimi carcangui. Jacobopac churicunatapish prezumanta llucchimurcanguimi.

² Can acllashcacuna millaita ruhuashcata perdonashpami, tucui juchacunatapish cungarircangui.

³ Piñarishca cashpapish tucuimi cungarircangui. Nina japiric shina piñarishca cashpapish, alli tucurcanguimi.

⁴ Ñucanchicta quishpichic Dioslla, punta alli causacushca shinallatac causangapac alli causaita cuiyari. Ñucanchic-huan piñarishcata cungariyari.

⁵ ¿Ñucanchic-huanca huiñaitachu piñashca cagringui? ¿Ñucanchic huahua huahuacunahuanpish piñarishcachu cagringui?

⁶ Can acllashca ñucanchic canmanta cushicuchun, ¿manachu cutin causaita cugringui?

⁷ Mandac Dioslla, can llaquic cashcamanta ñucanchicta quishpichiyari.

⁸ Mandac Dios rimashcata uyashami. Pai acllashcacunamanca cushi causaitami huillanga. Paipacllacuna imapish mana allita ama ruhuachun, ima mapapipish ama urmachunmi rimanga.

⁹ Ñallami paita manchaccunata quishpichinga. Chashna ruhuacpica, ñucanchic llactapimi sumaimana Diosca ñucanchic-huan causanga.

¹⁰ Cuyaihuan, cashcata ninahuanmi tupanacurca. Cashcata ruhuanahuan, cushi causaihuan muchanacurca.

¹¹ Cashcata ninaca allpamantami huiñanga. Cashcata ruhuanaca jahua pachamantami ricunga.

¹² Mandac Diosmi, ñucanchic allpacunamanca allicunata cunga. Chaimantaca alli granotami pucunga.

¹³ Cashcata ruhuanami paita ñaupashpa ringa. Pai sarushpami ñucanchic ñantaca allichinga.