SALMOS 84 - Dios Rimashcata Quillcashcami

Diospac huasiman rinata munashcamanta

Cantaccunata pushac Gitit tonopi cantachichun, Corepac churicunaman ruhuashca Salmomi.

¹ ¡Tucuita Mandac Dioslla, can causana huasica sumacmi!

² Ñuca almaca Mandac Diospac huasi pungupi canatami yallita munan. Ñuca shungupish, ñuca cuerpopish cushicushpami causac Diosta cantan.

³ ¡Tucuita Mandac Dioslla, jatun Mandac Diosmi cangui! Zhutacunapish, quindicunapish, cambac altarcuna cuchupimi cuzhata ruhuancuna. Chaipimi paicunapac huahuacunata huiñachincuna.

⁴ ¡Cambac huasipi causaccunaca mai cushimi canga! Huiñaitami cushicushpa canta alabanga.

⁵ ¡Can ayudacpi, fuerzata chariccunapish, tucui shunguhuan cambac ñanllapi causanata munaccunapish maimi cushicunga!

⁶ Huacana pugru pambata pasashpaca, achca yacu llucshicuc pambatami ruhuancuna. Utca shamuc tamyapish yacu tiyarictami tamyan.

⁷ Purishpa rishpami, ashtahuan fuerzata japincuna. Sión urcupimi Diostaca ricungacuna.

⁸ Tucuita Mandac Dioslla, ñuca mañashcata uyaiyari. Jacobopac Dioslla, ñuca mañashcata sumacta uyaiyari.

⁹ Ñucanchic escudo shina Dioslla, aceitehuan cahuishca cambac jatun mandactaca ricuraiyari.

¹⁰ Huaranga punzhacunata canzhapi canapac randica, shuc punzhallatapish cambac huasi pungupi canami ashtahuan alli. Juchayuccunapac huasipi causanapac randica, ñuca Diospac huasi pungupi canami ashtahuan alli.

¹¹ Mandac Diosca ñucanchicta achicyachic inti, ñucanchicta jarcac escudomi. Mandac Diosca mana pandarishpa causaccunataca cuyashpami allipi churan.

¹² ¡Tucuita Mandac Dioslla, canpi shunguta churaccunaca maimi cushicunga!